ەلباسىنىڭ جاڭا جولداۋىندا ادام كاپيتالىن دامىتۋ ەڭ ماڭىزدى باعىت بولعاندىقتان, مەن ءبىلىم سالاسىنداعى نەگىزگى مىندەتتەر جايلى پىكىرىمدى ورتاعا سالماقشىمىن.
ەلباسى ءوزىنىڭ جولداۋىندا ءبىلىم بەرۋ باعدارلاماسىنىڭ جاڭارتىلعان مازمۇنى شەڭبەرىندە وقىتۋعا كوشكەن مۇعالىمدەردىڭ جالاقىسىن 2018 جىلعى 1 قاڭتاردان باستاپ 30%-عا كوتەرۋ مىندەتىن بەلگىلەدى.
بۇگىنگى كۇنى ءبىلىم جانە عىلىم مينيسترلىگى لاۋازىمدىق جالاقىنى ارتتىرۋ ءبىلىم بەرۋدىڭ باعدارلاماسىنىڭ جاڭارتىلعان مازمۇنىنا كوشۋ كەستەسىنە سايكەس جۇرگىزىلەدى دەپ جوسپارلاۋدا. الايدا لاۋازىمدىق جالاقىنى ارتتىرۋ تەتىكتەرىن ازىرلەۋ بارىسىندا پەداگوگيكالىق وقۋ جۇكتەمەسى جوق قىزمەتكەرلەردىڭ جالاقىسىنا 30% ۇستەماقى قوسۋدى ەسكەرۋدى ءجون دەپ سانايمىن.
جالاقىنى كوتەرۋدىڭ تاعى ءبىر شاراسى مۇعالىمدەردى اتتەستاتتاۋدىڭ جاڭا مودەلىنە كوشۋدە قاراستىرىلعان. ناتيجەسىندە, مۇعالىمدەردىڭ جالاقىسى بىلىكتىلىگىنىڭ راستالۋىنا بايلانىستى تۇتاستاي العاندا 30%-دان 50%-عا دەيىن وسەدى. بۇل ماسەلەلەردى جۇيەلى تۇردە جۇزەگە اسىرۋ ماقساتىندا بىلىكتىلىك تەستىلەۋ جانە اتتەستاتتاۋدى وتكىزۋ مەرزىمىن قايتا قاراستىرۋ قاجەت. سوندىقتان ءبىلىم جانە عىلىم مينيسترلىگى پەداگوگ قىزمەتكەرلەردى اتتەستاتتاۋدىڭ جاڭا جۇيەسىنىڭ جوباسىن ازىرلەگەنى ءجون.
سونىمەن قاتار ماسەلەنىڭ الەۋمەتتىك ماڭىزدىلىعىنا بايلانىستى 2018 جىلعى رەسپۋبليكالىق بيۋدجەتتىڭ ءبىرىنشى ناقتىلاۋىن وتكىزۋدى تەزدەتۋ قاجەت دەپ سانايمىن.
تاعى ءبىر ايتا كەتەتىن جايت, ەلباسى, بىزدەگى وقۋشىلاردىڭ جۇكتەمەسى تمد ەلدەرىنىڭ ىشىندە ەڭ جوعارى بولىپ وتىرعانىن جانە ەكونوميكالىق ىنتىماقتاستىق جانە دامۋ ۇيىمى ەلدەرىنە قاراعاندا دا كوپ ەكەنىن ەسكەرىپ, ونى تومەندەتۋدى تاپسىردى.
قازىرگى تاڭدا مەكتەپ وقۋشىسىنىڭ اپتالىق وقۋ جۇكتەمەسىن ازايتۋ بەس كۇندىك وقۋ اپتاسىنا كەدەرگىسىز كوشۋگە مۇمكىندىك بەرەتىنى ءسوزسىز. وسى باعىتتاعى جۇمىس بارىسىندا مەكتەپتە وقىتىلاتىن نەگىزگى پاندەر باعدارلامالارىنىڭ مازمۇنىنىڭ قىسقارماۋىنا, وقۋشىلاردىڭ ءبىلىم ساپاسىنىڭ تومەندەۋىنە جول بەرمەۋ ماسەلەلەرىن ءبىلىم جانە عىلىم مينيسترلىگى باستى نازارعا الۋى ءتيىس. بۇل رەتتە, وقۋشىلاردىڭ وقۋ جۇكتەمەسى قىسقارعان كەزدە مۇعالىم سانىنىڭ دا قىسقاراتىندىعىن ەسكەرگەن ءجون. سونىمەن قاتار مۇعالىمنىڭ جاڭا زامان تالابىنا ساي شىعارماشىلىقپەن جۇمىس ىستەۋىنە بارىنشا مۇمكىندىك بەرۋ ءۇشىن جانە ولاردىڭ جاۋاپكەرشىلىگىنىڭ ارتۋىن ەسكەرە وتىرىپ, ء«بىلىم تۋرالى» زاڭنىڭ 52-بابىندا كورسەتىلگەن 18 ساعاتتىق مۇعالىم جۇكتەمەسىن ازايتىپ, زاڭعا ءتيىستى وزگەرىستەر ەنگىزۋ قاجەت نەمەسە وسى نورمانى زاڭنان الىپ ۇكىمەتتىڭ ءبىلىم بەرۋ سالاسىنداعى قۇزىرەتىنە بەرۋدى ءجون دەپ ەسەپتەيمىن.
سونىمەن قاتار مەكتەپ بىتىرۋشىلەرىنىڭ جالپى ءبىلىم بەرەتىن پاندەر بويىنشا وقۋ ناتيجەلەرىن وتاندىق جوعارى وقۋ ورىندارىندا تانۋ جانە ورتا ءبىلىم دەڭگەيى مەن جوعارى ءبىلىم بەرۋ دەڭگەيىنىڭ ساباقتاستىعىن قاراستىرۋ قاجەت. وسى ماسەلەنىڭ بارلىعى مۇعالىمنىڭ مارتەبەسىن ارتتىرۋعا جانە پەداگوگتاردى وزدەرىن ۇدايى جەتىلدىرۋگە ىنتالاندىراتىن بىردەن-ءبىر قۇرال ەكەندىگى ايقىن.
سونداي-اق جوعارى ءبىلىم بەرۋ ماسەلەسى دە ەلباسىنىڭ ۇدايى نازارىندا. جولداۋدا اتاپ كورسەتىلگەن جوعارى وقۋ ورىندارىنىڭ اكادەميالىق ەركىندىگىن زاڭنامالىق تۇرعىدان بەكىتۋ ماسەلەسىنىڭ ماڭىزى زور دەپ سانايمىن.
قازىر پارلامەنت ماجىلىسىندەگى جۇمىس توبى ەلىمىزدەگى «جوعارى وقۋ ورىندارىنىڭ اكادەميالىق جانە باسقارۋ دەربەستىگىن كەڭەيتۋ ماسەلەلەرى تۋرالى» زاڭ جوباسىن قاراستىرۋ ۇستىندە. «100 ناقتى قادام» ۇلت جوسپارىنىڭ 78-قادامىنا سايكەس, نازارباەۆ ۋنيۆەرسيتەتىنىڭ تاجىريبەسى نەگىزىندە جوو-نىڭ اكادەميالىق جانە ءوزىن ءوزى باسقارۋىن كەڭەيتۋ, سونىمەن قاتار حالىقارالىق تاجىريبەگە سايكەس جەكەمەنشىك جوعارى وقۋ ورىندارىن كوممەرتسيالىق ەمەس ۇيىمدارعا اۋىستىرۋ ماسەلەسى كوزدەلگەن.
زاڭ جوباسى قابىلدانعاننان كەيىن جوعارى وقۋ ورىندارىنىڭ اكادەميالىق ەركىندىگى حالىقارالىق اكرەديتتەۋ ورگاندارىنىڭ تالاپتارىنا ساي كەلەتىن ءبىلىم بەرۋدىڭ جاڭا باعدارلامالارىن ساپالى جاساۋعا قولايلى مۇمكىندىك بەرەدى.
ەرسۇلتان بەكتۇرعانوۆ, پارلامەنت ءماجىلىسىنىڭ دەپۋتاتى