ءزۇلفيا عابيدۋللينا ەلىمىزگە عانا ەمەس, وزگە مەملەكەتتەرگە دە تانىس ەسىم. تاعدىر تاۋقىمەتىنە مويىماي, اعىسقا قارسى جۇزگەن قايسار قىزدىڭ ەرلىگى كوپكە ۇلگى. ونىڭ وسى قاسيەتى قازاق ەلىنەن شىققان تۇڭعىش پاراليمپيادا چەمپيونى دارەجەسىنە جەتكىزدى, «قازاقستانداعى 100 جاڭا ەسىمنىڭ» قاتارىنا قوستى.
الەمگە اۋليەاتانىڭ عانا ەمەس, قازاق ەلىنىڭ قايسارلىعىن ايگىلەگەن ءزۇلفيا سپورت سالاسىنداعى ەرەن قۇبىلىس. بەس جاسىندا موتوتسيكل جۇرگىزۋشىسى قاعىپ كەتكەن قارشاداي قىزدىڭ ومىرتقاسى جاراقاتتانىپ, سول كەزدە دەنە شىنىقتىرۋمەن اينالىسادى. ءبىر جىل بويى اۋرۋحانا توسەگىنە تاڭىلىپ, اياق-قولى جاراقاتتانعان ول بالالىقتىڭ بال ءدامىن سەزىنە العان جوق. الايدا الدىنا ومىرلىك ماقسات قويا بىلگەن ءزۇلفيا 1998 جىلدان باستاپ ءجۇزۋدى تاڭدايدى. سودان بەرى سپورتتان قول ۇزبەي, ءتۇرلى جەتىستىكتەرگە جەتىپ كەلەدى. ال 2007 جىلدان بەرى ءزۇلفيانى ەلىمىزگە ەڭبەگى سىڭگەن باپكەر ساتتار بەيسەمباەۆ جاتتىقتىرادى. سول جىلدان باستاپ ول كاسىپقوي سپورتقا ءبىرجولا كىرىسەدى.
الدىنا ۇلكەن ماقسات قويا بىلگەن ادام وعان جەتەدى. ءزۇلفيا عابيدۋللينا بۇگىندە ءوز ەڭبەگىمەن بيىككە جەتكەنىمەن, بۇدان دا بيىككە جەتۋدى ماقسات ەتەدى. مۇمكىندىگى شەكتەۋلى بولسا دا ارباعا وتىرىپ الىپ جاۋىن-شاشىنعا دا قاراماي, جاتتىعۋ زالىنا بارىپ ءجۇرىپ ەل ابىرويىن اسىرعان بيىكتى باعىندىردى. ەندى ول قازاقستاننان شىققان ەكى دۇركىن پاراليمپيادا چەمپيونى بولۋدى ارماندايدى. ول ءۇشىن ەلىمىزدىڭ كوك تۋىن الەم اسپانىندا جەلبىرەتۋدەن اسقان باقىت جوق.
ءزۇلفيانىڭ ءومىر جولى ءتۇرلى جەتىستىكتەرگە تولى. 2014 جىلى ينچحوندا وتكەن پاراازيالىق ويىنداردا التىننان القا تاعىندى. ال 2015 جىلى شوتلانديانىڭ گلازگو قالاسىندا وتكەن الەم چەمپيوناتىندا ەكى بىردەي قولا مەدالدى يەلەندى. كەلەسى جىلى برازيليا مەملەكەتىنىڭ ريو قالاسىندا وتكەن پاراليمپيادا ويىندارىندا جەڭىمپاز اتانىپ, تورتكۇل دۇنيەگە مەملەكەتىمىزدىڭ مەرەيىن ۇستەم ەتتى. سوندىقتان ءزۇلفيا عابيدۋللينا تىرەك قيمىل اپپاراتى زاقىمدانعان سپورتشىلار اراسىندا تۇڭعىش جەڭىمپاز بولىپ, ەل تاريحىندا قالدى.
ول بۇگىندە تاراز قالاسىندا تۇرادى. الدىنا ەل مەرەيىن اسقاقتاتۋدى ماقسات ەتىپ قويعان ءزۇلفيا قازىر دە دايىندىق ۇستىندە. ەلباسىنىڭ ءوزى ونى جارقىن جەڭىسىمەن قۇتتىقتاپ, تابىس تىلەگەنى ەل ەسىندە. ەلىنىڭ مەرەيىن اسقاقتاتقان وعان وتكەن جىلى جامبىل وبلىستىق اكىمدىگى ءۇي سالىپ بەرىپ, قولداۋ كورسەتتى. ەلىم دەگەن ەر مىنەزدى قاھارمان قىزدىڭ قايسارلىعى شىنىندا دا تاڭدانتپاي قويمايدى.
حاميت ەسامان, «ەگەمەن قازاقستان»
جامبىل وبلىسى