ەلباسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى ماقالاسىندا: ء«ححى عاسىردىڭ جاھاندىق كارتاسىندا ەشكىمگە ۇقسامايتىن, دەربەس ورنى بار ۇلت بولامىز دەسەك, «جاھانداعى زاماناۋي قازاقستاندىق مادەنيەت» جوباسىن ىسكە اسىرۋعا ءتيىسپىز. الەم ءبىزدى قارا التىنمەن نەمەسە سىرتقى ساياساتتاعى ءىرى باستامالارىمىزبەن عانا ەمەس, مادەني جەتىستىكتەرىمىزبەن دە تانۋى كەرەك» دەي كەلە, جاھاندانۋ داۋىرىندەگى قازاقستاندىق مادەنيەتتىڭ بۇگىنى مەن بولاشاعىنا ايرىقشا ءمان بەرۋ قاجەتتىگىن ايتقان بولاتىن.
وسى باعدارلامادا كورسەتىلگەن ماقسات-مىندەتتەردى ىسكە اسىرۋ اياسىندا قر ۇلتتىق كىتاپحاناسىنىڭ باستاماسىمەن جانە قر مادەنيەت جانە سپورت ءمينيسترى ا. مۇحامەدي ۇلىنىڭ قولداۋىمەن قازاقستان مەن كۋۆەيت اراسىنداعى مادەنيارالىق بايلانىستاردى نىعايتۋعا ۇلكەن قادام جاسالدى. ءال-كۋۆەيت قالاسىندا 11-15 قاڭتاردا جىل سايىن ۇيىمداستىرىلاتىن ءال-كارين فەستيۆالىنە قازاقستاننىڭ «استانا-وپەرا» سيمفونيالىق وركەسترى قاتىسىپ, مايرا مۇحامەدقىزى, مەدەت شوتاباەۆ, ابزال مۇحيتدينوۆ, ايسۇلۋ ءابىلحانوۆا, رۋسلان بايمۋرزين سياقتى ەلىمىزدىڭ تانىمال ونەر قايراتكەرلەرى ونەر كورسەتىپ قايتتى دەپ حابارلادى قر ۇلتتىق كىتاپحاناسىنىڭ ءباسپاسوز قىزمەتى. وركەستر قۇرمانعازى ساعىرباەۆ, نۇرعيسا تىلەنديەۆ سياقتى تانىمال قازاق كومپوزيتورلارىنىڭ تاڭعاجايىپ شىعارمالارىن ورىنداپ, ونەر سۇيەر قاۋىمىنىڭ زور قوشەمەتىنە بولەنگەن.
كۋۆەيت مەملەكەتىندە وتكەن ءال-كارين فەستيۆالى شىن دارىندىلاردىڭ باسىن قوسىپ, ەرەكشە فورماتتا ۇيىمداستىرىلعانىن, ەلىمىزدەن بارعان وركەستر ۇلتىمىزدىڭ تاڭعاجايىپ شىعارمالارىن ورىنداپ, كۋۆەيت جۇرتشىلىعىنىڭ تاڭدايىن قاقتىرعانىن جەتكىزگەن ءانشى مايرا مۇحامەدقىزى: «كۋۆەيتتە جىل سايىن وتكىزىلەتىن ءال-كارين فەستيۆالى جوعارى دەنگەيدە ءوتتى. كۋۆەيت وتە باي, داۋلەتتى xالىق ەكەن. وكىمەتتىڭ ونەرگە, بىلىمگە بولىنگەن قاراجاتتارى مەن بولاشاق ۇرپاعىنا قالدىرعان مۇراسىن ەستىسەڭىز, عاجايىپ, ادام بالاسى سەنگىسىز تسيفرلار! كونتسەرت كەرەمەت ءوتتى! كورەرمەندەر قيماستىقپەن زالدان ارەڭ كەتتى. ايتپاقشى, كۋۆەيتتە كەرەمەت وپەرا تەاترى بار ەكەن, ماعان وپەرا ايتۋعا ۇسىنىس جاسادى» – دەيدى.
تاعى ءبىر اتاپ وتەرلىگى, 14 قاڭتاردا قر ۇلتتىق كىتاپحاناسى مەن حالىقارالىق ايەلدەر توبى (International Women’s Group) بىرلەسىپ, مادەنيەت جانە سپورت مينيسترلىگى جانە قازاقستاننىڭ كۋۆەيتتەگى ەلشىلىگىنىڭ قولداۋىمەن «Kazakhstan Time» قازاقستان كۇنىن ۇيىمداستىرعان.
قازاقستان كۇنى اياسىندا كۋۆەيت ۇلتتىق كىتاپحاناسىمەن ەكىجاقتى كەزدەسۋلەر ءوتىپ, كەلىسسوزدەر جۇرگىزىلگەنىن جەتكىزگەن قر ۇلتتىق كىتاپحاناسىنىڭ ءباسپاسوز قىزمەتى, قازاقستاندىق دەلەگاتسيا كۋۆەيت ۇلتتىق كىتاپحاناسىنىڭ ديرەكتورى كەمال مىرزامەن كەزدەسىپ, كىتاپxانا جۇمىستارىمەن تانىسقانىن, تاراپتار ارىپتەستىك ىنتىماقتاستىققا كەلىسكەنىن حابارلادى. قر ۇلتتىق كىتاپحاناسى مەن ءال-باپتين اراب پوەزياسى ورتالىق عىلىمي كىتاپحاناسىندا, مادەنيەت جانە كىتاپحانا سالاسىنداعى ىنتىماقتاستىق تۋرالى مەموراندۋمعا قول قويۋ ءراسىمى دە جوعارعى دەڭگەيدە وتكەن.
– ەندى ەكى كىتاپxانانىڭ ماماندارى كونە قولجازبالاردى زەرتتەۋ تاجىريبەلەرىمەن, ماماندارمەن, سونداي-اق سيرەك كىتاپتار مەن قولجازبالاردىڭ كوشىرمەلەرىمەن الماساتىن بولادى. بۇل ءبىز ءۇشىن زور مارتەبەلى جەتىستىك, – دەيدى قر ۇلتتىق كىتاپحاناسىنىڭ ديرەكتورى جانات سەيدۋمانوۆ. كۋۆەيت مەملەكەتىندەگى قازاقستان كۇنى اياسىندا وتكەن شارالار جەرگىلىكتى بۇقارالىق اقپارات قۇرالدارىنىڭ نازارىندا بولعان. اتاپ ايتقاندا, ەكى ەل اراسىنداعى قارىم-قاتىناستىڭ نىعايۋىنا سەبەپ بولعان ماڭىزدى شارالار كۋۆەيت ەلىنىڭ 11 ءباسپاسوزى مەن ۇلتتىق ارنالارىنان بەرىلىپ, حالىققا كەڭىنەن ناسيحاتتالعان. بيىل قازاقستان رەسپۋبليكاسى مەن كۋۆەيت مەملەكەتى اراسىنداعى ديپلوماتيالىق قارىم-قاتىناستىڭ ورناۋىنا 25 جىل تولۋدا. وسى ايتۋلى ماڭىزدى وقيعاعا وراي, ەندى ەكى ەل اراسىنداعى مادەني بايلانىس نىعايىپ, ورتاق تاريحي تامىر, مادەنيەت پەن ءداستۇردى بىرىكتىرۋدە. ۇلتتىق قۇندىلىقتارىمىز بەن رۋحاني بايلىعىمىزدى شەت مەملەكەتتەرگە تانىستىرۋ مەن دارىپتەۋدە بىرقاتار ىستەردىڭ باستاماشىسى بولعان قر ۇلتتىق كىتاپحاناسى ماماندارى وزىق ويلى ۇلت, ىرگەسى بەرىك ەل, بىلىمگە قۇشتار جۇرت ەكەنىمىزدى كورسەتۋدە الداعى ۋاقىتتىڭ ەنشىسىندە ءالى دە اتقارىلار قىرۋار شارۋا كۇتىپ تۇرعانىن جەتكىزدى.
ميرا بايبەك,
«ەگەمەن قازاقستان»
الماتى