قر سىرتقى ىستەر مينيسترلىگى اۋعانستاننىڭ كابۋل قالاسىندا بولعان تەررورلىق شابۋىلعا قاتىستى مالىمدەمە جاسادى.
مالىمدەمەدە: «قازاقستان قابىلداعى «ينتەركونتينەنتال» قوناق ۇيىندە بەيبىت حالىقتىڭ, سونداي-اق اۋعانستانعا بەيبىت ماقساتپەن كەلگەن شەتەل ازاماتتارىنىڭ ولىمىنە الىپ كەلگەن تەرروريستىك ارەكەتتى قاتاڭ ايىپتايدى.
اتالعان قاتىگەز جانە ورەسكەل ارەكەت اۋعانستان ءۇشىن عانا ەمەس, وسى ەلدەگى بەيبىتشىلىك پەن دامۋدى قالپىنا كەلتىرۋگە اتسالىسىپ جاتقان بارلىق حالىقارالىق قاۋىمداستىق ءۇشىن قاۋىپ-قاتەرلەر بولىپ تابىلادى.
قازاقستان اۋعانستانداعى تەرروريزم ماسەلەسىن تۇبەگەيلى شەشۋ ءۇشىن جەدەل شارالار قابىلداۋ قاجەتتىلىگىن تولىق جاۋاپكەرشىلىكپەن مالىمدەيدى.
قازاقستان اۋعانستانداعى بارلىق ساياسي كۇشتەردى ۇلتتىق تاتۋلاسۋ بويىنشا كەلىسسوزدەر جۇرگىزۋگە شاقىرادى.
قازاقستان بۇۇ قاۋىپسىزدىك كەڭەسىنىڭ توراعاسى رەتىندە جانە ۇلتتىق نەگىزدە اۋعانستانداعى جاعدايدى تۇراقتاندىرۋعا, تەرروريزمدى باسۋعا جانە ەلدى قالپىنا كەلتىرۋگە جان-جاقتى جاردەم كورسەتۋدى جالعاستىرادى.
بۇۇ قاۋىپسىزدىك كەڭەسى توراعاسىنىڭ قاڭتاردا قابىلداعان مالىمدەمەسى حالىقارالىق قاۋىمداستىقتى وسى ەلدەگى ساياسي جاعدايدى تۇراقتاندىرۋ ماقساتىندا اۋعانستانعا قولداۋ كورسەتۋگە شاقىرادى.
قازا بولعانداردىڭ تۋىستارى مەن جاقىندارىنا كوڭىل ايتامىز, سونداي-اق جاراقات العانداردىڭ تەز ارادا ساۋىعىپ كەتۋىن تىلەيمىز», دەلىنگەن.