وتكەن ءحىح عاسىردىڭ 40-شى جىلدارى قازاق دالاسىندا وربىگەن ۇلت-ازاتتىق قوزعالىستىڭ كوسەمى كەنەسارى قاسىم ۇلىنىڭ سەنىمدى سەرىكتەرىنىڭ ءبىرى – شۇبىرتپالى اعىباي باتىر. ول زاماندا شۇبىرتپالىلار بالقاش كولىنىڭ تۇستىك بەتىن جايلاسا, قىستا بەتپاقتىڭ ءشولىن باسىپ ءوتىپ, شۋدىڭ بويىن قىستايدى. وسى ەلدىڭ ءبىر توبى جوعارىداعى كوتەرىلىس جىلدارى سىر بويى شيەلى وڭىرىنە اۋىپ بارىپتى.
سول تۇستا, ناقتىراق ايتقاندا 1880 جىلدارى سىرداريا وبلىسىنىڭ پەروۆسك ۋەزىنە قاراستى شيەلى بولىستىعىنا سايلاۋ ءجۇرىپ, قىپشاق رۋىنان المەمبەت تۇرسىنباي ۇلى مەن شۇبىرتپالى ايەكە بەكەجان ۇلى ەكەۋى بولىستىققا تالاسقان ەكەن. سودان قاتتى شيەلەنىس ۇستىندە قىپشاق المەمبەت شۇبىرتپالى ايەكەنى جازىم ەتىپتى.
ايەكە بولسا اعىباي باتىردىڭ جاقىن رۋلاسى. جامان حابار ارقاداعى اعىبايعا دا جەتەدى. جاسى شاۋ تارتىپ وتىرعانىنا قاراماي, باتىر جولعا شىعادى. ۇزاق جول ءجۇرىپ قارالى اۋىلعا ات باسىن تىرەيدى. كۇللى شۇبىرتپالى «وي, باۋىرىمداپ» باتىردىڭ الدىنان شىعادى. كەلىندەر ايەكە بولىستىڭ قادىر-قاسيەتىن, بايلىق-بەدەلىن, كىسىلىگى مەن تۇسىنىگىن جىرعا قوسىپ, تىڭداعان پەندەنىڭ ساي-سۇيەگىن سىرقىراتىپ جوقتاۋ ايتادى.
الىستان كەلگەن قارت باتىرعا مۇنداعى اعايىندارى: «ۋا, باتىر, ەر – نامىسى, ەل نامىسى دەگەن, ءبىزدىڭ ايماققا بەدەل, اۋماققا ايبار ارىسىمىز وققا ۇشتى. ەل ءسىزدىڭ ءبىر اۋىز ءسوزىڭىزدى كۇتىپ وتىر. اعەكە, جاۋدان بەتىڭىز قايتپاعان باتىرسىز, حاننىڭ قاسىندا ءجۇرىپ, قازاقتىڭ جوعىن جوقتاپ, جاۋدىڭ وعىنا كەۋدە توسقان ەرسىز. باتاڭىزدى بەرىڭىز, المەمبەتتى شابامىز, قانعا قان الامىز», دەيدى.
ەدىرەڭدەگەن ەلگە نە ايتارىن بىلمەي اعىباي باتىر ءۇنسىز ۇزاق وتىرادى دا, «كەلىندەردى شاقىر, وتكەندەگى جوقتاۋدى قايتا ايتسىن», دەيدى. كەلىندەر سۇڭقىلداپ جوقتاي جونەلەدى. جانارىن جاس جۋعان قارت باتىر, «بۇل جوقتاۋدى كىم شىعاردى؟» دەپ اعايىندارىنان سۇرايدى. كوپشىلىك «بۇل جوقتاۋدى ايەكەمە ارناپ قىپشاق بۇداباي اقىن جازىپ بەردى», دەيدى. سوندا اعىباي باتىر: «پاي-پاي, ايەكەمدى ءبىر قىپشاق ولتىرسە, ەكىنشى قىپشاق تىرىلتكەن ەكەن, داۋ وسىمەن ءبىتسىن, ەكى رۋلى ەل بۇدان بىلاي بايىرعى قۇداندالىعىن جاڭعىرتىپ, تاتۋ ءومىر ءسۇرسىن», دەپ ءبىر-اق كەسىپتى.
اعىبايدىڭ ايتقانى – شۇبىرتپالىلار ءۇشىن زاڭ. قايران ەر قىپشاق پەن شۇبىرتپالى اراسىندا ۋشىعىپ كەتكەلى تۇرعان داۋدى وسىلاي باسىپتى. ارينە قانداس باۋىرىنىڭ قازاسى قانشا جانىنا باتسا دا, كەيىنگى ەل بىرلىگى ودان دا قىمبات ەكەنىن اڭعارعان قارت باتىر وسىلاي ۇكىم ەتىپتى.
بەكەن قايرات ۇلى, «ەگەمەن قازاقستان»