ءبىر حالىقتى ەكىگە جارىپ, اعايىندى ءبىر-بىرىنە قارسى قويعان عالامدىق ساياسات, ەكى ءتۇرلى ساياسي جۇيە كورەي حالقىن ءالى دە ءبىر-بىرىنە جات قىلىپ وتىر. جاقىنداتۋ تۇگىلى كەيدە ءبىر-بىرىنە دەگەن جاۋلىق نيەتتەرىن دە جاريالاپ, بىتىسپەيتىن كوزقاراستا ەكەندىكتەرىن ءبىلدىرىپ قويادى.
بىراق جۋىردا ەكى ەل اراسىنداعى سەڭ ازداپ قوزعالعانداي بولدى. 2015 جىلدىڭ جەلتوقسان ايىندا ەكى ەل اراسىندا تۋعان شەكارالىق كيكىلجىڭنەن كەيىن قانداي دا ءبىر كەلىسسوزدەر توقتاعان ەدى. سودان بەرى ۇزىلگەن قاتىناستار جۋىردا جالعاسىن تاۋىپ, كحدر مەن كورەي رەسپۋبليكاسىنىڭ دەلەگاتسيالارى شەكارالىق پحانمۋندج دەرەۆنياسىندا كەلىسسوز ۇستەلىنە وتىرعاندىعىن حالىقارالىق اگەنتتىكتەر حابارلادى. بۇل دەرەۆنيا ءبىر ەلدى قاق جارعان 38-ءشى پاراللەل وتەتىن دەماركاتسيالىق سىزىقتىڭ بويىندا ورنالاسقان. وسى ەلدى مەكەندە وتكەن عاسىردىڭ 50-جىلدارىنىڭ باسىنداعى ەكى ەلدىڭ اراسىنداعى سوعىستى اياقتاۋ باعىتىندا 1953 جىلى بەيبىت كەلىسىمگە قول قويىلعان بولاتىن.
مينيسترلىكتەر دەڭگەيىندە ءار جاقتان ءۇش ادامنان قاتىسقان وسى جولعى كەلىسسوزدەردە كحدر دەلەگاتسياسىن «كورەيانى بەيبىت جولمەن بىرىكتىرۋ» كوميتەتىنىڭ توراعاسى ري سون گۆون, ال وڭتۇستىك كورەيا دەلەگاتسياسىن بىرىكتىرۋ ءمينيسترى چو مەن گەن باسقارىپ كەلدى. كەلىسسوزدەر بارىسىندا قارالعان ماسەلەنىڭ ۇلكەنى – وڭتۇستىك كورەيادا بولاتىن قىسقى وليمپيادا ويىندارىنا سولتۇستىك كورەيا سپورتشىلارىن جىبەرۋ ماسەلەسى. وسىعان دەيىن كورەيا رەسپۋبليكاسىندا وتەتىن وليمپيادالىق ويىندارعا وڭ قاباق تانىتپاي كەلگەن سولتۇستىككورەيالىقتار ەندى قانداستارىنىڭ ەلىندەگى ۇلى جيىنعا قولداۋ بىلدىرۋگە سىڭاي تانىتىپ وتىر. بۇل ەكى ەلدىڭ اراسىندا جىلىلىق ۇشقىنى پايدا بولعانىن كورسەتتى. ءوز تاراپىنان سەۋل دە بۇل قادامدى قۇپتاپ, ەكى كورەيا مەملەكەتىنىڭ وليمپيادا شەرۋىندە قاتار شىعۋىن ۇسىندى.
كحدر-ءدىڭ اراقاتىناستى جۇمسارتۋى پرەزيدەنت كيم چەن ىننىڭ تەلەديدار ارقىلى حالىققا ارناعان جاڭاجىلدىق سوزىندە بەلگىلى بولدى. ول «كورەي تۇبەگىندە بەيبىت جاعداي ورناتۋ ءۇشىن اسكەري شيەلەنىستى باسەڭدەتۋگە دايىن ەكەنىن» جاريالادى. سونىمەن بىرگە ول وتكەندى ۇمىتۋ قاجەتتىگىن دە اتاپ وتكەن. جاڭالىق ەكى مەملەكەتتەگى كورەي حالقىنىڭ مۇددەسىنە ساي بولعاندىقتان, ول حالىق اراسىندا قۋانىش وتىن جارق ەتكىزگەن. سونىمەن بىرگە كيم چەن ىن جاڭا جىلدىڭ 7 قاڭتارىندا وڭتۇستىك كورەيامەن اراداعى قاتىناستى جاقسارتۋ شارالارىنا كىرىسۋ قاجەتتىگى تۋرالى مالىمدەمەنى دە جاساپ ۇلگەردى. مىنا كەزدەسۋ سول سوزدەردىڭ جالعاسى ىسپەتتەس بولىپ وتىر.
كەلىسسوزدەر بارىسىندا قارالعان كەلەسى كەلەلى ماسەلە – وتكەن عاسىردىڭ 50-جىلدارىنىڭ باسىندا ەكى مەملەكەت اراسىندا بولعان سوعىستىڭ سالدارىنان ءبولىنىپ قالعان وتباسىلاردى قوسۋ. بۇل ماسەلەلەردى شەشۋ ءۇشىن ەكى جاق قورعانىس مينيسترلىكتەرىنىڭ دەڭگەيىندە كەلىسسوزدەر باستاۋ كەرەكتىگىنە كەلىسكەن. كەلىسسوزدەردىڭ العاشقى راۋندى 45 مينۋتتا اياقتالعان. الايدا ونىڭ ەكىنشى راۋندى قاشان جالعاساتىنى بەلگىسىز. بىراق حالىقارالىق بەيبىتسۇيگىش قوعامداستىق سەڭنىڭ قوزعالا باستاعانىنا قۋانىش بىلدىرۋدە. 70 ملن حالىقتى سەرگەلدەڭگە سالىپ قويعان ساياساتتى قوزدىرۋشىلار دا جوق ەمەس ەكەنى ايقىن. ەكونوميكالىق تۇرعىدان ۇتىس تابۋدى جانە وسى ايماقتاعى ىقپالىن گەوساياسي تۇرعىدان ارتتىرۋدى عانا كوزدەيتىن وندايلارعا ءبىر حالىقتىڭ ەكىگە جارىلىپ تۇرعانى پايدالى.
ەسكە سالا كەتەتىن بولساق, كحدر مەن كورەيا رەسپۋبليكاسىنىڭ اراسىنداعى تەكەتىرەس 2012 جىلدىڭ سوڭىنا قاراي قاتتى ورشىگەن. سول جىلى سولتۇستىك كورەيا ءوزىنىڭ العاشقى بالليستيكالىق زىمىرانىن سىناقتان وتكىزدى. پحەنيان ونى ءوز جەر سەرىگىمىزدى ۇشىرۋ ءۇشىن سىنالدى دەسە دە كورەي رەسپۋبليكاسى قاۋىپسىزدىگىمىزگە نۇقسان كەلۋدە, بۇل يادرولىق زاريادتى الىسقا اپارا الاتىن زىمىران دەپ قاتتى الاڭداعان. سودان ءتۇرلى قىسىمدار جاسالىپ, اسكەري ويىندار وتكىزىلىپ, وڭتۇستىك پەن ونىڭ جاقتاستارى بۇلشىق ەتتەرىن بىلەپ باققان. ءتىپتى شەكارالىق ايماققا دىبىس كۇشەيتكىش ورناتىلىپ, ودان پحەنيانعا قارسى ۇگىت-ناسيحاتتار دا ايتىلىپ تۇردى. ونى توقتاتۋدى تالاپ ەتكەن پحەنيان اقىرى ارتيللەريادان بىرنەشە دۇركىن وق اتۋعا دەيىن باردى. جاۋاپ رەتىندە سەۋل جاقتان دا بىرنەشە زىمىران اتىلعان. وسىدان ءارى سولتۇستىك كورەيا بۇۇ قارارلارىنا دا قۇلاق اسپاي, يادرولىق قارۋعا قول جەتكىزۋ باعىتىنداعى ماقساتىن ىسكە اسىرا بەرىپ, اقىرى يادرولىق قارۋى بار ەلدىڭ قاتارىنا جەتتى. ناسيحاتتىق شابۋىلدار بۇكىل الەمدى تۇرشىكتىرىپ جاتقانىمەن يادرولىق قارۋى بار ەل بولعان سوڭ ەشكىم دە پحەنيانعا يراك سەكىلدى باسىپ كىرە المادى.
سول كيكىلجىڭنىڭ ءبارى بۇگىن ەكى كورەي مەملەكەتىنىڭ ءوزارا ورتاق ءتىل تابىسقانىنا ۇلاسسا, وعان بەيبىتسۇيگىش الەم قۋانباسا قايعىرمايدى. سونىڭ ىشىندە قازاقستان سىرتقى ىستەر مينيسترلىگى دە كەلىسسوزدەردى قۇپتايتىنىن ايتىپ, «ەكى ەلدىڭ ەكىجاقتى قارىم-قاتىناستاردى جاقسارتۋ ءۇشىن كۇش سالۋىن جوعارى باعالايتىنىن» مالىمدەدى.
جاقسىباي سامرات, «ەگەمەن قازاقستان»