ەلباسى «تاۋەلسىزدىك ءداۋىرى» اتتى تاريحي ەڭبەگىندە «بۇل كىتاپ مەنىڭ ۇلى قولداۋشىم, كەمەل كەلەشەگىنە ءوزىنىڭ قازاقستاندىق جولىمەن قارىشتاعان جاسامپاز حالقىما ارنالادى!» دەپ ايرىقشا اتاپ ءوتۋى بەكەر ەمەس. ويتكەنى ءاربىر وقىرماننىڭ قولىنا جاڭا قازاقستاننىڭ قالىپتاسۋ ساتىلارىنىڭ تاريحي سيپاتتاماسى, تاۋەلسىزدىكتىڭ العاشقى ونجىلدىعىنداعى مەملەكەتىمىزدىڭ قالىپتاسۋى ءۇشىن ەلباسىنىڭ ىشكى جانە سىرتقى عالامدىق سىن-قاتەرلەرگە جاۋاپ رەتىندە ماڭىزدى شەشىمدەردى قابىلداۋداعى ىشكى قيسىن مەن تەتىكتەردىڭ مۇقيات تالداۋى قامتىلعان ساياسي, ەكونوميكالىق جانە تاريحي ماڭىزى زور ەڭبەك ءتيدى. سونىمەن قاتار رەسپۋبليكاداعى بولعان وقيعالار مەن قازاقستاندىق دامۋ ۇلگىسىنىڭ قالىپتاسۋى تۋرالى شىنايى فاكتىلەردى سول وقيعالاردىڭ قايناعان ورتاسىندا بولعان اۆتوردىڭ ءوزى ۇسىنۋى تۇرعىسىنان العاندا دا كىتاپتىڭ ايرىقشا قۇندى رۋحاني دۇنيە ەكەنىن تۇسىنەسىز. كىتاپتا اقيقات ۋاقيعالار مەن تاريحي جاعدايلار, شىنايى فاكتىلەر, جانە ەڭ باستىسى, ەلىمىزدىڭ كۇندەلىكتى ومىرىنەن الىنعان كەيىپكەرلەر – قازاقستان حالقى مەن تۇڭعىش پرەزيدەنتى تۇر.
ەلباسى كىتابى 4 بولىمنەن تۇرادى: «مەملەكەتىمىزدىڭ دۇنيەگە كەلۋى. قازاقستاننىڭ ءبىرىنشى جاڭعىرۋى (1991-1995 جىلدار)», « ۇلى بەتبۇرىس. قازاقستاننىڭ ەكىنشى جاڭعىرۋىنىڭ باستالۋى (1996-1999 جىلدار)», «قياعا قۇلاش سەرمەۋ. قازاقستاننىڭ ەكىنشى جاڭعىرۋى (2000-2010 جىلدار)», «قالىپتاسقان مەملەكەت. قازاقستاننىڭ ءۇشىنشى جاڭعىرۋى (2010 جىلدار)». شىعارمانىڭ عاجايىپتىلىعى سوندا, اۆتور, وقىرمانعا مەملەكەتىمىزدىڭ قارىشتى, قارقىندى دامۋىن كورسەتە وتىرىپ, سونىمەن بىرگە بولعان وقيعالارعا سىني باعام جاسايدى, قابىلدانعان شەشىمدەردىڭ جان-جاقتىلىعىن تەرەڭدەي تالدايدى, حالىقتىڭ مۇددەسى مەن ارمان-مۇراتتارىن ءوز پايىمدارى مەن سەزىم تەبىرەنىستەرى ارقىلى وتكىزەدى, ورىن الىپ جاتقان ۇدەرىستەردى قازاقستاننىڭ گۇلدەنۋى جولىندا ءوزى ايانباي قىزمەت جاساپ كەلە جاتقان كوپ ۇلتتى حالقىنىڭ تۇرعىسىنان ءتۇسىنىپ, قابىلدايدى.
اۆتور وتكەندى ەسكە الىپ, بۇگىندى باعالاي وتىرىپ, وقىرمانعا, جاس ۇرپاققا ەلىمىزدىڭ جارقىن بولاشاعى ۇزاق جىلدار بويى قالىپتاسقان ۇلتتىق داستۇرلەر, تاۋەلسىزدىك پەن ەگەمەندىك, بىرلىك پەن كەلىسىم, بەيبىتشىلىك, توزىمدىلىك پەن اشىقتىق ءتارىزدى عاجايىپ قۇندىلىقتاردى يەلەنىپ, ونى العا قاراي دامىتۋ نەگىزىندە عانا قۇرىلاتىنىن كورسەتەدى. ەلباسى تاۋەلسىزدىك جىلدارىندا دۇنيەگە كەلگەن, ءوز مازمۇنى بويىنشا قازاقستاندىق قۇندىلىقتاردى بىلدىرەتىن ء«بىز ەڭ باستىسى – بەيبىتشىلىكتى ساقتاپ قالدىق»; «سونى لەپتەر مەن داستۇرلەردىڭ قايتا ورلەۋى»; «سىرتقى ساياساتتى قۇرۋ نولدەن باستالدى», «قازاقستان بارىسى» سەكىرىس جاساۋعا دايىندالۋدا»; «جاڭا استانا جاسايمىز!»; «ەكونوميكالىق ساياسات جانە ەكونوميكانىڭ تۇراقتانۋى»; «تاۋەلسىزدىك ءبىزدىڭ رۋحىمىزدى نىعايتتى»; «الەمدىك داعدارىس سىناعىنا ءبىز توتەپ بەرە الدىق»; «بۇرىن-سوڭدى بولماعان زياتكەرلىك رەنەسسانس»; «بارشا الەم مويىنداعان كوشباسشىلىق»; «كوز الدىمىزدا بولىپ جاتقان ۇلى وزگەرىستەر»; «جاڭا ەكونوميكاعا قاراي باتىل ۇمتىلىس», «ادام كاپيتالىنىڭ جاڭا ساپاسى»; «قازاقستاننىڭ باسىم باعىتتارى ايقىن ءارى اينىماس» ءتارىزدى جانە باسقا دا كوپتەگەن ناقتى دا ماعىناسى كەڭ ايشىقتى تەڭەۋلەرىن تالعامپاز وقىرماننىڭ جوعارى باعالايتىنى ءسوزسىز.
ەلباسىمىز تاۋەلسىزدىك جىلدارىندا ءوزىمىز يەلەنگەن جانە ەلىمىزدىڭ ءاربىر ازاماتىنىڭ ماقتانىشى بولىپ تابىلاتىن قازاقستاننىڭ باستى 33 جەتىستىگىنىڭ ءمانىن سيمۆوليكالىق تۇردە جان-جاقتى اشىپ كورسەتكەن: زاماناۋي مىقتى مەملەكەت قۇرۋ; مەملەكەتتىك شەكارانى حالىقارالىق-قۇقىقتىق بەكىتۋ; ەتنوسارالىق جانە كونفەسسياارالىق كەلىسىمنىڭ عاجايىپ ۇلگىسى; سەمەي يادرولىق پوليگونىن جابۋ; نارىقتىق ەكونوميكانى نولدەن باستاپ قالىپتاستىرۋ; ءوز ۆاليۋتامىز – تەڭگە; جاڭا ەلوردامىز – استانانى سالۋ; زاماناۋي قارۋلى كۇشتەردى قۇرۋ; اۋقىمدى يننوۆاتسيالىق يندۋستريالاندىرۋ; الەۋمەتتىك جاڭعىرتۋ; ەقىۇ-عا جانە باسقا بەدەلدى حالىقارالىق ۇيىمدارعا توراعالىق ەتۋ; مەرزىمىنەن بۇرىن جۇزەگە اسىرىلعان «قازاقستان-2030» ستراتەگياسى جانە ەلدىڭ 2050 جىلعا دەيىنگى دامۋ ستراتەگياسى; بەس ينستيتۋتتىق رەفورما; حالىقارالىق ەكسپو-2017 كورمەسى جانە تاعى باسقا. سول ارقىلى, كىتاپ تۇتاستاي العاندا, وسكەلەڭ ۇرپاققا: ء«بىزدىڭ بارشا حالقىمىزدىڭ كۇش جۇمىلدىرۋى ناتيجەسىندە قازىرگى كۇنى بىزدە بەرىك ىرگەتاس جاسالىپ, ءبىز ءوزىمىزدىڭ ورتاق بولاشاعىمىز – قالىپتاسقان مەملەكەتىمىزدى تۇرعىزۋدى جالعاستىرىپ كەلەمىز», دەگەنى ەرتەڭگى كۇنگە ۇلكەن سەنىم بەرەدى.
تاۋەلسىز قازاقستان تاريحىنىڭ بىزگە بەرەتىن اسا ماڭىزدى ساباعى – كەز كەلگەن قولايسىز بەتالىستاردى جەڭۋگە, كەز كەلگەن كەلەڭسىز بولجامداردى جوققا شىعارۋعا جانە ەڭ ءورشىل ءارى بيىك ماقساتتارعا جەتۋگە بولاتىنىمەن تۇجىرىمدالادى. تابىستىڭ كەپىلى – ۇنەمى العا جىلجۋ. ەركىن, پروگرەسسيۆتى ازاماتتار عانا قازاقستاندى جوعارى دامىعان مەملەكەت جاساي الادى. بۇل دەگەنىمىز تەرەڭ ءبىلىم, قاجىرلى ەڭبەك, ءوزىن-ءوزى ۇنەمى جەتىلدىرىپ وتىرۋ ءار ادامنىڭ تىرشىلىك نورماسى بولۋى تيىستىگىن بىلدىرەدى. « ۇلى تاريح ۇلى بولاشاقتى تۋعىزادى», دەپ كورسەتەدى ەلباسى.
ەلباسىمىزدىڭ «تاۋەلسىزدىك ءداۋىرى» اتتى جاڭا كىتابىنىڭ ءاربىر بەتىن پاراقتاي, ءار تاراۋىنا ۇڭىلە وتىرىپ, وندا سيپاتتالعان جاس مەملەكەتىمىزدىڭ ومىرىندەگى ءاربىر وقيعا ءۇشىن ماقتانىش سەزىمى, تاريحي قىسقا ۋاقىتتا قول جەتكىزگەن تابىستار ءۇشىن كەۋدەڭدى ەرەكشە قۋانىش كەرنەيدى. قازاقستان ءوزىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ حالىقارالىق زور بەدەلى مەن كەمەڭگەر ساياساتىنىڭ جانە ونى حالىقتىڭ بارىنشا قولداۋىنىڭ ارقاسىندا جاڭا مازمۇنداعى مەملەكەتتى ورناتۋ جولىندا سىندارلى سىناقتار مەن اسا كۇردەلى كەدەرگىلەردەن ءساتتى وتكەندىگى تۋرالى تەرەڭ سەزىممەن تۇجىرىم جاسايسىڭ.
قىلىشباي بيسەنوۆ,
قورقىت اتا اتىنداعى قمۋ رەكتورىنىڭ مىندەتىن اتقارۋشى, تەحنيكا عىلىمدارىنىڭ دوكتورى, پروفەسسور