يراندا 28 جەلتوقسان كۇنى باستالعان نارازىلىق شەرۋىنەن بارلىعى 10 ادام قازا بولدى. بۇل تۋرالى bbc.com حابارلادى.
يرانداعى جەرگىلىكتى باق جۇرتتىڭ قاي جەردە وپات بولعانى تۋرالى اقپارات تاراتپادى. ال وسىعان دەيىن التى ادامنىڭ يزە قالاسىندا كوز جۇمعانى بەلگىلى بولدى.
شەرۋگە شىققاندار ەل پرەزيدەنتى حاسان ءرۋحانيدىڭ تارتىپكە شاقىرۋىنا دا قۇلاق اسپادى. يران باسشىسى ءوز سوزىندە ازاماتتار بيلىكتى سىنعا الىپ, ويىن ەركىن بىلدىرە الاتىنىن جەتكىزدى. سونداي-اق, ول شەرۋ كەزىندە زورلىق-زومبىلىققا جول بەرىلمەيتىنىن ايتتى. الايدا, ءتارتىپ ساقشىلارى تەگەرانداعى ەنكەلاب الاڭىنان تۇرعىنداردى قۋ ءۇشىن كوزدى جاساۋراتاتىن گاز, سۋاتقىش قولداندى. مۇنداي شەرۋ كەرمانشاح, حوررەماباد, شاحينشەحر جانە زەندجان قالالارىندا ءوتتى.
بيلىك قانداي قادامعا باردى؟
حاسان رۋحاني بيلىك مەملەكەت مۇلكىنە زيان كەلتىرەتىن, قوعامدىق ءتارتىپتى بۇزعان نەمەسە تارتىپسىزدىككە شاقىرعانداردىڭ قىلىعىنا توزبەيتىنىن ەسكەرتتى. ءتارتىپ ساقشىلارى بىرنەشە كۇن ىشىندە 400 ادامدى قاماۋعا الدى. ونىڭ جارتىسى 1 قاڭتارعا قاراعان ءتۇنى تەگەراندا قامالدى.
بيلىك Telegram جانە Instagram جەلىلەرىندەگى حالىقتى نارازىلىققا شاقىردى دەگەن اككاۋنتتاردى بۇعاتتاپ جاتىر.
فرانس-پرەسس اگەنتتىگىنىڭ حابارلاۋىنشا مەملەكەتتىك تەلەارنالار نارازىلىق شەرۋلەرىنەن ۇزىندىلەر كورسەتەدى. ولاردىڭ اراسىندا نەگىزىنەن بانككە شابۋىل جاساعان, يران تۋىن ورتەگەن ساتتەر ءجيى كورسەتىلەدى.
دونالد ترامپ – حاسان رۋحاني
«يرانداعى ءىرى كوتەرىلىستەر. جۇرت اقىرى ويلاندى-اۋ. ولاردىڭ بايلىعى, اقشاسى ۇرلانىپ, تەرروريزمگە جۇمسالىپ جاتىر. حالىق ەندى وعان توزبەيتىن سەكىلدى. اقش ادام قۇقىعىن بۇزۋشىلاردى نازاردا ۇستاپ وتىرادى», دەدى اقش پرەزيدەنتى دونالد ترامپ Twitter جەلىسىندەگى پاراقشاسىندا.
ال وعان جاۋاپ رەتىندە حاسان رۋحاني اقش پرەزيدەنتىن «يراننىڭ جاۋى» دەگەن مالىمدەمە جاسادى.
حالىقتىڭ جاعدايى 15%-عا ناشارلادى
BBC مالىمەتى بويىنشا يران حالقىنىڭ سوڭعى ون جىلدا جاعدايى 15%-عا ناشارلاعان. نارىزىلىق شەۋلەرىنە كوبىنە جاستاردان جينالعان توپتار قاتىسىپ جاتىر. ولار كلەريكالدىق رەجىمدى قۇلاتۋدى تالاپ ەتەدى. سونىمەن قاتار, كەيبىرى مونارحيانى قايتىپ ورناتۋدى تالاپ ەتتى.
اكتسيالار يراننىڭ شاعىن قالالارىنا دا تاراپ كەتتى. الداعى ۋاقىتتا كولەمى ارتۋى مۇمكىن. دەگەنمەن شەرۋشىلەردىڭ اراسىندا ناقتى ءبىر كوشباسشىلارى جوق. ال وپپوزيا باسشىلارى الدەقاشان رەپرەسسياعا ۇشىراعان نەمەسە ەلدەن قۋىلعان.
2009 جىلى نە بولدى؟
2009 جىلى سايلاۋ كەزىندە پرەزيدەنت لاۋازىمىنا ماحمۇد احمادينەجادا وتىرعانى كوپشىلىكتىڭ نارازىلىعىن تۋدىردى. سالدارىنان نارازىلىق اكتسيالارى ءوتىپ, وعان «جاسىل قوزعالىس» دەگەن اتاۋ بەرىلدى. سول تۇستا وپپوزيتسيانى ميلليونداعان ادام قولدادى.
شەرۋ كەزىندە كەمىندە 30 ادام قازا تاۋىپ, مىڭداعان تۇرعىن قاماۋعا الىندى. بۇل يراندا 1979 جىلى يسلام رەۆوليۋتسياسىنان كەيىن تىركەلگەن ەڭ ءىرى شەرۋ بولدى.