الماتى وبلىسىنىڭ ون جاسار تۇرعىنى جىبەك ق ۇلىمبەت دجيۋ-دجيتسۋ سپورتىمەن اينالىسىپ, تالاي جارىستاردا توپ جارىپ جۇرگەن وقۋشى. جىبەك سياقتى جەڭىمپاز قىزدارىمىز كوپ قوي, ونىڭ قانداي ارتىقشىلىعى بار دەسەڭىز جوعارىداعى سۋرەتكە قاراڭىز. جىبەك قىزداردى بىلاي قويىپ, ەر بالالار اراسىندا وتەتىن تالاي جارىستاردا جىگىتتەرگە جۇلدە بەرمەي جۇرگەن جەڭىمپاز قىز.
كىشكەنتايىنان جانىنا سپورتتى سەرىك ەتكەن جىبەك «ساعادات باتىر» سپورت كلۋبىندا جاتتىعۋ جاسايدى. بيىل عانا الماتىدا وتكەن وزبەكستان, قىرعىزستان, تاجىكستان, رەسەي, برازيليا ەلدەرىنىڭ سپورتشىلارى باس قوسقان حالىقارالىق تۋرنيردە ەر بالالار اراسىندا 27 كگ سالماق دارەجەسىندە جەڭىمپاز اتانعان ول تالايدى تاڭداي قاقتىردى. اسىرەسە, اقتىق سىندا تاجىكستاننىڭ بىرنەشە دۇركىن چەمپيونى مادسۋردجان سابۋروۆتى ايقىن باسىمدىلىقپەن جەڭگەنىن جاتتىقتىرۋشىلارى مەن دوستارى ءالى كۇنگە دەيىن ماقتانىشپەن ايتىپ ءجۇر. باپكەرىنىڭ ايتۋىنشا, اتالعان تۋرنيردە وسى سالماق بويىنشا قىزدار بولماعاندىقتان, ۇيىمداستىرۋشىلار القاسى جىبەكتىڭ ەر بالالار اراسىندا باق سىناۋىن ۇيعارعان.
«جىبەكتىڭ سپورتتىق مۇمكىندىگىنە قاراپ, ءبىز رۇقساتىمىزدى بەردىك. كەي جاعدايلاردا بۇل سپورتتىڭ ەرەجەسىنە سايكەس 10-12 جاسار جاسوسپىرىمدەردى ۇل-قىز دەپ جىكتەپ جاتپايدى. ءتىپتى الەم چەمپيوناتتارىنىڭ وزىندە وسى جاس ارالىعىنداعى سپورتشىلار جىنىسىنا قاراماي سالماعى ساي كەلسە بەلدەسە بەرەدى. بۇل جارىستا عانا ەمەس, ەلىمىزدە وتكەن تالاي تۋرنيردە جىبەك ءدال وسىلاي جەڭىمپاز اتانىپ ءجۇر. جىبەكتىڭ سپورتقا قىزىعۋشىلىعى, فيزيكالىق مۇمكىندىگى قاتارلاستارىنان الدەقايدا جوعارى. وسى قارقىنمەن جالعاستىرا بەرسە, جىبەكتىڭ بولاشاعىنان مول ءۇمىت كۇتۋگە بولادى», دەيدى جاتتىقتىرۋشىسى نۇرسۇلتان ورىنباساروۆ.
جىبەك سپورتتا عانا ەمەس, وقۋدا دا ۇزدىكتەر قاتارىندا. اناسى قۇلپىناي ق ۇلىمبەتوۆا قىزىنىڭ كىشكەنتايىنان زەرەك بولىپ وسكەنىن جانە سپورتپەن اينالىسقالى بەرى كوپ جەتىستىكتەرگە قول جەتكىزگەنىن ايتادى. بىزدە ءوز تاراپىمىزدان تالانتتى قىزعا تابىس تىلەدىك. بالكىم, بولاشاقتا ۇلكەن دودالاردا كوك تۋىمىزدى كوكتە جەلبىرەتىپ, ءانۇرانىمىزدى الەمگە تىڭداتاتىن سپورتشىلارىمىزدىڭ ءبىرى وسى قارشاداي قىز شىعار؟ جەڭىستەرىڭ كوپ بولسىن, جىبەك!
ارمان وكتيابر,
«ەگەمەن قازاقستان»
الماتى