مەملەكەت باسشىسىنىڭ تاپسىرمالارىن ورىنداۋ بارىسىندا قارجى پوليتسياسى ورگاندارى سىبايلاس جەمقورلىققا قارسى تۇرۋ, كىشى جانە ورتا كاسىپكەرلىك سۋبەكتىلەرىنەن جۇيەلى تۇردە پارا بوپسالاۋ دەرەكتەرىن انىقتاۋ جانە ونىڭ جولىن كەسۋدى جەدەل-تەرگەۋ قىزمەتىنىڭ باسىم باعىتتارى رەتىندە بەلگىلەگەن ەدى. وسىعان وراي ولار ەلىمىزدىڭ بارلىق ايماقتارىندا باقىلاۋشى ورگاندار تاراپىنان بيزنەس ىستەرىنە زاڭسىز ارالاسۋ دەرەكتەرىن انىقتادى.
شىعىس قازاقستاندا وبلىستىق ساۋلەت-قۇرىلىس باقىلاۋ باسقارماسىنىڭ لاۋازىمدى تۇلعالارى مەن قىزمەتكەرلەرى تاراپىنان كاسىپكەرلەرگە قۇرىلىس-مونتاج جۇمىستارىنا مەملەكەتتىك ليتسەنزيا بەرۋ جانە بۇرىن بەرىلگەن ليتسەنزيالاردىڭ مەرزىمىن ۇزارتۋ ءۇشىن ولاردان جۇيەلى تۇردە پارا تالاپ ەتكەن فاكتىلەرى اشىلدى. وبلىستىق قارجى پوليتسياسى دەپارتامەنتىنە ساۋلەت-قۇرىلىس باسقارماسىنىڭ لاۋازىمدى تۇلعالارى قۇرىلىس-مونتاج جۇمىستارىنا ليتسەنزيانىڭ مەرزىمىن ۇزارتۋ ءۇشىن 75 مىڭ تەڭگە كولەمىندە پارا بوپسالاپ وتىر دەگەن ارىزبەن كاسىپكەر جۇگىندى. ءجۇزەگە اسىرىلعان شارالار ءناتيجەسىندە اتالعان فاكت راستالدى, وعان قوسا, وسى مەكەمەدەگى پارا الۋدىڭ باسقا دا دالەلدەرى انىقتالدى. ولار جۇيەلى تۇردە بولىپ تۇرادى ەكەن.
ودان ءارى جۇرگىزىلگەن جەدەل-ىزدەستىرۋ شارالارى بارىسىندا, قۇرىلىس-مونتاج جۇمىستارىنا ليتسەنزيانى بەرۋ ءۇشىن 150 مىڭ تەڭگە پارا الدى دەگەن كۇدىكپەن ليتسەنزيالاۋ ءبولىمىنىڭ باستىعى راقىشەۆ پەن وسى ءبولىمنىڭ باس مامانى دۋسۋپوۆ ۇستالدى, اعىمداعى جىلعى 13 قازاندا ولارعا قاتىستى قىلمىستىق ىستەر قوزعالدى. ال 16 قازاندا ولار سوت سانكتسياسىمەن قاماۋعا الىندى.
ودان ءارى جۇرگىزىلگەن جەدەل-ىزدەستىرۋ شارالارىمەن شىعىس قازاقستان وبلىسىنىڭ ساۋلەت-قۇرىلىس باقىلاۋ باسقارماسى باستىعىنىڭ ورىنباسارى مۇكەەۆتىڭ قۇرىلىس-مونتاج جۇمىستارىنىڭ ليتسەنزيالارىن بەرۋ جانە ونىڭ مەرزىمىن ۇزارتۋ ءۇشىن جالپى كولەمى 300 مىڭ تەڭگە پارا الۋ دەرەگى دە انىقتالدى. 4 قاراشادا ءمۇكەەۆ ۇستالدى, وعان قاتىستى بىرنەشە رەت پارا الۋ فاكتىسى بويىنشا قىلمىستىق ءىس قوزعالدى. 6 قاراشادا سوت سانكتسياسىمەن ول قاماۋعا الىندى. ايىپتالۋشىلاردىڭ وزگە دە پارا الۋ ءىسى تەكسەرىلۋدە.
سونىمەن بىرگە, 2011 جىلعى 24 قازاندا ساۋلەت-قۇرىلىس باقىلاۋ باسقارماسىنىڭ ليتسەنزيالاۋ ءبولىمىنىڭ باس مامانى شەريازدانوۆاعا قاتىستى پاراقورلىققا دەلدال بولۋ ارەكەتى بويىنشا قىلمىستىق ءىس قوزعالدى, ناقتى ايتقاندا, وعان ليتسەنزيالاۋ ءبولىمىنىڭ باستىعى راقىشەۆتىڭ 500 اقش دوللارى كولەمىندە پارا الۋى كەزىندە دەلدال بولدى دەگەن ايىپ تاعىلىپ وتىر. شەريازدانوۆاعا قاتىستى ەشقايدا كەتپەۋ ءۇشىن قولحات الۋ ءتۇرىندەگى بۇلتارتپاۋ شاراسى تاڭدالدى. قىلمىستىق ىستەر تەرگەلۋدە.
جالپى, 2011 جىلعى 10 ايدا قارجى پوليتسياسى ورگاندارىمەن پاراقورلىق دەرەكتەرى بويىنشا 470 قىلمىستىق ءىس قوزعالدى, ونىڭ 331-ءى پارا الۋ, 101 – پارا بەرۋ, 38 – پاراقورلىققا دەلدال بولۋ دەپ حابارلادى ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ ءباسپاسوز قىزمەتى.
«ەگەمەن-اقپارات».