ن.پوگودين اتىنداعى وبلىستىق ورىس دراما تەاترىندا وبلىس اكىمى س. ءبىلالوۆتىڭ باستاماسىمەن “قازاق ەلى, ءبىر اۋىز ءسوزىم ساعان!” اتتى ءبىرىنشى رەسپۋبليكالىق ونەر فەستيۆالى ۇيىمداستىرىلدى. مادەني شارا تاۋەلسىزدىكتىڭ 20 جىلدىعىنا وراي ءوتىپ, التى الاشتىڭ اقيىق اقىنى ماعجاننىڭ رۋحىنا ارنالدى. ءان مەن جىر كەشىنە ەلىمىزدىڭ ءار قيىرىنان كوپتەگەن ۇمىتكەرلەر قاتىسىپ, جازبا اقىنداردىڭ ماعجانعا ارنالعان ءمۇشايراسى, ماعجان ولەڭدەرىن مانەرلەپ وقۋ, ماعجان ولەڭدەرىنە جازىلعان جاڭا اندەر اتالىمدارى بويىنشا باق سىناستى.
فەستيۆالدىڭ اشىلۋ سالتاناتىندا ءسوز سويلەگەن سەرىك ءبىلالوۆ تاۋەلسىزدىگىمىزدىڭ 20 جىلدىعى قارساڭىندا مۇنداي شارانىڭ ۇلى اقىننىڭ كىندىك كەسكەن جەرىندە ءوتۋى سولتۇستىكقازاقستاندىقتار ءۇشىن ۇلكەن مارتەبە ەكەنىن ايتا كەلىپ, اقىن شىعارماشىلىعىن زەرتتەۋگە سۇبەلى ۇلەس قوسىپ كەلە جاتقان وبلىستىڭ قۇرمەتتى ازاماتى ءمۇتاللاپ قانعوجينگە جەڭىل كولىكتىڭ كىلتىن تارتۋ ەتتى. ءسابيت مۇقانوۆ اتىنداعى وبلىستىق عىلىمي امبەباپ كىتاپحانا ۇجىمى العىس حاتقا يە بولدى. قۇرامىندا قازاقستاننىڭ ەڭبەك ەرى, حالىق جازۋشىسى ءابىش كەكىلباەۆ, “ەگەمەن قازاقستان” رەسپۋبليكالىق گازەتى” اق ۆيتسە-پرەزيدەنت – باس رەداكتورى جانبولات اۋپباەۆ, پارلامەنت ءماجىلىسىنىڭ دەپۋتاتى جاراسباي سۇلەيمەنوۆ, جامبىل اتىنداعى قازاق مەملەكەتتىك فيلارمونياسىنىڭ باس ديرەكتورى, قازاقستاننىڭ ەڭبەك سىڭىرگەن ءارتىسى مۇحتار وتەۋوۆ, تاعى باسقا بەلگىلى ازاماتتاردان تۇراتىن قازىلار القاسى جازبا اقىنداردىڭ ماعجانعا ارنالعان ءمۇشايراسىندا الماتى قالاسىنان كەلگەن جاركەن بودەش ۇلىن ءبىرىنشى جۇلدەگە لايىق دەپ تاپتى. ماعجان ولەڭدەرىنە جازىلعان اندەر بايقاۋىندا بەلگىلى سازگەر جولامان تۇرسىنباەۆتىڭ شوقتىعى بيىك بولدى. ماعجان ولەڭدەرىن مانەرلەپ وقۋدا استانالىق گاۋھار ءجۇسىپوۆا الدىنا جان سالمادى. فەستيۆال جەڭىمپازدارى مەن جۇلدەگەرلەرى ارناۋلى ديپلومدارمەن جانە باعالى سىيلىقتارمەن ماراپاتتالدى.
ءومىر ەسقالي.
سولتۇستىك قازاقستان وبلىسى.