جەڭ ۇشىنان جالعاسىپ, جالماۋىزداي جالماپ جاتقان جەمقورلاردى جويۋ وڭايعا سوقپاي تۇر. ەلىمىزدىڭ بايلىعى ۇستاعاننىڭ قولىندا, تىستەگەننىڭ اۋزىندا كەتپەس ءۇشىن قازىر سىبايلاس جەمقورلىققا قارسى كۇرەس جاندانا باستادى. سونىڭ ءبىرى رەتىندە «نۇر وتان» حدپ استانا قالالىق فيليالى جەمقورلىققا قارسى ناعىز فورۋم جاريالادى.
كەشە وسى فورۋمنىڭ باستالعانى تۋرالى اتالعان فيليالدىڭ باستاماسىمەن مەملەكەتتىك جانە ۇكىمەتتىك ەمەس ۇيىم وكىلدەرىنىڭ باسقوسۋىمەن العاشقى القالى جيىن بولىپ ءوتتى. وندا سىبايلاس جەمقورلىققا بىرىگىپ قارسى تۇرۋ ماقساتىندا مەملەكەتتىك ورگانداردىڭ, قوعامدىق ازاماتتىق ينستيتۋتتاردىڭ جانە بۇقارالىق اقپارات قۇرالدارىنىڭ ءرولى مەن ماڭىزى قارالدى. اسىرەسە ەلىمىزدىڭ نەگىزگى بەلسەندى كۇشتەرىمەن «نۇر وتان» حدپ باستاماسى بويىنشا سىبايلاس جەمقورلىققا قارسى تۇراتىن قوعامدىق قوزعالىس قۇرۋ جونىندەگى مەموراندۋمدى قولداۋ ماسەلەسىنە ەرەكشە نازار اۋدارىلدى.
بۇگىنگى تاڭدا «نۇر وتان» حدپ استانا قالالىق فيليالى جەمقورلىققا قارسى قوعامدىق كەڭەس قۇرىپ, قۇقىق قورعاۋ ورگاندارىمەن بىرگە بەلسەندى تۇردە جۇمىس اتقارۋدا. ءبىز قاشاندا الدىن الۋ شارالارىنا, ءتۇرلى كوميسسيالار, قوعامدىق كەڭەستەر قۇرۋعا باسا نازار اۋدارامىز. قازىر ءبىزدىڭ قالامىزدىڭ بارلىق سالالارىندا پارتيالىق باقىلاۋ پوستىلارى قۇرىلعان. بۇل كەسەلگە ءبىرتۇتاس قوعام بولىپ جالپىحالىقتىق كۇرەسۋدى قولدايمىز, دەيدى «نۇر وتان» حدپ اقف توراعاسىنىڭ ءبىرىنشى ورىنباسارى ءامىرحان راقىمجانوۆ.
«نۇر وتان» حدپ استانا قالالىق فيليالى باستاماسىمەن سىبايلاس جەمقورلىققا قارسى فورۋم قاتىسۋشىلارى ۇندەۋ جاريالادى. وندا قاتىسۋشىلار استانا قالالىق فيليالىنىڭ جەمقورلىققا قارسى كۇرەستە مەملەكەتتىك جانە قوعامدىق ۇيىمداردىڭ ءىس-ارەكەتتەرىن ءتيىمدى ۇيلەستىرۋىن ۇسىنۋ يدەياسىن قولدايتىندىعىن ءبىلدىردى.
الەكساندر تاسبولاتوۆ.