ەلباسى نۇرسۇلتان نازارباەۆتىڭ «100 مەكتەپ, 100 اۋرۋحانا» باعدارلاماسى بويىنشا سالىنعان 200 ورىندىق وبلىستىق كەڭ بەيىندى بالالار كلينيكالىق اۋرۋحاناسى حالىقتىڭ يگىلىگىنە قىزمەت ەتۋدە. مۇنداي وسى زامانعى مەديتسينالىق قوندىرعىلارمەن جابدىقتالعان, الۋان ءتۇرلى وپەراتسيالاردى جۇزەگە اسىرۋعا مۇمكىندىك بەرەتىن, شەتەلدىك اپپاراتتارمەن جاراقتاندىرىلعان, بارلىق جاعداي جاسالعان بىرەگەي اۋرۋحانا ەلىمىزدىڭ باتىس ءوڭىرىندەگى بىردەن-ءبىر ەمدەۋ ورنى.
وبلىس ورتالىعىنىڭ قارقىندى دامىپ كەلە جاتقان اۋدانىنا ورنالاسقان نىساننىڭ قۇنى بيۋدجەتكە 5570 ملن. تەڭگەگە ءتۇستى. ءتورت قاباتتى اۋرۋحانانىڭ باس كورپۋسى 25744 شارشى مەتردى الىپ جاتىر. اۋرۋحانا ءتورت بلوكتان تۇرادى. ءبىرىنشى بلوكتا ستەريزاتسيالاۋ, گەماتولوگيا, كارديولوگيا, پۋلمانولوگيا, اللەرگولوگيا, نەيروجاراقات, ەمدەۋ-دياگنوستيكالىق, ەكىنشى بلوكتا جان ساقتاۋ, فۋنكتسيونالدىق دياگنوستيكا جانە باكتەريالىق زەرتحانا, ال ءۇشىنشى بلوكتا ساۋلەلىك دياگنوستيكا, ەندوكرينولوگيا, نەفرولوگيا, ۋرولوگيا, جالپى حيرۋرگيا جانە وپەراتسيالىق بولىمشەلەر ورنالاسقان.
مۇندا بارلىق اۋرۋلاردى ەمدەۋدىڭ ءمۇمكىندىگى مول. بولىمدەر ءبىزدىڭ ەلىمىزدە تەڭدەسى جوق قوندىرعىلارمەن جابدىقتالعان. اۋرۋحانادا اقش-تىڭ «General Electric» فيرماسىنىڭ 64 كەسىندى (سرەز) كومپيۋتەرلىك توموگرافى ورناتىلعان. سونداي-اق, جاپونيانىڭ «Medical Systems» ماگنيتتىك-يادرولىق رەزونانستىق توموگرافى جۇمىس ىستەيدى. مۇنداي بىرەگەي قوندىرعى وبلىستا ەكەۋ عانا, ال ءبىرىنشىسى ەرەسەكتەر ءۇشىن قىزمەت كورسەتەدى. ۋرولوگيالىق اۋرۋلارعا وپەراتسيا جاسايتىن جانە جاڭا تۋعان بالالار ءۇشىن بەينەەندوسكوپيالىق كەشەندەرمەن جاراقتاندىرىلعان. بۇل قوندىرعى بالالارعا نەيروحيرۋرگيالىق وپەراتسيا جاساۋعا مۇمكىندىك بەرەدى. مۇندا ەكى باسسەين جانە بالشىقپەن-سۋمەن ەمدەيتىن ورىن بار. مەديتسينالىق گازبەن قامتاماسىز ەتۋ جۇيەسىنىڭ, مەديتسينالىق قوندىرعىلارعا قىزمەت كورسەتەتىن ينجەنەر-تەحنيكتەر, سونداي-اق نەيروحيرۋرگ پەن لور دارىگەر كاسىبي دايارلىقتان وتكەن. اۋرۋحانا دارىگەرلەرمەن جانە مەدبيكەلەرمەن تولىق قامتاماسىز ەتىلگەن. مەديتسينالىق گاز ءار كەرەۋەتكە تىكەلەي جەتكىزىلگەن, كيسلورود, كومىرقىشقىل گازى, سىعىمدالعان اۋا بەرۋ جۇيەسى جۇمىس ىستەيدى. وپەراتسيالىق جانە جاراقاتتى تاڭۋ بولىمدەرىنە تازارتىلعان اۋا قىسىممەن بەرىلەدى.
وسىنداي بىرەگەي اۋرۋحانا تەك ءوڭىر بالالارىن عانا ەمدەپ قويمايدى, كورشىلەس وبلىستاردىڭ دەنساۋلىعى ناشار ءبۇلدىرشىندەرىن دە قابىلداۋدا. سىرقات بالالار وسىنداي بىرەگەي اۋرۋحانانىڭ يگىلىگىن كورىپ, اۋرۋلارىنا شيپا تابۋدا.
ساتىبالدى ءساۋىرباي.
اقتوبە وبلىسى.