الماتىداعى قازاق ۇلتتىق اگرارلىق ۋنيۆەرسيتەتىندە «ەلباسى كىتاپحاناسى» ورتالىعى اشىلدى. وقۋ ورنىنداعى ارنايى كىتاپحانا قازاقستان رەسپۋبليكاسى تۇڭعىش پرەزيدەنتى كۇنى جانە تاۋەلسىزدىك كۇنى مەرەكەلەرىنە وراي جاساقتالىپ وتىر.
الماتى قالاسى بويىنشا قر تۇڭعىش پرەزيدەنتى – ەلباسى كىتاپحاناسىنىڭ ۇيىمداستارۋىمەن «ن.نازارباەۆ: ءداۋىر, تۇلعا, قوعام» كوشپەلى كورمە جوباسى ءوتىپ جاتقانى بەلگىلى. شارانىڭ ماقساتى مەملەكەت باسشىسىنىڭ يدەيالارى مەن باستامالارىن ناسيحاتتاۋ جانە ىلگەرىلەتۋ, سونىمەن قاتار حالىقتىڭ مادەني كودىن ساقتاۋدا جانە قازاقستاندىق جاڭا بۋىننىڭ ساناسىن قالىپتاستىرۋداعى ستۋدەنت جاستاردىڭ ءرولىن زەرتتەۋ بولىپ تابىلادى. ۋنيۆەرسيتتەگى «ەلباسى كىتاپحاناسى» ورتالىعىنىڭ اشىلۋىنا ارنايى كەلگەن قازاقستان رەسپۋبليكاسىنىڭ تۇڭعىش پرەزيدەنتى - ەلباسى كىتاپحاناسى ديرەكتورىنىڭ ورىنباسارى, ساياسي عىلىمدارىنىڭ دوكتورى, پروفەسسور ءامىرحان راحىمجانوۆ: ء«بىز 10 قاراشادان بەرى الماتى قالاسىندا «ن.نازارباەۆ: ءداۋىر, تۇلعا, قوعام» اتتى كوشپەلى كورمە جوباسىن وتكىزىپ كەلەمىز. اتالعان اۋقىمدى جوبانىڭ ءۇش كۇنگە سوزىلعان ءبىر باعىتى قازاق ۇلتتىق اگرارلىق ۋنيۆەرسيتەتىندە جالعاسۋدا. بۇگىنگى اشىلىپ وتىرعان ورتالىق سونىڭ جەمىسى. بۇل كىتاپحانا وقۋ ورنىنىڭ ستۋدەنتتەرى مەن وقىتۋشىلارىنا عانا ەمەس, كوپشىلىك قاۋىمعا قىزمەت ەتەتىن بولادى», -دەدى.
ال قازاق ۇلتتىق اگرارلىق ۋنيۆەرسيتەتىنىڭ رەكتورى, ەكونوميكا عىلىمدارىنىڭ دوكتورى, ۇعا اكادەميگى تىلەكتەس ەسپولوۆ وقۋ ورنىنداعى ءىس-شارا تۋرالى ايتا كەلىپ: «استاناداعى ەلباسى كىتاپحاناسىنان پرەزيدەنتىمىزدىڭ 500 كىتابىن الدىق. جالپى بۇل كىتاپحانا قورىندا ەلباسىنىڭ ەڭ تاڭداۋلى ءجۇز ەلۋدەن استام كىتابى جيناقتالعان. بۇل – ءبىز ءۇشىن, ءبىزدىڭ بەلسەندى جاستارىمىز ءۇشىن ۇلكەن ولجا. بۇل كىتاپتار, ءبىزدىڭ جاستارىمىزدىڭ رۋحاني دۇنيەتانامىن كەڭەيتىپ, بىلىمدەرىن تولىقتىرا تۇسەدى» دەدى.
ۋنيۆەرسيتەتتەگى كىتاپحانا ورتالىعىنىڭ اشىلۋى «رۋحاني جاڭعىرۋ: جاستار كوزقاراسى» اتتى حالىقارالىق عىلىمي-تاجىريبەلىك كونفەرەنتسياسىمەن جالعاستى. كونفەرەنتسياعا الماتى قالاسىنىڭ جانە شەتەلدىك جوعارى وقۋ ورىندارىنىڭ عالىمدارى, دوكتورلارى, ماگيسترانتتارى, ستۋدەنتتەرى قاتىسىپ, بايانداما جاسادى. جينالعاندار «تاريحي تۇرعىداعى قازاقستاننىڭ جاڭعىرۋ الەۋەتى», «ۇلتتىق كود رۋحاني سانانى جاڭعىرتۋدىڭ نەگىزى رەتىندە», «قازاقستان جاستارىنىڭ رۋحاني ساناسىن جاڭعىرتۋ شارتتارىنداعى تاريحي سانا» تاقىرىپتارىنا قاتىستى ماعىنالى اڭگىمە ءوربىتتى.
قالماحانبەت مۇقامەتقالي, «ەگەمەن قازاقستان»