ورتاعاسىرلىق سارايشىق قالاسىنىڭ ورنىنا جۇرگىزىلگەن ارحەولوگيالىق قازبا جۇمىستارى كەزىندە دارىلىك مايلارعا ارنالعان ەرەكشە قىش ىدىس – البارەللو تابىلدى.
«مۇنداي ىدىستار ادەتتە قىرىم اۋماعىندا يتاليالىق تەحنولوگيا بويىنشا جاسالاتىن. البارەللو تسيليندر ءپىشىندى, ءتۇبى ساقينالى تۇعىرلى كەلگەن, ايرىقشا كەڭ مويىندى. ويۋلى كومپوزيتسيامەن سىرلانعان تىك تىلىك سىزىقتاردان جاسالعان ءتورت جولاقتان تۇرادى, اراسىنا كولدەنەڭ بولىنگەن ەكى تراپەتسيا تۇرىندەگى بەلگىنى شتريحتاپ ورناتقان. جوعارى جاعىندا تورتجاپىراقتى گۇلدى فريز جۇرگىزىلگەن. يىق بولىگىندە تىك سىزىقتارمەن سەكتورلارعا بولىنگەن, 20 تراپەتسيادان تۇراتىن بەلدەۋ ورنالاسقان. موينى شىرشا تارىزدەس ورنەكپەن اشەكەيلەنىپتى», - دەيدى وبلىستىق تاريحي-ولكەتانۋ مۋزەيىنىڭ باسشىسى راشيدا حاريپوۆا.
سارايشىقتا قىش بۇيىمدار دايىندايتىن ورتالىق بولعان. بۇل ىدىس قىرىم اسىپ كەلمەي-اق, جەرگىلىكتى شەبەرلەردىڭ قولىنان شىعۋى دا مۇمكىن. كونە شاھار ورنىنان پۋل مەن ديرحەم تۇرىندەگى نۋميزماتيكالىق ماتەريالدار دا تابىلدى. بيىلعى قازبا جۇمىستارى كەزىندە 21 ۇلگىدە سوعىلعان 75 تيىن توپىراق استىنان ارشىلىپ الىندى. ولاردىڭ اراسىندا 1310 جىلدارى ساراي قالاسىندا وزبەك حاننىڭ تۇسىندا سوعىلعان تيىندار دا بار.
باقىتگۇل باباش,
«ەگەمەن قازاقستان».
اتىراۋ.