نازارباەۆ ورتالىعىندا استانا كلۋبىنىڭ ءۇشىنشى وتىرىسى ءوز جۇمىسىن باستادى.
"ۇلكەن ەۋرازيا - 2027" تەكەتىرەس پەن سەرىكتەستىك" اتتى حالىقارالىق پىكىرتالاس الاڭى ەكى كۇنگە سوزىلادى. جيىنعا 27 ەلدەن 60-تان استام ساياسي قايراتكەرلەر, بەدەلدى عالىمدار مەن بىرقاتار دامىعان ەلدىڭ "اقىل-وي ورتالىقتارىنىڭ" ساراپشىلارى كەلدى. ولاردىڭ قاتارىندا تۇركيانىڭ بۇرىنعى پرەزيدەنتى ابدوللا گۇل, سلوۆەنيانىڭ بۇرىنعى باسشىسى دانيلو تيۋرك جانە چەحيانىڭ ەكس- پرەزيدەنتى ۆاتسلاۆ كلاۋس بار. ءبىر ايتا كەتەرلىگى, جيىنعا ەلباسى نۇرسۇلتان نازارباەۆ تا قاتىسۋدا.
قازاقستان رەسپۋبليكاسى تۇڭعىش پرەزيدەنتى - ەلباسى قورىنىڭ اتقارۋشى ديرەكتورى قانات جۇماباەۆتىڭ ايتۋىنشا, استانا كلۋبى اۋقىمىنداعى ەۋرازيانىڭ ۇلكەن تۇيىتكىلدى ماسەلەلەرى مەن ونىڭ كەلەشەگى جونىندە ساراپشىلىق تالقىلاۋلار, ەلباسى نۇرسۇلتان نازارباەۆ ءاردايىم ناسيحاتتايتىن اشىقتىق پەن تەڭ قارىم-قاتىناس ۇستانىمىنا نەگىزدەلگەن جاھاندىق ساياسي ديالوگتى نىعايتۋعا قوسىلعان سۇبەلى ۇلەس بولىپ سانالادى. كلۋب مۇشەلەرى الداعى ونجىلدىقتا قۇرلىقتىڭ دامۋ باعدارىن ايقىندايتىن نەگىزگى ۇردىستەردى تالقىلايدى.
استانا كلۋبىنىڭ ءۇشىنشى وتىرىسىنىڭ باستى تاقىرىبى - «ۇلكەن ەۋرازيا» ترانسفورماتسياسى: الداعى ونجىلدىقتا ەۋرازيالىق كەڭىستىكتى قالىپتاستىراتىن گەوساياسي, ايماقتىق, ەكونوميكالىق جانە تەحنولوگيالىق ترەندتەر. استانا كلۋبىنىڭ وتىرىستارى «Chatham house» ەرەجەسى بويىنشا وتكىزىلەدى. بيىلعى جىلى ونىڭ بەلدى ساياساتكەرلەر مەن ساراپشىلاردان تۇراتىن قاتىسۋشىلارى جاھاندىق ۇردىستەر مەن ەۋرازياعا ىقپال ەتىپ جاتقان ەڭ وزەكتى ماسەلەلەر بويىنشا شەشىمدەر ىزدەمەك.
استانا كلۋبى قر تۇڭعىش پرەزيدەنتى - ەلباسى قورىنىڭ جەتەكشى حالىقارالىق عىلىمي ورتالىقتار قىتاي قازىرگى زامانعى حالىقارالىق قاتىناستار اكادەمياسى, گەرمانيا سىرتقى ساياسات كەڭەسى, رەسەي حالىقارالىق ىستەر كەڭەسى جانە حالىقارالىق بەيبىتشىلىك ءۇشىن كارنەگي قورىمەن بىرلەسىپ قۇرعان حالىقارالىق پىكىرتالاس الاڭى سانالادى.
اباي اسانكەلدى ۇلى,
"ەگەمەن قازاقستان"