تۇركىستان قالاسىنداعى نەكراسوۆ اتىنداعى №9 مەكتەپ-گيمنازيانىڭ عاسىرعا جۋىق تاريحى بار. كونە زاماننان سىر شەرتەتىن ءبىلىم ۇياسىنىڭ شاكىرتتەرى مەن ۇستازدارى 1967 جىلى ءححى عاسىر تۇرعىندارىنا ارناپ حات جازىپ, ونى مەكتەپ اۋلاسىنداعى سوعىس قۇرباندارى ەسكەرتكىشىنىڭ ىرگەتاسىنا ارنايى قوراپقا سالىپ قالدىرعان ەكەن. اتالعان حاتتىڭ ەلۋ جىلدان سوڭ اشىلۋى امانات ەتىلگەن. وسى امانات حاتتى اشۋ بۇگىنگى ۇرپاقتىڭ ەنشىسىنە بۇيىرىپتى. مەكتەپ ۇجىمى مەن اتا-انالار كوميتەتىنىڭ باس قوسۋىمەن ەلۋ جىل بۇرىنعى وقۋشىلار مەن ۇستازداردىڭ اماناتى اشىلىپ, كوپشىلىك الدىندا وقىلدى. ورىس ءتىلدى مەكتەپ بولعاندىقتان حات سول تىلدە جازىلعان (قازىر قازاق جانە ورىس ارالاس مەكتەپ-گيمنازياسى). مۇندا مەكتەپ عيماراتىنىڭ 1939 جىلى سالىنعانى, ول تۇركىستان قالاسىنداعى تۇڭعىش ەكى قاباتتى نىسان ەكەندىگى اتاپ كورسەتىلگەن. مەكتەپ اينالاسى تاپ-تاقىر توپىراق بولعانى, ودان بەرىدە شاكىرتتەر مەن ۇستازداردىڭ بىرلەسىپ, جەمىس اعاشتارىنىڭ وتىرعىزىلعاندىعى جانە سول اعاشتاردىڭ ماۋەلى باققا اينالعاندىعى جازىلعان. سونىمەن بىرگە حاتقا ۇلى وتان سوعىسىنىڭ قاسىرەتى دە ارقاۋ بولىپتى. مەكتەپ-گيمنازيا ديرەكتورى ج.ورىنباەۆانىڭ ايتۋىنشا, ەلۋ جىل بۇرىن حاتتى سالۋ راسىمىنە يە بولعان ولگا وسيپوۆا, ميحايل شمارين, گۇلحان ساديقىزى جانە نەللي شپرينا جيىنعا ارنايى شاقىرتىلعان. رۋحاني ساباقتاستىقتى جاڭعىرتۋعا باعىتتالعان شارا مەكتەپ قابىرعاسىندا ءالى دە جالعاسۋدا. «ەلۋ جىلدا ەل جاڭا» دەگەندەي ەكى قاباتتى مەكتەپ جانىنان 4 قاباتتى وقۋ عيماراتى, سپورت زالى مەن اكت زالدارى بوي كوتەرگەن. بۇدان بولەك قالا كولەمىندە توعىز قابات بيىكتىككە دەيىن ءتۇرلى نىساندار سالىنعانىن ايتساق, سوڭعى ەلۋ جىل ىشىندە جاڭا تۇركىستاننىڭ قالىپتاسقانىن كوزگە ەلەستەتۋ قيىن ەمەس. اسەرلى باسقوسۋدىڭ سوڭىندا بۇگىنگى مەكتەپ ۇجىمى 2037 جىلى وقىلۋى ءتيىس حات جازىپ, اتالعان ەسكەرتكىشتىڭ ىرگەتاسىنا جاسىردى. حاتتا الەمدەگى دامىعان ەلدەردىڭ قاتارىنا قادام باسقان مەملەكەتىمىزدىڭ مۇراتى قازاق, ورىس جانە اعىلشىن تىلدەرىندە باياندالعان.
«ەگەمەن-اقپارات»