استانادا «قازاقستانداعى سوت تورەلىگى جۇيەسىنىڭ ساپاسى مەن تيىمدىلىگىن ارتتىرۋداعى قازاقستاندىق بيلىكتىڭ قولداۋى» اتتى حالىقارالىق سەمينار اياقتالىپ, جيىنعا قاتىسۋشىلارعا ارنايى سەرتيفيكاتتار تاپسىرىلدى. شارانى قازاقستان حالقى اسسامبلەياسى (قحا) مەن ەۋروپا كەڭەسى بىرلەسە ۇيىمداستىردى.
ءىس-شاراعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى دارحان مىڭباي, قحا مەدياتسيا كەڭەسىنىڭ توراعاسى, ءماجىلىس دەپۋتاتى باقىتجان ءابدىرايىم, قازاقستانداعى ەۋروپا كەڭەسىنىڭ ۇلتتىق ۇيلەستىرۋشىسى لەيلا جدانوۆا جانە حالىقارالىق ساراپشىلار, سوت جانە قۇقىق قورعاۋ ورگاندارىنىڭ وكىلدەرى, مەدياتسيا ورتالىقتارىنىڭ باسشىلارى قاتىستى.
قورىتىندى باسقوسۋدا سەمينارعا قاتىسۋشىلار ترەنينگتىڭ تيىمدىلىگىن ايتىپ, مۇنداي شارالاردىڭ «رۋحاني جاڭعىرۋ» اياسىندا اتقارىلىپ جاتقان يگى ءىس ەكەنىن جەتكىزدى. سونداي-اق, جيىنعا قاتىسۋشىلار وزدەرىنىڭ ۇسىنىستارى مەن تىلەكتەرىن ءبىلدىردى.
قحا توراعاسىنىڭ ورىنباسارى د.مىڭباي مۇنداي سەمينار-ترەنينگتەردىڭ پايداسى مول ەكەنىن اتاپ ءوتتى. ونىڭ ايتۋىنشا, ەلىمىزدەگى سوت بيلىگى مەن قۇقىق قورعاۋ ورگاندارى تۇيتكىلدى ماسەلەلەردى تەرەڭ ءتۇسىنىپ, بىرلەسە ارەكەت ەتۋگە ىنتالى.
سەميناردى ەۋروپا كەڭەسىنىڭ ساراپشىسى, كارلوس اتىنداعى مادريد ۋنيۆەرسيتەتىنىڭ پروفەسسورى حەلەنا سولەتو جانە يسپانيا سوت جۇيەسى باس كەڭەسىنىڭ مۇشەسى اننا كارراسكوزا جۇرگىزدى. ساراپشىلار ترەنينگ بارىسىندا وزدەرى ازىرلەگەن وقىتۋ جۇيەسى بويىنشا ءدارىس وقىدى. ءوز كەزەگىندە, ەۋروپالىق ماماندار ازىرلەگەن جاڭا ءبىلىم كۋرسى جوعارعى سوت جانىنداعى سوت تورەلىگى اكادەمياسىنا جانە قۇقىق قورعاۋ ورگاندارىنىڭ اكادەمياسىنا ۇسىنىلماق.
اباي اسانكەلدى ۇلى, «ەگەمەن قازاقستان»