ۇلاعاتتى ۇستاز, ولكەتانۋشى, ءدىني قايراتكەر عازيز ءامىرحان ۇلىنىڭ ءومىرى مەن شىعارماشىلىعىنا ارنالعان «ابىرويى اسقان اسىل ازامات» اتتى عىلىمي-پراكتيكالىق كونفەرەنتسيا ءوتتى. وعان الماتى مەن استانادان, اتىراۋدان جانە قوستاناي وبلىسىنىڭ اۋداندارى مەن قالالارىنان ءبىلىم بەرۋ سالاسىنىڭ قىزمەتكەرلەرى, ۇستازدىڭ بەلگىلى شكىرتتەرى, جالپى جۇرتشىلىق وكىلدەرى قاتىستى.
كونفەرەنتسيانى قوستاناي وبلىسى ءبىلىم باسقارماسىنىڭ باسشىسى ءباتيما داۋموۆا اشتى. مۇنان كەيىن سۋ جونىندەگى مەملەكەت ارالىق سۋ كوميسسياسى عىلىمي ورتالىعىنىڭ ديرەكتورى, پروفەسسور, وكسفورد اكادەمياسىنىڭ مۇشەسى, قازاقستان رەسپۋبليكاسىنىڭ بۇرىنعى سۋ شارۋاشىلىعى ءمينيسترى ناريمان قىپشاقباي ۇلى «العاشقى ۇستاز» اتتى بايانداما جاسادى. ناريمان باستاۋىش ءبىلىمدى عازيز اعايىنان العان بولاتىن, «عازيز ءامىرحان ۇلىنىڭ الدىنان جۇزدەگەن شاكىرتتەر ءبىلىم الدى. ولارعا ۇستازىمىزدىڭ ۇلگىسى كوپ ەدى. ول تازالىقتى, قازاقي ادەت-عۇرىپتى قاتتى ساقتايتىن, اسىرەسە, ءدىني ىستەردى قولداپ وتىراتىن. كەيىنگى كەزدە ءوزى دە قاجىلىققا بارىپ كەلدى, جاس ءدىني ماماندار دايىنداپ, تورعايدا يماندىلىقتىق سالتانات قۇرۋىنا كوپ ەڭبەك ءسىڭىردى. قازاقستان بويىنشا العاشقى اشىلعان مەشىتتىڭ ءبىرى تورعاي مەشىتىنە عازەكەڭنىڭ سىڭىرگەن ەڭبەگى وتە كوپ» دەدى ناريمان قىپشاقباي ۇلى.
مۇنان كەيىن ۇستازدىڭ تاعى ءبىر شاكىرتى, ەكونوميكا عىلىمدارىنىڭ دوكتورى, اكادەميك, حالىقارالىق اقپاراتتاندىرۋ اكادەمياسىنىڭ اكادەميگى سايلاۋ بايزاقوۆ ءسوز سويلەدى. اكادەميك ۇستازىنىڭ مەكتەپ وقۋشىلارىن بەلسەندىلىككە, بىلىمگە قۇشتارلىققا, تازالىققا باۋلىعان جۇمىس ىستەۋ ادىستەمەسىنە توقتالدى.
ى.التىنسارين اتىنداعى ارقالىق مەملەكەتتىك پەداگوگيكا ينستيتۋتىنىڭ پروفەسسورى ايساۋلە دۇيسەبەكوۆا, تورعايداعى مۋزەيلەر كەشەنىنىڭ ديرەكتورى گۇلبانۋ سارسەكەەۆا, جانكەلدين اۋداندىق ءبىلىم ءبولىمىنىڭ مامانى جانات تەمىروۆا عازيز ءامىرحان ۇلىنىڭ ۇستازدىق جانە ولكەتانۋشىلىق, ۇيىمداستىرۋشىلىق ىستەرىنە توقتالدى. كونفەرەنتسيادان كەيىن وبلىستىق فيلارمونيا ارتىستەرى عازيز ءامىرحان ۇلىنىڭ 90 جىلدىق مەرەيلى تويىنا ارناپ كونتسەرت بەردى. ۇلاعاتتى ۇستازدى ەسكە الۋ شاراسىنىڭ سوڭىندا اس بەرىلىپ, مارقۇمنىڭ ارۋاعىنا قۇران باعىشتالدى.
ءنازيرا جارىمبەت,
«ەگەمەن قازاقستان»
قوستاناي