سەمەيدە «سەماز» دەپ اتالاتىن زاۋىت بار. كەزىندە ول اۆتوبۋس شىعارۋمەن اينالىسقان-دى. الەمدىك داعدارىس ەكى بۇيىردەن كەلىپ قىسقان سوڭ بۇلاردىڭ اۆتوبۋستارى وتىڭكىرەمەي تۇرىپ قالعان. سونسوڭ اتالعان كاسىپورىن سيپاتى بۇتىندەي وزگەرىپ, ەندى مۇندا «بەلارۋس» تراكتورى شىعارىلا باستاعان. ياعني, بۇلار قول قۋسىرىپ قاراپ وتىرماي مينسكىنىڭ تراكتور زاۋىتىمەن بايلانىسقا شىققان. ءسويتىپ, اتالعان تراكتور ءتۇرى وسىندا قۇراستىرىلا باستاعان.
ال سودان بەرى دە ەكى-ءۇش جىل وتە شىعىپتى. وسى مەرزىم ىشىندە مۇنداي تراكتوردىڭ ەكى-ءۇش ءتۇرىن شىعارۋ جولعا قويىلدى. بۇرناعى جىلى ەلباسى سەمەيگە كەلگەن ساپارىندا سونىڭ ونشاقتىسىن كوپ بالالى فەرمەرلەرگە سىيعا تارتقانى دا ەسىمىزدە. «سەماز» جاۋاپكەرشىلىگى شەكتەۋلى سەرىكتەستىگى ەندى مىنە, بيىلعى جىلى «ەل ءتاۋەلسىزدىگىنىڭ 20 جىلدىعىنا – 20 جارقىن ءىس» اكتسياسى اياسىندا «بەلارۋس 3022دتس.1» دەپ اتالاتىن جاڭا تراكتور ءتۇرىن شىعارۋدى قولعا العان. مەرەكە قارساڭىندا سول يگىلىكتى شارۋا ءوز شەشىمىن تاۋىپ وتىر.
سونىڭ ايعاعىنداي, العاشقى تراكتورلار شارۋا قوجالىقتارىنا جونەلتىلىپ ۇلگەرىلدى. جاڭا تراكتورعا 300 اتتىق كۇشى بار نەمىس ءوندىرىسىنىڭ دۆيگاتەلى ورناتىلعان. ونىڭ ءوزى جانارماي ۇنەمدەۋگە جول اشىپ وتىر. جاڭا تراكتور كۇنىنە 60 گەكتارعا جۋىق جەردى وڭدەۋگە كۇش-قۋاتى ارتىعىمەن جەتەدى. وسى ورايدا وعان ەگىس القابىن وڭدەيتىن تەحنيكانىڭ قاي-قايسىسىن بولسىن تىركەۋگە بولاتىندىعىن ايتا كەتكەن ءجون. تراكتوردىڭ اۆتوماتتى ءتۇردە باسقارىلاتىندىعى, سالونىنا قولايلى جەلدەتكىش ورناتىلعانى ءوز الدىنا.
ەلىمىز جىل وتكەن سايىن استىقتى دەرجاۆاعا اينالىپ كەلە جاتقان شاقتا اۋىلشارۋاشىلىق تەحنيكاسى قانشالىقتى قاجەت ەكەندىگى ايتپاسا دا ءتۇسىنىكتى. سوندىقتان سەرىكتەستىكتىڭ تاۋەلسىزدىك مەرەكەسى الدىنداعى بۇل تالپىنىسىن قۇپتاماسقا بولمايدى.
داۋلەت سەيسەن ۇلى, سەمەي.