حالقىمىزدىڭ ەجەلگى ءومىر ءسۇرۋ داعدىسى مەن ۇعىم-تۇسىنىگىندە قاراشاڭىراق اتاۋىنىڭ ءمانى جوعارى. بۇل تىركەس ارعى-بەرگى تاريحىمىزداعى وزىندىك ورنى بار قاسيەتتى عيماراتتارعا نەمەسە ۇرپاقتار ساباقتاستىعىنا وراي دا قولدانىلا بەرەدى. وسى ورايدا اقتوبە قالاسىنداعى عۇبايدوللا اقتاەۆ اتىنداعى قازاق ورتا مەكتەبىن ءوڭىر جۇرتشىلىعى قاراشاڭىراق دەپ اتاۋى ورىندى.
بۇگىنگى تاڭدا وبلىس ورتالىعىندا 78 ورتا ءبىلىم بەرەتىن وقۋ ورنى بار ەكەنىن ەسكەرسەك, سولاردىڭ اراسىندا №6 مەكتەپتىڭ ەڭسەسى بيىك, مارتەبەسى جوعارى. قاراشاڭىراق اتانعان ءبىلىم ورداسىن وزگەلەردەن ايرىقشالاپ وتىرعان باستى فاكتوردىڭ ءبىرى – ۇستازداردىڭ ۇلتتىق تاربيە ۇستىندارىن نەگىزگە الا وتىرىپ, بۇگىنگى ءبىلىم بەرۋ مودەلىمەن ۇشتاستىرا بىلۋىندە. ءبىر سوزبەن ايتقاندا, بۇل – قازاقى قالىپتان اجىراماعان, ۇلتتىق سالت-داستۇرلەردى ءبىلىم مەن تاربيە بەرۋ ىسىندە تۋ قىلىپ ۇستاي بىلگەن ۇلاعاتتى وقۋ ورنى. اتالعان وقۋ ورنىنان بەلگىلى تۇلعالار تۇلەپ ۇشتى. ولاردىڭ قاتارىندا جانسەن كەرەەۆ, كيم سەرىكباەۆ, ءىستاي مامبەتوۆ, رابيعا سىزدىقوۆا, باكىر تاجىباەۆ, ەرلان كارين سەكىلدى ەلگە ەڭبەك ەتىپ جۇرگەن ازاماتتار.
تاۋەلسىزدىكتىڭ العاشقى جىلدارىندا №6 قازاق-ورتا مەكتەبىنىڭ بازاسىندا تاجىريبە رەتىندە «ەلىم-اي» باعدارلاماسى جۇزەگە اسىرىلدى. وسى اتاۋمەن رەسپۋبليكالىق دەڭگەيدەگى ادىستەمەلىك ورتالىق قۇرىلىپ, ونىڭ تاجىريبەسى وزگە مەكتەپتەرگە ۇلگى-ونەگە رەتىندە تاراتىلدى. وسى كەزدەن باستاپ مۇندا ورتا ءبىلىم بەرۋ ءىسىنىڭ بىلىكتى جەتەكشىلەرىنىڭ ءبىرى زۋرا قۇدايبەرگەنوۆانىڭ باستاماسىمەن اۆتورلىق مەكتەپ جۇمىس ىستەي باستادى. كوپ كەشىكپەي مەكتەپ وكىلدەرى قۇراستىرعان ءۇش بولىمنەن تۇراتىن «ونەر الىپپەسى» وقۋلىعى جارىققا شىقتى.
بۇدان كەيىن قۇرىلعان «جاس دارىن» اتتى وقۋشىلاردىڭ عىلىمي قوعامىنىڭ دا جەتكەن جەتىستىكتەرى مول. سول كەزدەگى مەكتەپ ديرەكتورىنىڭ وقۋ-ادىستەمە جونىندەگى ورىنباسارى كۇلاش قوڭىرباەۆانىڭ باعدارلاماسى كەيىننەن حالىقارالىق ماڭىزعا يە بولدى. وسى قوعامعا مۇشە بولىپ كىرگەن وقۋشىلاردىڭ اراسىنان رەسپۋبليكالىق وليمپيادا جەڭىمپازدارى مەن حالىقارالىق عىلىمي جوبالار جارىسىنىڭ جۇلدەگەرلەرى شىقتى.
ال قازىرگى كۇنى قاراشاڭىراقتاعى وقۋ-تاربيە ۇدەرىسىنىڭ جاي-كۇيى قانداي دەگەن ماسەلەگە كەلسەك, مەكتەپ ديرەكتورى شولپان جانعاليەۆانىڭ ايتۋىنشا, بۇل كورسەتكىش وڭىردەگى بارلىق مەكتەپتەر بويىنشا جاسالاتىن كوپ قىرلى ءارى كوپ باعىتتاعى مونيتورينگتىك تالداۋلاردىڭ قورىتىندىلارىنا ساي بەلگىلەنبەك.
1936 جىلى وقۋ ورنىنا بەلگىلى كەڭەستىك مارشال كليمەنت ۆوروشيلوۆ كەلىپتى. سول-اق ەكەن, كوپ كەشىكپەي مەكتەپتىڭ اتاۋى ونىڭ ەسىمىمەن اتالادى. 1995 جىلى اقتوبە قالالىق ءماسليحاتىنىڭ شەشىمىنە سايكەس, مەكتەپكە عۇبايدوللا اقتاەۆتىڭ ەسىمى بەرىلگەن. ول كىسى قاتارداعى ماتەماتيكا ءپانىنىڭ مۇعالىمى, ديرەكتورى بولىپ قىزمەت ەتىپ, پەداگوگيكالىق قىزمەتىنىڭ 37 جىلىن وسى مەكتەپپەن بايلانىستىرعان ەلگە سىيلى, بىلىكتىلىگى مول, كوزى تىرىسىندە بيىك پاراسات يەسى بولا بىلگەن ەكەن. ءبىز وقۋ-تاربيە ۇدەرىسىمەن تانىسۋ ساتىندە گازەتىمىزدىڭ اقتوبە وبلىسى بويىنشا مەنشىكتى ءتىلشىسى قىزمەتىن اتقارعان ارىپتەسىمىز, مارقۇم ءامىر ورالبايدىڭ عۇبايدوللا اقتاەۆ جونىندە «ۇستاز ۇلاعاتى» دەپ اتالاتىن ماقالا جازعانى جونىندەگى دەرەككە دە تاپ بولدىق. كەيىن وسى ماقالا اتالعان مەكتەپكە ع.اقتاەۆتىڭ ەسىمى بەرىلۋىنە ۇلكەن قوزعاۋ سالىپتى.
قازىرگى كەزدە مەكتەپتىڭ ماتەريالدىق-تەحنيكالىق بازاسىن ودان ءارى جاقسارتۋ ماسەلەلەرى مەن قوسىمشا ساباقتار بەرۋ ءتارتىبى مەن كولەمىن ۇلعايتۋ جولدارى قاراستىرىلىپ وتىر. قالاي دەگەندە دە مەكتەپتەگى ءبىلىم ساپاسى دەڭگەيىن ودان ءارى كوتەرۋ تاسىلدەرىن جەتىلدىرە بەرمەكپىز, دەيدى شولپان سەرىكبايقىزى.
تەمىر قۇسايىن,
«ەگەمەن قازاقستان»
اقتوبە