30 قازاندا قىرعىزستاندا پرەزيدەنتتىك سايلاۋ بولىپ وتكەنى بەلگىلى. وندا نەگىزگى تارتىس المازبەك اتامباەۆ, اداحان مادۋماروۆ جانە قامشىبەك تاشيەۆ اراسىندا جۇرەتىن بولادى دەپ بولجانعان ەدى. سايلاۋ داۋىس بەرۋ ۇدەرىستەرىنىڭ شىن مانىندە وسىلاي وربىگەنىن كورسەتتى.
ناتيجەسىندە ەلدىڭ ءىس باسىنداعى پرەمەر-ءمينيسترى المازبەك اتامباەۆ ەڭ كوپ داۋىس جيناپ, باسقا قارسىلاستارىنان موينى وزىق كەلدى. بيۋللەتەندەردىڭ 95 پايىزى سانالعان كەزدە ونى سايلاۋشىلاردىڭ 62,95 پايىزى قولداعانى بەلگىلى بولدى. مادۋماروۆ – 14,92, ال تاشيەۆ 14,42 پايىز عانا داۋىس جينادى. قالعان كانديداتتار 1 پايىزدىق مولشەردى دە باعىندىرا المادى.
جاعدايدى رەتتەۋ جوسپارىن ۇسىندى
اراب مەملەكەتتەرىنىڭ ليگاسى (امل) سيريا پرەزيدەنتى باشار اسادقا ەلدەگى جانجالدى شەشۋ جوسپارىن جولدادى. بۇل ءجايت كاتار استاناسى دوحا قالاسىندا 3 ساعاتقا سوزىلعان كەلىسسوزدەن كەيىن مالىمدەلدى. باسقوسۋعا امل سىرتقى ىستەر مينيسترلەرى مەن سيريانىڭ رەسمي دەلەگاتسياسى قاتىستى.
كاتار پرەمەر-ءمينيسترى – سىرتقى ىستەر ءمينيسترى شەيح حاماد بين جاسيم ءال-ءتانيدىڭ حابارلاعانىنداي, جوسپار ب.اسادتىڭ سيرياداعى ادام قۇرباندىعى مەن زورلىق-زومبىلىقتىڭ كەز كەلگەن ءتۇرىن بولدىرماۋدىڭ بەلگىلى ءبىر ناقتى قادامىن قاراستىرادى. ەگەر جوسپار قابىلداناتىن بولسا, وندا سيريادا باسقا ەلدەردەگى, ياعني ليۆياداعى سياقتى وقيعالار قايتالانبايدى.
پارسى شىعاناعىنا قاتىسۋىن ۇلعايتادى
اقش ءوزىنىڭ اسكەرىن يراكتان اكەتكەننەن كەيىن جالپى پارسى شىعاناعىنداعى ءوزىنىڭ قاتىسۋىن ۇلعايتۋدى جوسپارلاپ وتىر. قۇراما شتاتتار قوسىمشا اسكەرلەرىن كۋۆەيتتە ورنالاستىرادى دەپ كۇتىلۋدە. ءسويتىپ, ولار يراكتاعى جاعدايدى وسى جەردەن باقىلاپ وتىرماق.
يرانمەن جانجال تۋىنداعان جاعدايدا دا كۋۆەيتتەن جەدەل ءىس-قيمىل تانىتۋعا مۇمكىندىك بار كورىنەدى. ال اسكەردىڭ سانى تۋرالى ماسەلە جاقىن كۇندەردە اياقتالاتىن كەلىسسوزدەردەن كەيىن بەلگىلى بولماق. وعان قوسا, پرەزيدەنت باراك وبامانىڭ اكىمشىلىگى پارسى شىعاناعىنداعى حالىقارالىق سۋلارعا جاڭا كورابلدەر جىبەرۋ ماسەلەسىن قاراستىرىپ جاتسا كەرەك. اقش اسكەرلەرى يراكتان جىل سوڭىنا دەيىن تولىق شىعارىلۋى ءتيىس.
سەرب ۇلتشىلى ءبىر جارىم جىلعا كەسىلدى
سەربيا راديكالدى پارتياسىنىڭ (سرپ) سەركەسى ۆويسلاۆ شەشەل بۇرىنعى يۋگوسلاۆيا بويىنشا حالىقارالىق تريبۋنالمەن (بيۋحت) سوتقا قۇرمەت تانىتپاعانى ءۇشىن ءبىر جارىم جىلعا كەسىلدى. جالپى, شەشەل 2003 جىلدان بەرى قاماۋدا وتىر.
وعان اسكەري قىلمىس جاسادى, ياعني يۋگوسلاۆيا سوعىسى كەزىندە ادام ءولتىردى, ازاپتادى, قونىس اۋدارۋعا ماجبۇرلەدى دەگەن ايىپتار تاعىلعان بولاتىن. بىراق ول وزىنە قاتىستى ايىپتاردان باس تارتىپ كەلەدى. شەشەلدىڭ ادۆوكاتىنىڭ ايتۋىنشا, ءىس 2003 جىلدان بەرگى كەزەڭدى ايتپاعاننىڭ وزىندە, 2010 جىلدان بەرى دە ءبىر ادىم ىلگەرى جىلجىماعان.
ءسوماليدىڭ دجيليب قالاسىنا سوققى بەردى
كەنيانىڭ اسكەري-اۋە كۇشتەرى ءسوماليدىڭ دجيليب قالاسىنا سوققى بەردى. جەرگىلىكتى تۇرعىنداردىڭ سوزدەرىنە قاراعاندا, بومبالاۋدىڭ سالدارىنان 12 ادام قۇربان بولسا, ولاردىڭ التاۋى ءسابي. 52 ادام ءتۇرلى دەنە جاراقاتتارىن العان. اۆياسوققىنىڭ بىرەۋى «ءال-شاباب» يسلام جاساعىنىڭ بازاسىنا, ەكىنشىسى سول ماڭدا ورنالاسقان بوسقىندار لاگەرىنە جاسالعان.
قازان ايىنىڭ ورتاسىندا كەنيا سوماليگە وسىنداعى ەكسترەميستەرگە قارسى تولىق اۋقىمدى وپەراتسيا باستاۋ ءۇشىن اسكەر كىرگىزگەن بولاتىن. ال وزگە ەل شەكاراسىنان وتۋگە كەنيا اۋماعىنان ءجيى-ءجيى ادامداردىڭ ۇرلانۋى مەن شەكارا ايماعىنداعى كەنيا اسكەريلەرىنە شابۋىلدار جاساۋ سەبەپ بولعان ەدى. كەنيا باسشىلىعى ازىرشە وپەراتسيانىڭ قاشان اياقتالاتىنىن ناقتىلاماي وتىر.
جەر شارىنىڭ 7 ميللياردىنشى تۇرعىنى
رەسەيدىڭ كالينينگراد قالاسىندا كەشە جەر شارىنىڭ جەتى ميللياردىنشى تۇرعىنى جارىق دۇنيە ەسىگىن اشتى, دەپ حابارلادى جەرگىلىكتى كلوپس.Ru باسىلىمى. پەتر الەكسەەۆيچ نيكولاەۆ ماسكەۋ ۋاقىتىمەن تۇنگى 12-دەن 2 ءمينوت وتكەندە تۋسا كەرەك.
جالپى, جەردىڭ جەتى ميللياردىنشى تۇرعىنىنىڭ تۋ داتاسى كوپ جاعدايدا شارتتى. ال تۋرا وسى قالانىڭ تۇرعىنى جەتى ميللياردىنشى بولاتىنى تۋرالى شەشىمدى بۇۇ قابىلداعان ەدى. 1 سەكونتتە دۇنيە ءجۇزى بويىنشا مىڭداعان بالا ومىرگە كەلەتىنىن ەسكەرسەك, شىن مانىندە كىمنىڭ ءدال جەتى ميللياردىنشى ەكەنىن ءدوپ باسىپ ايتۋ مۇمكىن بولمايتىنى تاعى انىق.
قىسقا قايىرىپ ايتقاندا:
*تۇرىك قۇتقارۋشىلارى جەر سىلكىنىسىنەن قيراعان ۇيلەر ءۇيىندىلەرىنەن ءتىرى قالعان ادامداردى ىزدەستىرۋدى توقتاتتى. 30 قازانعا دەيىنگى دەرەك بويىنشا, ءزىلزالادان وپات بولعاندار سانى 596 ادامعا جەتتى.
*بولگارياداعى پرەزيدەنتتىك سايلاۋدىڭ ەكىنشى تۋرىندا بيلەۋشى «ازاماتتار بولگاريانىڭ ەۋروپالىق دامۋى ءۇشىن» پارتياسىنان كانديدات روسەن پلەۆنەليەۆ جەڭىسكە جەتتى. ول سايلاۋشىلاردىڭ 54 پايىز داۋىسىن جيناعان.
*ليۆيانىڭ قازا تاپقان باسشىسى مۋاممار كاددافيدىڭ ۇلى ساادي كانادا, اۆستراليا, جاڭا زەلانديا, يراك جانە رەسەي وققاعارلار كومانداسىنىڭ كۇزەتىمەن قۇپيا تۇردە نيگەرگە وتكەن ەكەن. قازىر ول باي دا ەڭسەلى ۆيللادا تۇرىپ جاتقان كورىنەدى.
*ماسكەۋدىڭ تۆەر سوتى «سانراش» كومپانياسىنىڭ ارىزىن قارايتىن بولدى. سويتسە, بەلگىلى ساتيريك ميحايل جۆانەتسكي كوممۋنالدىق تولەمدەرگە سۇراپىل قارىز ەكەن. ول جىلۋعا, سۋعا, ەلەكتر جارىعىنا جانە ليفت قىزمەتىنە 2006 جىلدان بەرى كوك تيىن تولەمەپتى. قارىزى 377,9 مىڭ رۋبلگە (1 890 000 تەڭگە) جەتكەن.
*يەمەننىڭ استاناسى سانا قالاسىندا ورنالاسقان اۆياتسيا بازاسىندا 4 مارتە جارىلىس جاسالعان. وسى وقيعالاردان كەيىن ەل بيلىگى سانانىڭ حالىقارالىق اۋەجايىن جابۋ تۋرالى شەشىم قابىلدادى. ويتكەنى, اۋەجاي بازاعا ءتيىپ تۇر ەكەن.
ينتەرنەت ماتەريالدارى نەگىزىندە ازىرلەندى.