«جاس ۇلان-2017» ارميالىق اندەر فەستيۆالىنە 350-دەن اسا كونكۋرسانت قاتىسۋدا. ولاردىڭ اراسىندا قازاقستان رەسپۋبليكاسى قارۋلى كۇشتەرىنىڭ بارلىق تۇرلەرى مەن اسكەر تەكتەرىنىڭ اسكەري قىزمەتشىلەرى, اسكەري وقۋ ورىندارىنىڭ كۋرسانتتارى مەن تاربيەلەنۋشىلەرى, سونداي-اق جالپى ءبىلىم بەرۋ مەكتەپتەرىنىڭ دارىندى وقۋشىلارى, ستۋدەنتتەر, ەلىمىزدىڭ بارلىق وبلىستارىنداعى, استانا جانە الماتى قالالارىنداعى اسكەري-پاتريوتتىق كلۋبتاردىڭ تاربيەلەنۋشىلەرى بار.
فەستيۆالدىڭ نەگىزگى ماقساتى اسكەرگە شاقىرىلۋعا دەيىنگى, شاقىرۋ جاسىنداعى جانە ارميالىق جاستارعا, اسكەري قىزمەتشىلەر مەن ولاردىڭ وتباسى مۇشەلەرىنە اسكەري-پاتريوتتىق تاربيە بەرۋ بويىنشا جۇمىستى جانداندىرۋ, كوركەمونەرپاز ارميالىق ورىنداۋشىلار مەن ۇجىمداردىڭ شىعارماشىلىق تۇرعىدا وسۋلەرىنە قولداۋ كورسەتۋ.
بايقاۋ شارتى بويىنشا بارلىق قاتىسۋشىلاردىڭ ونەرى بىرقاتار ولشەمشارت بويىنشا باعالانادى. اتاپ ايتقاندا, ۇمىتكەرلەر اسكەري تاقىرىپتاعى شىعارمالاردى, قازاقستاندىق سازگەرلەردىڭ نەمەسە ورىنداۋشىلاردىڭ تۋىندىلارىن, جەكە اۆتورلىق مۋزىكالىق شىعارمالاردى, فولكلورلىق جانرداعى شىعارمالاردى ورىندايتىن بولادى.
فەستيۆالعا قاتىسۋشىلار ءۇش اتالىم بويىنشا ونەر كورسەتەدى. ورىنداۋشى-ۆوكاليستەر, فولكلورلىق ورىنداۋشىلار, ۆوكالدىق-اسپاپتىق انسامبلدەر مەن ورىنداۋشىلار. ىرىكتەۋ اينالىمىنان كەيىن قازىلار القاسى ۇزدىك ورىنداۋشىلاردى انىقتايدى. ولاردىڭ اتى-جوندەرى الدىمىزداعى 3 قاراشادا استانا قالاسىندا وتەتىن شەشۋشى كەزەڭدە, ياعني, گالا-كونتسەرتتە بەلگىلى بولادى.
ەسكە سالساق, «جاس ۇلان» ارميالىق اندەر فەستيۆالى 1997 جىلدان باستاپ وتكىزىلىپ كەلەدى. بايقاۋدىڭ اسكەري قىزمەتشىلەردىڭ عانا ەمەس, سونىمەن بىرگە ازاماتتىق تۇرعىندار اراسىندا دا ۇلكەن سۇيىسپەنشىلىك پەن تانىمالدىلىققا يە ەكەندىگىن ايتا كەتكەن ءلازىم.
قايرات جۇنىس ۇلى