«نۇر وتان» حالىقتىق-دەموكراتيالىق پارتياسى ەلىمىز بويىنشا «حالىق داۋىسى» اتتى ارنايى شارا وتكىزىپ جاتقانى بەلگىلى. قازان ايىنىڭ 10-ى كۇنى باستاۋ العان بۇل شاراعا وبلىس جۇرتشىلىعى دا بەلسەنە اتسالىسۋدا. اۋدان-اۋىلداردى ايتپاعاننىڭ ءوزىندە, ءبىر عانا وبلىس ورتالىعى تۇرعىندارى ۇسىنىستار قابىلدايتىن ارنايى جاشىكتەر ارقىلى ءۇش مىڭنان استام ءوتىنىش-تىلەكتەر ءتۇسىرگەن. ياعني, جۇرتتىڭ كوكەيىندە وزدەرىن تولعاندىراتىن ماسەلەلەر, ۇسىنىس-تىلەكتەر از ەمەس دەگەن ءسوز.
ال جالپى, بۇل شارانىڭ ەل تاۋەلسىزدىگىنىڭ 20 جىلدىعى قارساڭىندا ءوتۋى دە ماڭىزدى. ءويتكەنى, بۇگىندە ەلىمىز دامۋ جولىنا نىق ءتۇستى. ولاي بولسا, بيلەۋشى ساياسي پارتيا دا جاڭا باسىمدىقتاردى باعىندىرۋى, تىڭ باستامالاردى قولعا الۋى ءتيىس. ولار ءاربىر قازاقستاندىقتىڭ وي-پىكىرى, ۇسىنىسى ارقىلى پايىمدالماق. قازىر وسى شاراعا وراي, وبلىس ورتالىعىندا 40-قا جۋىق بولىمشە جۇمىس ىستەپ تۇر. ولاردىڭ بارلىعى ءىرى ساۋدا ورتالىقتارى مەن كاسىپورىنداردا, ءتۇرلى دارەجەدەگى وقۋ ورىندارىندا, جالپى ادامدار قاراسى كوپ شوعىرلانعان ورىنداردا ورنالاسقان.
سونداي-اق, شاراعا پارتيانىڭ باستاۋىش ۇيىمدارى بەلسەنە قاتىسۋدا. قولداۋ شارالارى دا ءوتۋدە. وبلىس ورتالىعىنداعى «دوستىق ۇيىندە» ەتنو-مادەني بىرلەستىكتەردىڭ وكىلدەرى باس قوستى. قازاقستان حالقى اسسامبلەياسى وبلىستىق فيليالى جانىنان قۇرىلعان باستاۋىش پارتيا ۇيىمى مۇشەلەرى رەسپۋبليكالىق شارانىڭ ماڭىزدىلىعىن ءسوز ەتىپ, ۇسىنىستارىن ورتاعا سالدى. ولار «حالىق داۋىسى» ەلدەگى ساياسي-الەۋمەتتىك تۇراقتىلىقتى ساقتاۋعا جول اشىپ, بيلىك پەن حالىق اراسىندا ءوزارا ورتاق تۇسىنىستىك ورناتادى دەگەن پىكىردە.
فاريدا بىقاي, پاۆلودار.