يبراھيم پايعامباردىڭ ۇلى ىسمايىل الىستا ءجۇرىپ ۇيلەنىپتى. بۇل حاباردى ەستىگەن اكەسى ءبىر كۇنى ۇلىن ىزدەپ كەلەدى. كەلسە, ۇيىندە ۇلى جوق, جاس كەلىن بەيتانىس اقساقالدى ەسىك الدىنان قارسى الادى. بىراق ول ۇيىنە كەلىپ تۇرعان ءوزىنىڭ قايىن اتاسى ەكەنىن بىلمەيدى. ىستىق كۇندە ءشول قىسىپ, ابدەن بەينەت كورگەن قارياعا كەلىنى «جولدان شارشاپ كەلدىڭىز عوي, ۇيگە كىرىپ ءشاي ءىشىڭىز» دەپ يشارا-ىزەت بىلدىرمەيدى. كوڭىلىنە كىربىڭ ۇيالاعان پايعامبار ودان تۇرمىس جاعدايلارىنىڭ قانداي ەكەندىگىن سۇرايدى. كەلىنشەك «جوقتان» وزگەنى اۋزىنا المايدى. سىرت كوزگە سىر بىلدىرمەي, ءۇنسىز تىڭداعان قاريا اتتانارىندا: «كۇيەۋىڭە ايت, ءۇيدىڭ بوساعاسىن اۋىستىرسىن, سوندا عانا تۇرمىسى تۇزەلەدى», - دەپ كەتە بارادى.
ءسوز استارىن تۇسىنبەگەن ايەل كۇيەۋىنە كورگەن-ءبىلگەن جايدىڭ ءبىرىن قالدىرماي بايانداپ بەرەدى. ىسمايىل كەلىپ كەتكەن ءوز اكەسى ەكەنىن, ونىڭ كەلىنىنە كوڭىلى تولماي, رەنجىپ قايتقانىن ىشتەي تۇسىنەدى. ءۇيدىڭ بوساعاسىن اۋىستىر دەگەنى ايەلىڭدى اۋىستىر دەگەنى ەكەنىن ءا, دەگەننەن ۇعا قويادى. ارادا جىلعا جۋىق ۋاقىت وتەدى. يبراھيم پايعامبار ۇلىن تاعى دا ىزدەپ كەلەدى. بالاسى تاعى دا ۇيىندە بولماي شىعادى. بۇل جولى الگى اقساقالدى بەيتانىس كەلىنشەك كۇتىپ الادى.
كورەگەندىلىك تانىتىپ, ءوز اكەسىندەي قۇرمەت كورسەتىپ, سىيلايدى. جول سوعىپ, قالجىراپ كەلگەن قاريانى تورىنە شىعارىپ, ءدام-تۇزىن ورتاعا سالادى. تۇرمىس-تىرشىلىگى جايلى قويىلعان سۇراعىنا كوپ ويلانباستان: «قۇدايعا شۇكىر, اللانىڭ بۇيىرتقانى بولىپ جاتىر»,- دەپ جاۋاپ بەرەدى. كۇيەۋىنىڭ قانداي ادام ەكەنىن سۇراعاندا, ونىڭ يماندى, ەڭبەكقور, ادال ازامات ەكەنىن ايتىپ, ريزالىعىن بىلدىرەدى.
مىناداي جاۋاپقا جانى جادىراعان يبراھيم پايعامبار اتتانارىندا: «كۇيەۋىڭە سالەم ايت, ءۇيدىڭ بوساعاسىن بەرىك ۇستاسىن»,- دەپ ءجۇرىپ كەتەدى. ءدىني ادەبيەتتەردە ءجيى ايتىلاتىن بۇل اڭىز-اڭگىمەنىڭ عاسىرلار وتسە دە, ءمانى مەن ماڭىزدىلىعى جويىلعان ەمەس. جاقسى جار تاڭداۋ ماسەلەسى بۇگىنگى قازاق قوعامىندا دا وزەكتى ماسەلەگە اينالعان.
ستاتيستيكادا جىل سايىن وتباسىن قۇرعان قازاق جاستارىنىڭ 15-16 پايىزى اجىراسىپ كەتەتىنى ايتىلادى. بۇل الەمدىك كورسەتكىش بويىنشا تىم كوپ سانالادى. ادەپ, يبا, تىيىم دەگەن ۇلتتىق تاربيەگە ءتان ۇعىمداردى الىس-جاقىن شەتەلدىڭ ازعىنداتقىش فيلمدەرىنىڭ ارسىز تاربيەسى الماستىرىپ, وتباسىلىق جاۋاپكەرشىلىك دەگەن ۇعىم ويىنشىققا اينالدى. وتاۋ قۇرعانداردىڭ اقش-تا – 43, ۇلىبريتانيادا – 42, رەسەيدە – 41 پايىزى اجىراسىپ كەتەتىنىن, ال ەڭ «اجىراسقىش» قالالار قاتارىنا نيۋ-يورك (51%) پەن ماسكەۋ (49%) جاتاتىنىن ەسكەرسەك, ءبىزدىڭ كىمدەرگە قاراپ كوش تۇزەپ وتىرعانىمىزدى بىردەن ۇعاسىز. ماماندار بۇل جەڭىل ءجۇرىس پەن جار تاڭداۋداعى نەمقۇرايلىلىقتىڭ ناتيجەسى دەگەندى ايتىپ وتىر.
بۇگىنگى اتا-انا جانباعىس, بايلىق قۋمەن الەك. ماحاببات - جۇيكەنى جاۋلاپ الاتىن اۋرۋ ەكەنىن, ال وسى «كەسەل» مەڭدەپ, ەسى كەتىپ تۇرعان ساتتە ۇيلەنگەندەردىڭ 40 پايىزى العاشقى ءۇش-ءتورت اي ىشىندە, 30 پايىزى ءبىر جىلدان سوڭ اجىراسىپ, ءۇش جىلعا تاياعاندا, سولاردىڭ 30 پايىزعا جەتەر-جەتپەسى عانا وتباسىن ساقتاپ قالاتىنىن ايتادى.
پسيحولوگتاردىڭ پىكىرىنە سەنسەك, ەڭ كەمى ەكى-ءۇش جىل ءبىر-ءبىرىن جەتە تانىپ بارىپ, اق نەكەسىن قيعىزعان وتاۋ يەلەرىنىڭ 80 پايىزى شاڭىراعىن شايقالتپاي ۇستاپ قالا الادى.
راۋشان تاۋىرحانقىزى, جۋرناليست.