قىزىلوردا وبلىسىنىڭ 9 ايداعى اتقارىلعان الەۋمەتتىك-ەكونوميكالىق دامۋ قورىتىندىسى وبلىس اكىمدىگىنىڭ كەڭەيتىلگەن ماجىلىسىندە تالقىلاندى. جالپى زەرتتەۋ بويىنشا ءوڭىردىڭ جەتىستىكتەرى وڭ ناتيجەگە يە. دەگەنمەن, الدا اتقارار جۇمىستار دا اۋقىمدى. وبلىس اكىمى قىرىمبەك كوشەرباەۆ «ەندىگى جەردە ۇگىت-ناسيحاتتى ەمەس, ناقتى ءىس-قيمىلدى كۇشەيتۋ كەرەك» دەپ اتاپ ءوتتى.
كەڭەيتىلگەن ماجىلىستە وبلىس اكىمىنىڭ ورىنباسارلارى مەملەكەتتىك باعدارلامالاردىڭ اتقارىلۋى مەن ەلباسى تاپسىرمالارىنىڭ ورىندالۋى تۋرالى ەسەپتەرىن بەردى.
مىسالى, جىل باسىنان بەرى اگرارلىق سالادا ءونىم كولەمىن كوبەيتۋدە جانە اۋىل شارۋاشىلىق ونىمدەرىن ەكسپورتتاۋدا تۇراقتى ءوسىم بار. ايماق ەڭبەككەرلەرى جارتى ميلليوننان استام توننا كۇرىش جيناپ, كەزەكتى رەت رەكوردتىق كورسەتكىشكە قول جەتكىزدى. ورتاشا ءونىم كولەمى گەكتارىنا – 55,3 تسەنتنەردەن كەلەدى.
ەسەپتى كەزەڭدە وبلىستىڭ ونەركاسىپ كاسىپورىندارىمەن 547,9 ملرد. تەڭگەنىڭ ءونىمى ءوندىرىلدى. جەڭىل, حيميا ونەركاسىبى جانە مۇناي وڭدەۋ ونىمدەرىن ءوندىرۋدىڭ ارتۋى ەسەبىنەن وڭدەۋ ونەركاسىبىندە ءوسىم 6,2 پايىزعا قامتاماسىز ەتىلدى (78,2 ملرد. تەڭگەنىڭ ءونىمى ءوندىرىلدى).
«نۇرلى جەر» باعدارلاماسىنىڭ اياسىندا پايدالانۋعا بەرىلگەن تۇرعىن ءۇي كولەمى 36,4 پايىزعا ءوسىپ, 467,0 مىڭ ش.م. قۇرادى. بيىل وبلىستا 47 تۇرعىن ءۇيدىڭ قۇرىلىسى جۇرگىزىلۋدە, ونىڭ 24 پايدالانۋعا بەرىلگەن.
يندۋستريالاندىرۋ كارتاسى شەڭبەرىندە وبلىستا 20 جوبا جۇزەگە اسىرىلىپ, بۇگىندە 16-ى تولىق وندىرىستىك قۋاتتىلىققا شىقتى.
يندۋستريالىق-يننوۆاتسيالىق دامۋ مەملەكەتتىك باعدارلاماسى اياسىندا ىسكە قوسىلعان كاسىپورىندارمەن ەكسپورتتالعان ءونىم كولەمى سوڭعى جىلى 23 پايىزعا ءوستى (2017 جىلدىڭ 8 ايىندا 3,9 ملرد.تەڭگە), ال يمپورتتاۋشى ەلدەردىڭ سانى 8-دەن 11-گە ءوستى (رەسەي, قىرعىزستان, ءازىربايجان, دانيا, تاجىكستان, اۋعانستان, قىتاي, ۇلىبريتانيا, پولشا, اقش, تايۆان).
«حالىقتىڭ ءال-اۋقاتىن ارتتىرۋ – ءبىزدىڭ باستى مىندەتىمىز. ناسيحات پەن ءتۇسىندىرۋ جۇمىستارىنىڭ ۋاقىتى ءوتتى. ەندىگى جەردە ناقتى ء ىس-قيمىلدى كۇشەيتەتىن كەز كەلدى. اسىرەسە, جاپپاي كاسىپكەرلىكتى دامىتۋ بويىنشا. ومىردە ءوز ورنىن تاپپاعان جاندار الەۋمەتتىك ماسەلەنىڭ تۋىنداۋىنا سەبەپكەر بولىپ جاتادى. سوندىقتان, ءبىز كەلەشەكتە ەڭبەك نارىعىندا سۇرانىسقا يە ماماندىقتار بويىنشا جەرلەستەرىمىزدى وقىتۋدى قولعا الىپ وتىرمىز. قۋاناتىن جايت, بيىل مەكتەپ بىتىرگەن قىزىلوردالىق تۇلەكتەردىڭ 97 پايىزى جوعارى جانە ورتا ارناۋلى وقۋ ورىندارىنا ءتۇستى. وسىلايشا, جاستارعا سەنىمدى بولاشاققا باعىت بەرىپ قانا قويمايمىز, مارگينال جاستاردىڭ قاتارىنىڭ ازايۋىنا دا ءوز ۇلەسىمىزدى قوسا الامىز», - دەدى وبلىس اكىمى.
تەك جىل باسىنان بەرى وڭىرگە 11 ەلدىڭ وكىلدەرى كەلىپ, ونەركاسىپ, كاسىپورىندار, اۋىل شارۋاشىلىعى ونىمدەرىن قايتا وڭدەۋ, ءبىلىم بەرۋ جانە ت. ب. سالالارداعى بىرلەسكەن جوبالاردى تالقىلادى.
ايتا كەتەيىك, 15-16 قاراشادا وڭىرگە كەلەتىن ينۆەستورلاردىڭ الاڭىنا اينالعان قىزىلوردا مەن بايقوڭىر قالالارىندا كەزەكتى "بايقوڭىر-ينۆەست" حالىقارالىق فورۋم وتەدى.