قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆتىڭ بۇعان دەيىن بەلارۋس پرەزيدەنتىمەن جانە پرەمەر-مينيسترىمەن كەزدەسكەنىن حابارلاعانبىز. ال كەشە سپيكەر باستاعان قازاقستاندىق پارلامەنتشىلەر دەلەگاتسياسى ۇجىمدىق قاۋىپسىزدىك شارتتى ۇيىمى پارلامەنتتىك اسسامبلەياسى كەڭەسىنىڭ وتىرىسىنا قاتىستى.
ەرتەڭگىسىن قازاقستاندىق دەلەگاتسيا ۇقشۇ پا كەڭەسى اتىنان جەڭىس مونۋمەنتىنە گۇل شوقتارىن قويىپ, جەڭىمپاز باتىرلار رۋحىنا تاعزىم ەتتى. بۇدان كەيىن ءماجىلىس توراعاسى ۇقشۇ-عا مۇشە مەملەكەتتەر پارلامەنتتەرىنىڭ باسشىلارىن جيناعان بەلارۋس رەسپۋبليكاسىنىڭ پرەزيدەنتى ا.لۋكاشەنكومەن كەزدەسۋگە قاتىستى. ال ۇقشۇ پا كەڭەسىنىڭ وتىرىسى بەلارۋس رەسپۋبليكاسى ۇلتتىق جينالىسى وكىلدەر پالاتاسى عيماراتىندا وتكەنىن ايتا كەتۋ كەرەك.
وتىرىستىڭ كۇن تارتىبىندە ون ەكى ماسەلە قارالدى. ونىڭ بارىسىندا ۇقشۇ پا تۇراقتى كوميسسيالارىنىڭ ءتوراعالارى بەكىتىلدى.
وسى ورايدا اتالعان اسسامبلەيانىڭ حالىقارالىق ىنتىماقتاستىق جانە ساياسي ماسەلەلەر جونىندەگى تۇراقتى كوميسسياسىنىڭ توراعاسى بولىپ قازاقستان پارلامەنتى سەناتىنىڭ الەۋمەتتىك-ءمادەني دامۋ كوميتەتىنىڭ ءتوراعاسى اقان بيجانوۆ تاعايىندالدى. سونداي-اق, وتىرىس بارىسىندا ۇيىمنىڭ شىعىس ەۋروپا ايماعىنداعى (رەسەيدىڭ كالينينگراد وبلىسىنداعى) ساياسي-اسكەري جاعداي بارىسى, توتەنشە جانە تەحنوگەندى اپاتتارعا قارسى بىرلەسە ارەكەت ەتۋ, پا-نىڭ 2012 جىلعا ارنالعان جۇمىس جوسپارى جانە وزگە دە ماسەلەلەر جان-جاقتى قارالدى.
وسىدان بىرنەشە كۇن بۇرىن سانكت-پەتەربۋرگتە تۇراقتى كوميسسيالاردىڭ توراعالىعىنا كانديداتتاردى تالقىلاپ, مينسكىدەگى وتىرىستىڭ كۇن ءتارتىبى پىسىقتالعانى بەلگىلى. وسى جەردە ۇقشۇ پا-نىڭ نەگىزگى باعىتى مەملەكەتتەر اراسىنداعى قۇقىقتىق بازانى ودان ءارى نىعايتىپ, ءبىر-بىرىنە سايكەستىلىگىن ارتتىرۋدى كوزدەيتىندىگىن باسا ايتا كەتۋ كەرەك. جاقىندا عانا ۇقشۇ كونفەرەنتسياسى ءوتىپ, وندا تابيعي تەحنوگەندىك اپاتتارمەن ء(ورت, جەر سىلكىنىسى, سۋ تاسقىنى جانە تاعىسىن تاعىلار) كۇرەسۋ ماسەلەسى جان-جاقتى پىسىقتالعان-دى. بۇل ماسەلە دە كەشە كەڭىنەن تالقىعا سالىندى. سونداي-اق وتىرىس بارىسىندا ۇقشۇ پا-نىڭ ءتيىستى كوميسسيالارى مەن ۇيىمدارىنىڭ حالىقارالىق ۇيىمدارمەن قارىم-قاتىناسى تالقىعا سالىندى. پارلامەنتتىك اسسامبلەيانىڭ وزگە دە حالىقارالىق پارلامەنتتىك قۇرىلىمدارمەن ءوزارا قارىم-قاتىناسىنىڭ قىرلارى دا نازاردان تىس قالعان جوق. جاقىندا مەملەكەت باسشىلارى باس قوسىپ, بىرقاتار شارتتارعا قول قويعانى بەلگىلى. وسىعان سايكەس سول شارتتاردىڭ ورىندالۋىنا قاجەتتى قۇقىقتىق بازانى نىعايتۋ ماسەلەسى دە وتكىر قويىلدى. جالپى, ۇقشۇ پا-نىڭ باستى ماقساتى – وسى ۇيىمعا مۇشە مەملەكەتتەردىڭ ءبىر-ءبىرىمەن قارىم-قاتىناسىنداعى ءوزارا ىقپالداستىقتا جۇمىس ىستەۋىنىڭ قۇقىقتىق نەگىزدەرىن ۇلتتىق زاڭنامامەن سايكەس كەلتىرۋ دە ۋاقىت تالابىنان تۋىپ وتىر. شەكارانى نىعايتۋ, تەحنوگەندىك اپاتپەن كۇرەسۋ, سونداي-اق قيىندىق تۋعىزاتىن ماسەلەلەر بويىنشا ۇقشۇ-عا ءمۇشە مەملەكەتتەردىڭ ءبىر بىرىمەن قارىم-قاتىناسى, بىرلەسە ارەكەت ەتۋى جايى دا ناقتىلاندى. ۇقشۇ پا قۇرىلعالى بەرى كوپتەگەن مودەلدىك زاڭدىق قۇجاتتار دايىندالسا, ولاردى ۇلتتىق زاڭناما بازاسىن نىعايتۋعا پايدالانۋدا كوپتەگەن شارالار ءجۇزەگە اسقانى ءمالىم. ۇقشۇ پا-نىڭ حالىقارالىق ىنتىماقتاستىق جانە ساياسي ماسەلەلەر جونىندەگى تۇراقتى كوميسسياسىنىڭ توراعاسى احان بيجانوۆ ۇيىم جۇمىسىنداعى كەدەرگىلەردى, ءار مەملەكەتتىڭ ۇلتتىق زاڭناماسىندا سايكەسسىزدىكتەر بار ەكەنىن اتادى. سەناتوردىڭ پايىمىنشا, ۇيىمداعى مەملەكەتتەردىڭ ۇستانىمدارى ءبىر بولعاندىقتان دا ۇلتتىق زاڭنامالاردى سايكەستەندىرۋگە ابدەن بولادى. بۇل باعىتتا دەپۋتاتتىق كورپۋس پەن پارلامەنتتىك اسسامبلەيا بىرلەسە جۇمىس جاساۋعا ارقاشاندا دايىن ەكەندىكتەرىن ءبىلدىرىپ وتىر.
اسقار تۇراپباي ۇلى, «ەگەمەن قازاقستان» – مينسكىدەن.