ەل تاۋەلسىزدىگىنىڭ 20 جىلدىعىن اتاپ ءوتۋ اۋقىمىندا بەلگىلەنگەن شارالار اياسىندا 25-26 قازان كۇندەرى استانا قالاسىندا الماتى, باتىس قازاقستان جانە پاۆلودار وبلىستارىنىڭ كۇندەرى وتۋدە. كەشە مەملەكەتتىك حاتشى قانات ساۋداباەۆ پەن استانا قالاسىنىڭ اكىمى يمانعالي تاسماعامبەتوۆ وبلىس كۇندەرى شەڭبەرىندە ۇيىمداستىرىلعان وڭىرلەردىڭ اۋىلشارۋاشىلىق تاۋارلارى جارمەڭكەسىن ارالاپ كوردى.
مەملەكەتتىك حاتشى الدىمەن «دۋمان» ويىن-ساۋىق ورتالىعى جانىنداعى الاڭدا ورنالاسقان باتىس قازاقستان وبلىسىنىڭ جارمەڭكەسىن ارالادى. وبلىس اكىمى باقتىقوجا ىزمۇحامبەتوۆ مەملەكەتتىك حاتشى مەن استانا قالاسىنىڭ اكىمىنە ءوڭىردىڭ الەۋمەتتىك-ەكونوميكالىق دامۋ جەتىستىكتەرى تۋرالى بايانداپ, ەدىل مەن جايىق وڭىرىنەن جەتكەن جارمەڭكەدەگى اۋىلشارۋاشىلىق ونىمدەرىمەن تانىستىردى.
ودان كەيىن قانات ساۋداباەۆ پەن يمانعالي تاسماعامبەتوۆ استانا قالاسى اكىمدىگى الدىنداعى ورتالىق الاڭدا قانات جايعان پاۆلودار وبلىسىنىڭ جارمەڭكەسىنە اتباسىن تىرەدى. ءوندىرىستى ءوڭىر باسشىسى باقىتجان ساعىنتاەۆ وركەنى وسكەن ءوڭىردىڭ تابىستارىن تىلگە تيەك ەتە كەلىپ, وبلىستاعى اۋىل شارۋاشىلىعى ەڭبەككەرلەرىنىڭ وسى ءجارمەڭكەگە اكەلگەن تارتۋ-تارالعىلارىمەن تانىستىردى. پاۆلودار وبلىسى باس قالامىزدا ۇيىمداستىرىلعان جارمەڭكەگە 800 توننادان استام ساپالى ازىق-ت ۇلىك تاۋارلارىن جەتكىزىپتى.
تامىلجىعان تابيعاتىنا ەل تاۋەلسىزدىگىنىڭ 20 جىلدىعى ىشىندە قول جەتكىزگەن جەتىستىكتەرى ساي جەتىسۋ ءوڭىرىنىڭ ەڭبەككەرلەرى وبلىس كۇندەرى اياسىندا ءوتىپ جاتقان شارالارعا وڭىردە ونگەن مول ونىمدەرىمەن قوسا, ونەر تارتۋلارىن دا مولىنان جەتكىزگەن ەكەن. قانات ساۋداباەۆ ەلىمىزدىڭ باس قالاسى – استانادا ءوتىپ جاتقان وبلىستاردىڭ كۇندەرى اياسىنداعى بۇل ازىق-ت ۇلىك تاۋارلارى جارمەڭكەسى مەن مادەني-رۋحاني شارالاردىڭ مەرەكە قارساڭىندا جۇرتشىلىقتىڭ رۋحىن اسقاقتاتاتىن الەۋمەتتىك ماڭىزدىلىعىن اتاپ كورسەتتى.
جىلقىباي جاعىپار ۇلى.