اتىراۋدا «اتاۋلار تاريحى» اتتى عىلىمي ەكسپەديتسيا جۇمىسىن باستادى.
ايماقتاعى جەر-سۋ, فيزيكالىق-گەوگرافيالىق نىساندار مەن ەلدى مەكەندەردىڭ اتاۋلارىنىڭ شىعۋ, قالىپتاسۋ تاريحىن زەرتتەپ, مالىمەتتەر بازاسىن جاساقتاۋ ماقساتىندا وبلىستىق تىلدەردى دامىتۋ باسقارماسى قىزمەتكەرلەرى مەن جەرگىلىكتى عالىمدار جولساپارعا شىقتى.
-ەكسپەديتسيا ازىرگە قۇرمانعازى, يساتاي, يندەر اۋداندارىندا زەرتتەۋ جۇمىستارىن جۇرگىزدى, - دەيدى باسقارما باسشىسى ءاسيا قىستاۋباەۆا. – سونىڭ وزىندە بۇرىن ەستىمەگەن ءبىراز مالىمەتتەر بەلگىلى بولدى. مىسالى, قۇرمانعازى اۋدانىنداعى بىرلىك اۋىلىندا باعلاني دەگەن شاعىن توبە بار ەكەن, شىعۋ تەگى بەلگىسىز, ەل اراسىندا كەزىندە الما باعى بولعان دەگەن اڭگىمە بار. بۇل عىلىمي زەرتتەۋدى قاجەت ەتەدى. سول سياقتى كىناشا وزەنى اتاۋىنىڭ شىعۋ تەگىن انىقتاۋ قاجەت. وسى اۋدانعا قاراستى بۋلگاچينسك وزەنىنىڭ جاعاسىندا بۋلگاچينسكي دەپ اتالاتىن اۋىل بولىپتى, قازىر جوق. اۋىل ەرتەرەكتە بۇلعاقتى وزەگىنىڭ جاعالاۋىندا ورنالاسقان بولىپ شىقتى. سودان بۋلگاچينسكي دەپ اتالىپ كەتكەن ەكەن. بۇرىن شىققان جيناقتاردا اقكول اۋىلدىق وكرۋگى بويىنشا ءبىر كولدىڭ اتاۋى ەنگىزىلسە, ەكسپەديتسيا جۇمىسىنىڭ ناتيجەسىندە بۇل وڭىردە كەزىندە 30-عا جۋىق كول بولعاندىعى انىقتالدى, جانە ولاردىڭ 18-ءىنىڭ اتاۋى ناقتىلاندى.
ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا كورسەتىلگەن تاپسىرمالار اياسىندا جۇزەگە اسىرىلاتىن بۇل جوبا 2020 جىلعا دەيىن جالعاسادى. جيناقتالعان مالىمەتتەر نەگىزىندە انىقتامالىق كىتاپتار شىعارىلادى.
باقىتگۇل باباش,
«ەگەمەن قازاقستان».
اتىراۋ.