كەشە سەۋل قالاسىندا قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ پەن كورەيا رەسپۋبليكاسى ۇلتتىق سايلاۋ كوميسسياسىنىڭ توراعاسى كيم نۋنگ-حۆان قازاقستان رەسپۋبليكاسى ورتالىق سايلاۋ كوميسسياسى مەن كورەيا رەسپۋبليكاسى ۇلتتىق سايلاۋ كوميسسياسى اراسىنداعى سايلاۋدى اكىمشىلىكتەندىرۋ سالاسىنداعى ىنتىماقتاستىق جونىندەگى ءوزارا تۇسىنىستىك تۋرالى مەموراندۋمعا قول قويدى.
مەموراندۋمعا قول قويۋ ەكى ەلدىڭ سايلاۋ ورگاندارى اراسىنداعى ىنتىماقتاستىقتى ودان ءارى دامىتۋ جولىنداعى ماڭىزدى قادام بولىپ تابىلادى. قۇجاتتىڭ نەگىزگى ماقساتى – سايلاۋلاردى ۇيىمداستىرۋ سالاسىندا ءوزارا ىنتىماقتاستىق ورناتۋ, سونداي-اق اقپاراتتارمەن, تەحنولوگيالارمەن جانە تاجىريبەمەن الماسۋ ءۇشىن جاعداي جاساۋ. ونىڭ سىرتىندا, تاراپتاردىڭ پىكىرى بويىنشا, ىنتىماقتاستىقتىڭ جاڭا ءپىشىنى قازاقستان رەسپۋبليكاسى مەن كورەيا رەسپۋبليكاسىنىڭ ورتاق دەموكراتيالىق يگىلىگى بولىپ تابىلاتىن يدەالدار مەن ۇستانىمداردىڭ جۇزەگە اسىرىلۋى مەن قورعالۋىن مەيلىنشە ءتيىمدى قامتاماسىز ەتۋگە مۇمكىندىك بەرەتىن بولادى.
قازاقستان رەسپۋبليكاسى ورتالىق سايلاۋ كوميسسياسى دەلەگاتسياسىنىڭ ساپارى كورەيالىق تاراپ ۇيىمداستىراتىن ەكى ماڭىزدى حالىقارالىق شارانىڭ: ازيا سايلاۋ ورگاندارى اسسوتسياتسياسى باس اسسامبلەياسى مەن دۇنيەجۇزىلىك سايلاۋ ورگاندارى اسسوتسياتسياسىن قۇرۋ بويىنشا فورۋم قارساڭىندا ءوتتى.
«ەگەمەن-اقپارات».