الماتى وبلىسىندا بولعان ان-28 ۇشاعى اپاتىن تەكسەرۋ ماقساتىندا ارنايى كوميسسيا قۇرىلدى, دەپ حابارلايدى قر ينۆەستيتسيالار جانە دامۋ مينيسترلىگىنىڭ ءباسپاسوز قىزمەتى.
«بۇگىن قر ينۆەستيتسيالار جانە دامۋ ۆيتسە-ءمينيسترى رومان سكليار باسشىلىعىمەن كوميسسيا مۇشەلەرى اۆياتسيالىق وقيعا ورىن العان جەرگە اتتاندى. وقيعانىڭ انىق-قانىعى جاقىن ارادا بەلگىلى بولادى» دەلىنگەن مينيسترلىك حابارلاماسىندا. سونداي-اق, ينۆەستيتسيالار جانە دامۋ ءمينيسترى جەڭىس قاسىمبەك اۋە اپاتىنان قازا تاپقان ەكيپاج مۇشەلەرى - اۋە كەمەسىنىڭ كومانديرى گەننادي تسوي, ەكىنشى پيلوت ەۆگەني كۋتافين, اۆياتەحنيك بەيشيبەك احماتباەۆ, اكۋشەريا, گينەكولوگيا جانە پەريناتالوگيا عىلىمي ورتالىعىنىڭ پروفەسسورى, دارىگەر اكۋشەر-گينەكولوگ پاتساەۆ تالعات اناپي ۇلى مەن كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ رەانيماتولوگ دارىگەرى ارتىقباەۆ جانىبەك تۇكەن ۇلىنىڭ جاقىندارى مەن تۋىستارىنا قايعىرىپ كوڭىل ايتاتىندىعىن جەتكىزدى.
3 قازان كۇنى الماتى-شىمكەنت باعىتىندا سانيتارلىق اۆيارەيسىن ورىنداعان «ان-28» ۇشاعى ساعات 18:47-دە الماتىدان 28 شاقىرىم قاشىقتىقتا روداردان جوعالىپ كەتتى. سوسىن ساعات 19.15-تە ۇشاق الماتى وبلىسى ىلە اۋدانىنىڭ مەجدۋرەچينسك اۋىلى ماڭىندا اپاتقا ۇشىراپ, ورتەنگەنى حابارلاندى. بورتتا بولعان 5 ادام قازا بولدى.