ەكى جىل بۇرىنعى پوشتاشىنى توناعان كۇدىكتىنىڭ ءىسى اشكەرە بولدى
اقتوبە وبلىسىنىڭ ءىىد-ءنىڭ العا اۋداندىق ىشكى ىستەر ءبولىمىنىڭ قىزمەتكەرلەرى ەكى جىل بۇرىن بولعان توناۋ قىلمىسىنىڭ بەتىن اشتى. ءبىر قىزىعى, اتالمىش كۇدىكتى تەمىر توردىڭ ارعى جاعىندا وتىرعاندىعى انىقتالدى.
2009 جىلدىڭ ناۋرىز ايىندا بەلگىسىز بىرەۋ العا اۋدانىندا «قازپوشتا» اق-تىڭ زەينەتاقى تاراتىپ جۇرگەن پوشتاشىسىن توناپ, 260 مىڭ تەڭگە اقشانى الىپ كەتكەن بولاتىن. بىراق پوليتسيا قىزمەتكەرلەرى كۇدىكتىنى قانشا ىزدەسە دە تابا الماعان. اتالمىش دەرەككە بايلانىستى قىلمىستىق ءىس قوزعالىپ, جەدەل ىزدەستىرۋ شارالارى ەكى جىل بويى توقتاماعان. مىنە سونىڭ ناتيجەسىندە جۋىردا كۇدىكتىنىڭ ءتۇر-تۇلعاسى انىقتالدى. دەگەنمەن, پوشتاشىنى توناعان كۇدىكتى جىگىت قاراقشىلىق جاساعانى ءۇشىن تۇرمەدە ءوز جازاسىن وتەپ جاتقاندىعى دالەلدەندى. پوشتاشىنى توناپ ءىزىن سۋىتقان جىگىت كوپ ۇزاماي قاراقشىلىق قىلمىسى ءۇشىن پوليتسيا قۇرىعىنا ىلىگىپ, تۇرمەگە وتىرىپتى. ەندى قاراقشىلىق جازاسىنىڭ ۇستىنە توناۋ قىلمىسىنىڭ جاۋاپكەرشىلىگى جۇكتەلىپ, تاعى بىرنەشە جىلعا سوتتالاتىنى بەلگىلى بولدى. تەرگەۋشىلەردىڭ ايتۋىنشا, كۇدىكتى جىگىت قۋلىققا باسىپ, جاساعان قاراقشىلىق قىلمىسىن تەز مويىنداعان. سەبەبى, ونىڭ الدىنداعى توناۋ دەرەگىنىڭ بەتى اشىلىپ قالماس ءۇشىن كۇدىكتى ءىستىڭ جەدەل تەرگەلۋىن تالاپ ەتىپتى. بىراق ەكى قىلمىسى ءۇشىن ءبىر جازا الۋدى ويلاعانىمەن سەزىكتىنىڭ قيتۇرقى ارەكەتى وسىلاي اشكەرە بولدى.
ءمادي قۋانىش ۇلى.
اقتوبە وبلىسى.