بۇگىن پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسى بارىسىندا الەۋمەتتىك ماڭىزدى تاۋارلار مەن قىزمەتتەرگە باعانىڭ وسۋىنە جول بەرمەۋ شارالارى قارالدى. بۇل تۋرالى primeminister.kz حابارلادى.
ۇلتتىق بانك توراعاسى دانيار اقىشەۆ 2017 جىلى ىشكى باعالارعا تەڭگە دەۆالۆاتسياسىنىڭ اۋىسۋ اسەرى اياقتالىپ قالعانىن ايتتى. قازىرگى تاڭدا ازىق-ت ۇلىك تاۋارلارى مەن حالىققا اقىلى قىزمەتتەر ۇسىنۋ سەكتورىندا ءوسىمنىڭ بىرقالىپتى قارقىنى بايقالادى. ۇلتتىق بانك جىل قورىتىندىسى بويىنشا ينفلياتسيا ماقساتتى ءدالىز ىشىندە 6-دان 8% دەڭگەيىندە قالادى دەپ بولجاۋدا. ۇلتتىق بانك 2018 جىلعا اسا تومەنگى ماندە ينفلياتسيا بويىنشا 5-تەن 7%-عا دەيىن ماقساتتى باعدار بەكىتكەن. 2020 جىلعا قاراي ۇلتتىق بانك ينفلياتسيانىڭ 4%-دىق دەڭگەيگە دەيىن باسەڭدەۋىن كۇتەدى. قازىرگى تاڭدا قابىلدانىپ جاتقان بارلىق شارالار اتالعان ماقساتتارعا قول جەتكىزۋگە باعىتتالعان.
ەنەرگەتيكا ءمينيسترى قانات بوزىمباەۆ مۇناي ونىمدەرىنىڭ ىشكى نارىعى ءۇشىن 111,1 ملن توننا مۇناي وڭدەلگەنىن, بۇل وتكەن جىلدىڭ وسى كەزەڭىمەن سالىستىرعاندا 3,6%-عا جوعارى ەكەنىن مالىمدەدى. اۆتوبەنزين ءوندىرىسى 2 ملن 270 مىڭ توننانى قۇرادى, بۇل دا 2016 جىلدىڭ سايكەس كەزەڭىندەگى كورسەتكىشتەن جوعارى. اي-92 ماركالى بەنزيننىڭ ورتاشا باعاسى قاڭتار ايىندا ليترىنە 135 تەڭگە تۇردى, قىركۇيەكتە باعا ورتا ەسەپپەن 150 تەڭگەگە دەيىن ءوستى, ءوسىم 11%-دى قۇرادى. اي-92 بەنزينى بويىنشا يمپورت ۇلەسى شىلدە-تامىز ايلارىندا 15%-دان قىركۇيەكتە 30%-عا دەيىن ۇلعايدى. بۇل مۇناي وڭدەۋ زاۋىتتارىندا جاڭعىرتۋ جۇمىستارىنىڭ اياقتالۋىنا وراي جوندەۋ جۇمىستارىن جۇرگىزۋگە بايلانىستى بولدى.
سايكەسىنشە, وسىعان وراي ىشكى نارىققا جەتكىزۋدىڭ ازايۋى مەن يمپورتقا شىعارۋدىڭ ارتۋى بايقالادى, بۇل باعانىڭ وسۋىنە ىقپال ەتتى.
ەنەرگەتيكا مينيسترلىگى نارىقتاعى باعا جاعدايىن مۇقيات قاداعالاپ وتىر, ماسەلەن, بىرنەشە جانار-جاعارماي ستانتسيالارىنا قاتىستى اكىمشىلىك ءىس قوزعالدى. سونىمەن قاتار اعىمداعى جاعدايدى رەتكە كەلتىرۋ بويىنشا قادامدار جاسالىپ جاتىر.
شىمكەنت ءموز-دە قازان ايىندا وڭدەۋ جوسپارى 110 مىڭ تونناعا ۇلعايتىلدى, بۇل ىشكى نارىقتى بەنزين جانە ديزەلدىك وتىنمەن قوسىمشا قامتاماسىز ەتۋگە مۇمكىندىك بەرەدى. بارلىق جانار-جاعارماي ستانتسيالارىنىڭ جۇمىسى ەسەبىنەن, قاراشا ايىندا اي-92 بەنزينى بويىنشا يمپورت ۇلەسىن 30%-عا, جانە جەلتوقساندا 20%-عا دەيىن تومەندەتۋ كوزدەلىپ وتىر, وسىلايشا قازىرگى جاعداي تۇراقتاندىرىلادى.
ءوز كەزەگىندە, اۋىل شارۋاشىلىعى ءبىرىنشى ۆيتسە-ءمينيسترى قايرات ايتۋعانوۆ ونىمدىك تۇراقتاندىرۋ قورلارىنىڭ جۇمىسى وتكەن جىلمەن سالىستىرعاندا بارىنشا جۇيەلى بولعانىن ءارى بۇل الەۋمەتتىك ماڭىزدى تاۋارلار باعاسىنىڭ ءوسىمىن شەكتەيتىنىن ايتتى.
11 شىلدەدە وتكەن قر ۇكىمەتى وتىرىسى بارىسىندا اكىمدىكتەرگە تۇراقتاندىرۋ قورلارى ءۇشىن ونىمدەر ساتىپ الۋ تاپسىرىلعان بولاتىن. قازىرگى تاڭدا اكىمدىكتەرگە اتالعان جۇمىستى جانداندىرىپ, وسى جىلدىڭ 15 قاراشاسىنا دەيىن اياقتاۋ قاجەت.
سونداي-اق, وتىرىس بارىسىندا اتىراۋ وبلىسى اكىمىنىڭ ورىنباسارى الىبەك ناۋتيەۆ, سولتۇستىك قازاقستان وبلىسىنىڭ اكىمى قۇمار اقساقالوۆ, پاۆلودار وبلىسىنىڭ اكىمى بولات باقاۋوۆ, وڭتۇستىك قازاقستان وبلىسى اكىمىنىڭ ورىنباسارى تولەگەن سارسەمباەۆ جانە استانا اكىمى اسەت يسەكەشەۆ ءسوز سويلەدى.
باقىتجان ساعىنتاەۆ بارلىق سالالىق مەملەكەتتىك جانە جەرگىلىكتى اتقارۋشى ورگاندارعا تاۋارلار مەن قىزمەتتەرگە, اسىرەسە الەۋمەتتىك ماڭىزدى ازىق-ت ۇلىك تاۋارلارىنا باعا ءوسىمى ماسەلەسىن ەرەكشە باقىلاۋدا ۇستاۋدى تاپسىردى.