وڭتۇستىك قازاقستان وبلىسىنىڭ اكىمى ج.تۇيمەباەۆ 1 قازان - حالىقارالىق قارتتار كۇنى مەرەكەسىنە وراي ۇيىمداستىرىلعان «التىن جاس - زولوتوي ۆوزراست» اتتى مەرەكەلىك شاراعا قاتىستى.
وندا ءوڭىر باسشىسى قازىنالى قاريالاردى مەرەكەمەن قۇتتىقتاپ, بىرقاتار ارداگەرلەردى ماراپاتتادى. ورتالىق ساياباقتا دەنساۋلىق ساقتاۋ باسقارماسىنىڭ ۇيىمداستىرۋىمەن وتكەن ءىس-شارادا وبلىستىڭ بىلىكتى دارىگەرلەرى قارت كىسىلەردى تەگىن دياگنوستيكالىق تەكسەرۋدەن وتكىزىپ, كەڭەستەرىن بەردى.
ارداگەرلەردى ساۋىقتىرۋ ىسىنە دە ەرەكشە ءمان بەرىلىپ كەلەتىنىن ايتقان اكىم, دەنى ساۋ ۇرپاق قالىپتاستىرۋدا جاس ۇرپاققا ۇلگى بولۋدى ايتتى.
«قازاقستان ازاماتتارىنىڭ دەنساۋلىعىن جاقسارتۋ جانە ءومىر جاسىن ۇزارتۋ – پرەزيدەنت ساياساتىنىڭ ەڭ باستى مىندەتتەرىنىڭ ءبىرى. سىزدەردىڭ ومىرلىك تاجىريبەلەرىڭىز بەن اقىل-كەڭەستەرىڭىزدىڭ ورنى ءبىز ءۇشىن قاشاندا بولەك. سالاماتتى ءومىر سالتىن ۇستانىپ, دەنى ساۋ ۇرپاق قالىپتاستىرۋدا سىزدەر ۇلگى بولۋلارىڭىز قاجەت», - دەدى ايماق باسشىسى.
ساياباققا جينالعان جۇرتشىلىق كونتسەرتتىك باعدارلامامەن قاتار ارداگەرلەر اراسىندا وتكەن شاحمات ءتۋرنيرىن تاماشالادى. مىڭ بۇرالعان كاسىبي بيشىلەر ونەر كورسەتىپ, انشىلەرمەن جارىسا وبلىستاعى ىنتىماعى جاراسقان بارلىق ەتنوس وكىلدەرى ءوز تىلدەرىندە اندەر شىرقادى. وسىلايشا قازان ايىنىڭ العاشقى كۇنى شىمكەنتتىڭ شىرايى ارداگەرلەرمەن اجارلانا ءتۇستى.
سونىمەن قاتار, 30 قىركۇيەك پەن 7 قازان ارالىعىندا ەگدە جاستاعى ادامداردىڭ دەنساۋلىعىن نىعايتۋ جانە سالاۋاتتى ءومىر داعدىلارىن قالىپتاستىرۋ ماقساتىندا وبلىس كولەمىندەگى اۋرۋحانا-ەمحانالاردا اشىق ەسىك كۇندەرى وتەدى. ال ءبىر اي كولەمىندە وبلىس بويىنشا ۇلى وتان سوعىسىنىڭ ارداگەرلەرىنە مەديتسينا قىزمەتكەرلەرى ۇيلەرىنە بارىپ, قاجەت كومەك كورسەتەتىن بولادى.
ايتا كەتەيىك, وبلىستا 223 مىڭ زەينەتكەر بولسا, ونىڭ 218-ءى ۇلى وتان سوعىسىنىڭ ارداگەرلەرى, 4946-ى مايدانعا قاتىسۋشىلار مەن مۇگەدەكتىككە تەڭەستىرىلگەندەر بولىپ تابىلادى. ال 18 مىڭنان استامى تىل ەڭبەككەرلەرى بولسا, 100-گە جۋىعى ءجۇز جاستاعى جانە جۇزدەن اسقان قارت كىسىلەر. بۇگىنگى تاڭدا مەملەكەتپەن كەپىلدەندىرىلگەن تولەمدەر كولەمى جىل سايىن كوتەرىلۋدە, وبلىستىق جانە جەرگىلىكتى بيۋدجەتتەر قارجىسى ەسەبىنەن دە ءتۇرلى الەۋمەتتىك قولداۋلار ۇيىمداستىرىلىپ كەلەدى. ماسەلەن, «قامقورلىق» اكتسياسى شەڭبەرىندە بيىلدىڭ وزىندە 72 مىڭنان استام ارداگەرگە 494,3 ملن تەڭگە كولەمىندە ءتۇرلى الەۋمەتتىك كومەكتەر كورسەتىلدى. ال ازاماتتاردى ساۋىقتىرۋدا وبلىس ورتالىعىنداعى «ارداگەرلەر ءۇيى» مەن «مەيىر» ارداگەرلەر ۇيىندە جىلىنا 8 مىڭعا جۋىق ادام ەم الىپ, دەمالادى.