جەكسەنبى, 23 قازان كۇنى ءتۇركيانىڭ شىعىسىندا قۋاتتى جەر سىلكىنىسى بولدى. ءزىلزالانىڭ ەپيتسەنترى ۆان قالاسىنىڭ شىعىسىنان 19 شاقىرىمداي جەردە دەگەن بولجامدار ايتىلۋدا. العاشىندا ءزىلزالا سالدارىنان 500-دەن استام ادام قۇربان بولدى دەگەن اقپارات تاراتىلعان ەدى. كەشە بۇل اقپاراتتى ءتۇركيانىڭ ىشكى ىستەر ءمينيسترى يدريس نايم تەرىسكە شىعارىپ, جەر سىلكىنىسىنەن 217 ادامنىڭ وپات بولعانىن مالىمدەدى. 1090 ادام جاراقات العان. وپات بولعانداردىڭ 100-ءى ۆان قالاسىنىڭ, 117-ءسى ۆان پروۆينتسياسىنا قاراستى ەردجيش اۋدانىنىڭ تۇرعىندارى.
قۇربان بولعاندار قاتارى وسە ءتۇسۋى مۇمكىن. ويتكەنى, قۇلاعان ۇيلەردىڭ استىندا دا ادامدار قالىپ وتىر. تۇركياداعى قىزىل كرەست بولىمشەسىنىڭ مالىمدەۋىنشە, ءزىلزالا كەزىندە اتالعان اۋماقتاردا اراسىندا تۇرعىن ۇيلەر مەن جاتاقحانالار بار 90-عا جۋىق عيمارات قيراعان. ال ءزىلزالانىڭ كۇشى 7 باللدان اسقان كورىنەدى.
بىرقاتار شەتەلدىك بۇقارالىق اقپارات قۇرالدارى جەر سىلكىنىسىنەن ۆان پروۆينتسياسىنداعى تۇرمە عيماراتى دا ءىشىنارا ب ۇلىنگەنىن, تۇرمەدەن 150-گە جۋىق باس بوستاندىعىنان ايىرىلعان ادام قاشىپ كەتكەندىگىن, بىرنەشە ساعاتتان سوڭ ولاردىڭ 50-ءى تۇرمەگە قايتا ورالعاندىعىن جازادى.
بۇل ءزىلزالا تۇركيادا سوڭعى جىلدارى كورىنىس بەرگەن اسا قۋاتتى جەر سىلكىنىسى رەتىندە تىركەلىپ وتىر. ويتكەنى, ونىڭ جەراستى ءدۇمپۋى يران مەن ازەربايجان اۋماقتارىندا, سونداي-اق گرۋزيانىڭ تۇركيامەن شەكتەسەتىن اۋداندارىندا دا كادىمگىدەي سەزىلگەن. جەكسەنبىدە تۇنگە قاراي تۇركيانىڭ وڭتۇستىك-شىعىسىندا تاعى دا جەر سىلكىندى. «رەيتەر» اگەنتتىگىنىڭ اقپاراتتارى بويىنشا, ونىڭ كۇشى 6,1 بالل بولعان.
ادام ولىمىنە سوقتىرعان ءزىلزالا زارداپتارىن جويۋعا بايلانىستى اقش, رەسەي, ۇلىبريتانيا, يزرايل, تاعى باسقا ەلدەر سول كۇنى-اق رەسمي انكاراعا وزدەرىنىڭ كومەكتەسۋگە ءازىر ەكەندىكتەرىن بىلدىرگەن بولاتىن. انكارا ءيزرايلدىڭ كومەگىنەن باس تارتاتىنىن بىردەن مالىمدەدى.