«اينالدىم سەنەن, اتامەكەن-اي!» دەپ اتالىپ, ەل تاۋەلسىزدىگىنىڭ 20 جىلدىعىنا ارنالدى
وتكەن سەنبىدە الماتىداعى كيەلى شاڭىراقتاردىڭ ءبىرى – بالۋان شولاق اتىنداعى سپورت جانە مادەنيەت سارايىندا «نۇر وتان» پارتياسىنىڭ قولداۋىمەن وتكەن اقىن ءشومىشباي ساريەۆتىڭ «اينالدىم سەنەن, اتامەكەن-اي!» اتتى اۆتورلىق كەشى جۇرتشىلىققا قۋانىشتى مولىنان سىيلادى. بۇل كەشتى قازاقستان ەستراداسىنىڭ ۇزدىك ونەر جۇلدىزدارى كوركەيتكەنىن ايتۋىمىز كەرەك. اۆتورلىق كەش يەسى رەسپۋبليكا جۇرتشىلىعىنا ونداعان تانىمال اندەردىڭ ولەڭدەرىن تۋىنداتقان اقجارما اقىن رەتىندە كەڭىنەن ءمالىم دەسەك, قاتەلەسپەسپىز. سول سەبەپتەن دە زال تولى قاۋىم قازاقستاننىڭ ەڭبەگى سىڭگەن قايراتكەرى, فرانتس كافكا اتىنداعى حالىقارالىق التىن مەدال سىيلىعىنىڭ, جىل ادامى – التىن ادام سىيلىعىنىڭ, پلاتينا تارلان سىيلىعىنىڭ لاۋرەاتى ءشومىشباي ساريەۆتى زور قوشەمەتپەن قارسى العانىنا تاڭدانۋعا بولماس.
ش.ساريەۆ ادەبيەت جانە ونەر ينستيتۋتىندا عالىم رەتىندە ىزدەنە ءجۇرىپ «اباي جانە ماحامبەت», «ماحامبەت – ۇلت تاۋەلسىزدىگىنىڭ كۇرەسكەر اقىنى» اتتى مونوگرافيالار جاريالاعان ەدى. سوعان وراي كەشتى نۇرعيسا تىلەنديەۆ اتىنداعى اكادەميالىق فولكلورلىق-ەتنوگرافيالىق «وتىرار سازى» وركەسترى ۇلى كومپوزيتور نۇرعيسانىڭ «ماحامبەت» كۇيىمەن باستاۋى دا جاراسىپ تۇردى. «ەلىم مەنىڭ» اتتى بايگەنىڭ ەكى دۇركىن گران-پري ءجۇلدەگەرى ءشومىشباي ساريەۆ اۆتورلىق تويدىڭ بەتاشارى رەتىندە تاۋەلسىزدىككە ارناعان جارقىن جىرىن شاشۋ ەتتى. ال «اتا تولعاۋى» كۇيى ورىندالعاننان كەيىن اۆتوردىڭ سازگەر ەرلان قاناپيانوۆپەن بىرىگىپ جازعان ءVىى قىسقى ازيا ويىندارى الاۋ ەستافەتاسىنىڭ گيمنى «ازيادا» اۋەلەدى.
«نەتكەن جۇمباق, شەكسىز اسپان كوك ەدىڭ,
عالام دەگەن قانداي عاجاپ كەڭ ەدىڭ.
جۇرەگىممەن ولەڭ سىيلاپ ومىرگە,
دۇنيەنى جالت قاراتسام دەپ ەدىم!» – دەپ جىرلاعان اقىن ءشومىشباي ساريەۆتىڭ ولەڭىنە جازىلعان «اينالدىم سەنەن, اتامەكەن-اي!» ءانى كەشەگى كەڭەس ۇكىمەتى كەزىندە شەتەل قازاقتارىنىڭ ءانۇرانىنا اينالىپ كەتكەن ەدى. وسى ءان-ولەڭنىڭ ءبىر شۋماعى تۇڭعىش پرەزيدەنت مۇراجايىنداعى «ءۇشقوڭىر» پانوراماسىندا اقىن ەسىمىمەن بىرگە جازۋلى تۇرعانى دا تەگىن ەمەس-اۋ. ولاي بولسا, اتاقتى ءانشىمىز روزا رىمباەۆا شىرقاعان وسىناۋ ارمان ءاندى كوپشىلىك تاعى دا ىقىلاسپەن قابىل الدى.
65 جاسقا كەلىپ وتىرعان توي يەسىن «نۇر وتان» پارتياسىنىڭ استانادان جەتكەن وكىلى قۇتتىقتاپ, پارتيا ءتوراعاسىنىڭ ءبىرىنشى ورىنباسارى نۇرلان نىعماتۋليننىڭ ءىلتيپاتتى سالەمىن جەتكىزدى. سونداي-اق, وسىنداي اق تىلەككە تولى جەدەلحات قۇتتىقتاۋلارى قىزىلوردا, شىعىس قازاقستان, ماڭعىستاۋ, وڭتۇستىك قازاقستان, پاۆلودار وبلىسىنىڭ اكىمدەرىنەن كەلىپ ءتۇسىپ, ءبىزدىڭ ەلىمىزدە اكىمنىڭ اقىندى قۇرمەتتەيتىنىن ايعاقتادى.
اكەلى-بالالى ەسكەندىر جانە ءبىرجان حاسانعاليەۆتار ءشومىشباي ساريەۆپەن شىعارماشىلىق بىرلەستىكتە جازىلعان «قۇرىلىسشىلار ءانۇرانىنىڭ» تۇساۋىن كەستى. ال, كوپتەن بەرگى ارىپتەسى ۆلاديمير پيتەرتسەۆپەن بىرىگىپ جازىلعان «ءالجان انا» ءانى تۇڭعىش پرەزيدەنتىمىزدىڭ اياۋلى اناسىنا ارنالۋى قانداي عانيبەت. بۇل ءاندى قازاقتىڭ تالانتتى ءانشىسى گۇلميرا اقۇرپەكوۆا ورىندادى. وسى ارادا قايتىس بولعان كۇنى ءوز ەلىنىڭ ۇلتتىق مەرەكەسى بولىپ جاريالانعان پورتۋگاليانىڭ ۇلى اقىنى لۋيش دي كاموەنستىڭ سونەتتەرى قازاق وقىرمانىنا ءشومىشباي اقىننىڭ اۋدارماسىمەن جەتكەنىن ايتا كەتكەن ءجون. سونىمەن بىرگە, م.اۋەزوۆ اتىنداعى ادەبيەت جانە ونەر ينستيتۋتى تاۋەلسىزدىگىمىزدىڭ 20 جىلدىعىنا ارناپ شىعارعان «قازاق كوركەمسوزىنىڭ شەبەرلەرى» اتتى كىتاپقا ەنگەن ءجۇز اقىن-جازۋشىنىڭ ىشىنەن دە ءشوكەڭدى ۇشىراتامىز. ەلى قۇرمەتتەگەن اقىننىڭ كىتابى سوناۋ ءۇندىستاندا دا جارىق كورگەن.
مىنە, اقىن ءوزىنىڭ تۇمانباي مولداعاليەۆ, قادىر مىرزا ءالى اعالارى سياقتى قازاقتىڭ ءان-ولەڭىنىڭ ايتۋلى شەبەرىنە اينالعاندىعىن وسى كەش بارىسىندا ايقىن تانىتتى. ونىڭ تاماشا سازگەرلەرمەن شابىت قاناتىندا تۋدىرعان ءان-ولەڭدەرىن بۇل اۆتورلىق كەشتە سۇلەيمەن يبراگيموۆ, جەڭىس سەيدوللا ۇلى, دۇيسەنحان سىزدىقوۆ, باعدات ءسامەدينوۆا, ەستاي الەكەەۆ, امانقوس سادىقوۆ, ەلميرا جاڭابەرگەنوۆا, ايجان نۇرماعانبەتوۆا, اقجول مەيىربەكوۆ ءجانە ت.ب. جەزتاڭداي انشىلەر الماتى اسپانىنا قالىقتاتتى. تاماشا ءان كەشى مايرا ءىلياسوۆا زور شابىتپەن شىرقاعان «العا, قازاق ەلى» ءانىمەن تۇيىندەلدى.
قورعانبەك امانجول.
سۋرەتتى تۇسىرگەن يۋري بەككەر.