مۇسىلماندار اراسىنداعى بىتىراڭقىلىق پەن كونفەسسياعا ءبولىنۋدى سىرتقى كۇشتەر ءوز مۇددەسىنە پايدالانۋدا. بۇل تۋرالى بۇگىن ەلوردا تورىندە باستالعان يسلام ىنتىماقتاستىق ۇيىمىنىڭ عىلىم جانە تەحنولوگيالار جونىندەگى ءبىرىنشى سامميتىندە قازاقستان پرەزيدەنتى نۇرسۇلتان نازارباەۆ ايتتى.
«شاقىرۋىمدى قابىل الىپ, كۇللى يسلام ۇمبەتىنىڭ اجىراماس بولىگى سانالاتىن قوناقجاي قازاق ەلىنە, استانامىزعا كەلگەندەرىڭىز ءۇشىن بارشاڭىزعا العىسىمدى بىلدىرەمىن. وكىنىشكە وراي سوڭعى كەزدەرى مۇسىلمان ۇمبەتى تالاي اۋىر سىناقتارمەن بەتپە-بەت كەلىپ وتىرعانىن ءبارىمىز بىلەمىز. بىرىنشىدەن, ەكسترەميستىك جانە تەرروريستىك ۇيىمدار كەڭىنەن ەتەك الۋدا. ولاردىڭ لاڭكەستىك ارەكەتتەرىنەن ءبىرىنشى كەزەكتە مۇسىلمان ەلدەرىنىڭ وزدەرى زارداپ شەگىپ وتىر», - دەدى نۇرسۇلتان نازارباەۆ.
مەملەكەت باسشىسى, ەكىنشىدەن, نەگىزگى قاۋىپ مۇسىلمانداردان ءتونىپ تۇر دەگەن يسلاموفوبيالىق پىكىر قوعام ىشىندە, باتىستا كەڭ تارالىپ جاتقانىن, باتىس ەلدەرىندە مۇسىلماندارعا قارسى قىلمىستىق ارەكەتتەر سانى جىل سايىن كوبەيىپ وتىرعاندىعىن باسا ايتتى.
«جاقىندا ميانمادا بولعان شيەلەنىسكە قاتىستى الاڭداۋشىلىعىمىزدى ءبارىمىز بىلدىرەمىز. بارلىق تاراپتى زورلىق-زومبىلىقتى دەرەۋ توقتاتىپ, ديالوگتى بىرىككەن ۇلتتار ۇيىمى اياسىندا جالعاستىرۋعا شاقىرامىز. ۇشىنشىدەن, 1,5 ميللياردتان استام ادامدى بىرىكتىرەتىن يسلام الەمى بۇگىندە, وكىنىشكە قاراي, اۋىز بىرشىلىك تانىتا الماي وتىر. سودان ءبىز كوپ ۇتىلىپ وتىرمىز. مۇسىلماندار اراسىنداعى بىتىراڭقىلىق پەن كونفەسسياعا ءبولىنۋدى سىرتقى كۇشتەر ءوز مۇددەسىنە پايدالانۋدا. ءبىز مۇنى ارتتا قالدىرۋىمزى كەرەك», - دەدى قازاقستان پرەزيدەنتى.