بۇگىن قر پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسى بارىسىندا ەلىمىزدىڭ ەنەرگيا تاراتۋ كاسىپورىندارىنىڭ جىلىتۋ ماۋسىمىنا دايىندىق بارىسى تالقىلاندى. بۇل تۋرالى primeminister.kz حابارلادى.
ەنەرگەتيكا ءمينيسترى قانات بوزىمباەۆ قازاقستاننىڭ ەنەرگيا تاراتۋشى كاسىپورىندارىنىڭ الداعى كۇز-قىس كەزەڭىنە دايارلىق جۇمىستارى اياقتالۋعا جاقىنداپ قالعانىن مالىمدەدى. اي سايىن مۇددەلى مەملەكەتتىك ورگاندار مەن كومپانيالاردىڭ قاتىسۋىمەن تۇيىتكىلدى ماسەلەلەردى تالقىلاۋ مەن ولاردىڭ شەشىمىن تابۋ شارالارىن قابىلداۋ بويىنشا سالالىق سەلەكتورلىق كەڭەستەر وتكىزىلىپ تۇرادى.
بيىل 10 ەنەرگيا بلوگىنا, 61 ەنەرگەتيكالىق قازانعا جانە 49 تۋربيناعا جوندەۋ جۇمىستارىن جۇرگىزۋ كوزدەلگەن. قىركۇيەك ايىنىڭ باسىنداعى جاعداي بويىنشا 4 ەنەرگيا بلوگىندا, 28 قازاندا جانە 22 تۋربينادا جوندەۋ جۇمىستارى اياقتالعان. 4 ەنەرگيا بلوگىندا, 30 قازاندا جانە 21 تۋربينادا ءتۇرلى اياقتالۋ دەڭگەيىندە جۇمىستار جۇرگىزىلىپ جاتىر. جۇمىستار كەستەگە سايكەس جۇرگىزىلۋدە.
سونداي-اق, جالپى ۇزىندىعى 25 مىڭ شاقىرىم بولاتىن ەلەكتر تاراتۋ جەلىسىنە جانە 6 300 ارالىق ستانتسياعا جوندەۋ جۇمىستارىن جۇرگىزۋ جوسپارلانعان. قازىرگى تاڭدا 17 مىڭ شاقىرىم ەلەكتر تاراتۋ جەلىسىنە جوندەۋ جۇمىستارى جۇرگىزىلگەن, بۇل جوسپاردىڭ 71%-ىن قۇرايدى. مۇندا دا جوندەۋ جۇمىستارى بەكىتىلگەن كەستەگە ساي جۇرگىزىلۋدە. ەلەكتر ستانسالارىندا 3,7 ملن توننا كولەمىندە كومىر قورى بار, بۇل وتكەن جىلدىڭ دەڭگەيىنەن 24%-عا ارتىق, سونداي-اق 82 مىڭ توننا مازۋت بار.
بۇدان وزگە, ەنەرگەتيكا مينيسترلىگىندە «قتج» ۇك» اق وكىلدەرىنىڭ, ەكسپەديتورلىق جانە كومىر ءوندىرۋ كومپانيالارىنىڭ, كومىر ەلەكتر ستانسالارىنىڭ وكىلدەرىنىڭ قاتىسۋىمەن ەنەرگيا كوزدەرىندە وتىننىڭ نورماتيۆتىك قورىن قۇرۋ جانە كومىر تاسىمالداۋ ماسەلەلەرى بويىنشا كەڭەس وتكىزىلدى. كەڭەس قورىتىندىسى بويىنشا ءتيىستى تاپسىرمالار بەرىلدى.
قاراعاندى وبلىسىندا, سونىڭ ىشىندە «ارسەلور ميتتال تەمىرتاۋ» اق جەو-2-دە ەنەرگەتيكا نىساندارىن كۇز-قىز مەزگىلدەرىندە جۇمىس ىستەۋگە دايارلاۋ ماسەلەسىنە ەرەكشە كوڭىل ءبولىندى. جەو-نىڭ ازىرلەنگەن كەستەسىنە سايكەس, 3 قازان مەن 1 تۋربينادا جوندەۋ جۇمىستارىن جۇرگىزۋ جوسپارلانعان. قىركۇيەكتىڭ باسىنداعى جاعداي بويىنشا 2 قازاندا جوندەۋ جۇمىستارى اياقتالعان, №6 قازاندا (22 قاراشاعا دەيىن) جانە №2 تۋربينادا (30 قىركۇيەككە دەيىن) جوندەۋ جۇمىستارى جۇرگىزىلىپ جاتىر.
بۇدان وزگە, مينيستر ەلىمىزدىڭ گاز-كولىك ينفراقۇرىلىمىنىڭ نىساندارى شتاتتىق رەجيمدە جۇمىس ىستەپ تۇرعانىن, ولارعا تەحنيكالىق قىزمەت كورسەتۋ كەستەلەر مەن جوسپارلارعا سايكەس جۇرگىزىلىپ جاتقانىن باياندادى.
قازاقستاننىڭ وڭتۇستىك وڭىرلەرىن 2017-2018 جىلداردىڭ جىلىتۋ ماۋسىمىندا گازبەن جابدىقتاۋ جۇمىستارى «قازاقستان-قىتاي», «بگر-تبا», «بەينەۋ-شىمكەنت» گاز قۇبىرلارى بويىنشا گاز جەتكىزۋ ارقىلى جانە امانگەلدى كەن ورنىنىڭ گازى ەسەبىنەن قامتاماسىز ەتىلەدى.
جەراستى قويمالارىندا گازدىڭ قاجەتتى قورى بار, قازىردىڭ وزىندە 3,4 ملرد م3 گاز نەمەسە جوسپارداعى كولەمنىڭ 96% گازى جۇكتەلگەن.