قازاقستان ۇلتتىق قۇراماسىنىڭ باس باپكەرى الەكساندر بوروديۋك الەم چەمپيوناتىنىڭ ىرىكتەۋ كەزەڭىندە چەرنوگورياعا قارسى وتكەن ماتچتان كەيىن باق وكىلدەرىنە سۇحبات بەردى.
وتە ۇيىمشىل, مىقتى كوماندادان ۇتىلدىق. چەرنوگوريا بارلىق جاعىنان مىقتى بولدى. فۋتبولدا سوعىلعان گولداردىڭ 60 پايىزى ستاندارتتى جاعدايدان كىرەدى. ال ستاندارتتىق جاعداي – ءبىزدىڭ ەڭ وسال تۇسىمىز. دايىندىقتا كوپ جاتتىققان ەدىك. بىراق ويىن كەزىندە قارسىلاسىمىزعا توسقاۋىل بولا المادىق.
بىزگە نە بولعانىن بىلمەيمىن. گول سوعاتىن مۇمكىندىكتەرىمىز دە بولدى. بىراق ساتتىلىك جولداس بولا قويمادى. چەرنوگوريا الەم چەمپيوناتىنا شىعۋ ءۇشىن جانتالاسىپ جاتقان كوماندا. بۇگىن ولار بارىن سالدى.
- ۇلتتىق قۇراماعا فۋتبولشىلاردى ىرىكتەيتىن كەزدە قانداي جايتتى العا قوياسىزدار؟ جارتىلاي قورعاۋشىلار مەن قورعاۋشىلار ءبىر-ءبىرىن مۇلدەم تۇسىنبەيتىنى انىق بايقالادى.
- مەنىڭ ويىمشا, ۇلتتىق قۇراماداعى جىگىتتەر – قازاقستان پرەمەر-ليگاسىنىڭ ۇزدىك ويىنشىلارى. بۇگىن وزدەرىن بار قىرىنان كورسەتە الماعان شىعار, بىراق جەكەلەگەن ەپيزودتاردا ەرەكشەلەنىپ جاتتى. ويىنشىلاردىڭ ءبىر-ءبىرىن تۇسىنبەۋى پسيحولوگيالىق تۇرعىدا دا اسەر ەتىپ جاتىر. بىراق تا چەرنوگوريا ويىنشىلارى الەمنىڭ ۇزدىك كوماندالارىندا ونەر كورسەتەتىنىن ۇمىتپاعان ءجون. سوندىقتان ولاردىڭ حالىقارالىق تاجىريبەسى دە كوبىرەك. بىزگە وسى جاعى دا جەتپەيتىن سياقتى. جاتتىعۋ كەزىندە دەڭگەيىمىز باسقا بولعانىمەن, الاڭدا اشىلىپ كورسەتە الماي جاتىر. ەگەر مۇمكىندىكتەرىمىزدى پايدالانعاندا جاعداي مۇلدەم باسقا باعىتتا ءوربيتىن بە ەدى!؟
- كوماندا مۇمكىندىكتەرىن پايدالانۋ جاعىنان اقساپ تۇر. الداعى ۋاقىتتا وسىنىڭ ورنىن قالاي تولتىرۋعا بولادى؟ سونداي-اق, ەكىنشى تايمدا اۋەدەگى دوپقا تالاسا الاتىن ۇزىن بويلى فۋتبولشىلاردىڭ ءبىرىن جىبەرۋ كەرەك پە ەدى؟
- سول مۇمكىندىكتەرىمىزدى ءتيىمدى پايدالانۋىمىز كەرەك ەدى. جاتتىعۋ كەزىندە دايىندالاتىن بولامىز. كوماندا وسىنداي قيىن ۇجىمدارمەن وتكىزگەن ويىنداردا شىنىعا تۇسەدى.
سونىمەن قاتار, العاشقى تايمدا جۋكوۆتىڭ جاراقاتى الاڭنىڭ ورتالىق تۇسىنا قيىندىق تۋدىردى. شابۋىل مەن قورعانىستى بايلانىستىراتىن بىردەن ءبىر ويىنشى سول بولاتىن. ونىڭ ۇستىنە قۋاتپەن «قايراتتا» ويناعاندىقتان, ءبىر-ءبىرىن جاقسى تۇسىنەر ەدى.
ال ۇزىن بويلى شابۋىلشىعا كەلەر بولساق, بالكىم شىعارۋىم كەرەك پە ەدى؟! بىراق ولاردىڭ قاقپاشىسى, ورتالىق قورعاۋشىلارى وتە تاجىريبەلى ەكەنىن دە ۇمىتپاعان ءجون.
– ورتالىق شابۋىلدا ۇزىن بويلى شابۋىلشى بولمادى, بىراق قاپتالدا ويناعان جىگىتتەر دوپتى تىم كوپ اۋەلەتىپ بەردى. وسى كەزدە نە نارسەدەن ۇمىتتەندىك؟
– مۇنداي تاپسىرمانى نىقتاپ بەرمەگەن ەدىك. بالكىم جىگىتتەر قاتتى قوبالجىعان بولار. ءبىز نەگىزىنەن قوس قاپتالدان شابۋىلداۋدى ءجون كوردىك.
– وتكەن جىلى ءبىز پولشامەن, رۋمىنيامەن تەڭ وينادىق. ءبىر جىل ىشىندە كوماندانىڭ ويىنى قۇلدىراپ كەتكەنى مە, الدە باسقا دا سەبەپتەر بار ما؟
– شىنىمدى ايتسام, بۇل سۇراققا جاۋاپ بەرۋىم قيىنداۋ. مۇمكىن نازاردان تىس قالدىرعان وزگە دە جايتتار بار شىعار. ال بۇگىنگى جەڭىلىسىمىزگە ءوزىمدى تولىقتاي كىنالى ەكەنىمدى مويىندايمىن.
ايان ءابدۋالي, «ەگەمەن قازاقستان»