قىتايعا قاراستى تايۆان پروۆينتسياسىنىڭ استاناسى تايپەيدە XXIX جازعى ۋنيۆەرسيادا-2017 ويىندارى اياقتالدى. 19 تامىزدا جالاۋى جەلبىرەگەن بايراقتى باسەكەگە الەمنىڭ 142 ەلىنەن كەلگەن 7600-دەن استام ستۋدەنتتەر سپورتتىڭ 21 ءتۇرى بويىنشا سىنعا تۇسكەن بولاتىن.
قازاقستان ۇلتتىق قۇراماسىنىڭ سپورتشىلارى سپورتتىڭ 14 ءتۇرى بويىنشا ەل نامىسىن قورعادى. بيىلعى جازعى ۋنيۆەرسيادانىڭ قورىتىندىسى بويىنشا, 120-عا جۋىق سپورتشىمىز 3 التىن, 6 كۇمىس جانە 7 قولا جۇلدە يەلەندى. جالپىكوماندالىق ەسەپتە ءبىزدىڭ ستۋدەنتتەر 16 مەدالمەن 21-ءشى ورىنعا تۇراقتادى. سونداي-اق, قازاقستان قۇراماسىمەن بىردەي مەدال جيناعان تۇركيا قۇراماسى 20-شى ورىنعا جايعاسقان. تۇرىكتەر بىزدەن كۇمىس جۇلدە ەسەبى بويىنشا العا شىققان. بۇل سىندا جاپونيا قۇراماسى ءبىرىنشى بولدى. كۇنشىعىس ەلى ستۋدەنتتەرىنىڭ ەنشىسىندە 101 مەدال بار (37 التىن, 27 كۇمىس جانە 37 قولا). وڭتۇستىك كورەيا سپورتشىلارى 82 جۇلدەمەن (30, 22, 30) ەكىنشى ورىندا تۇر. ال جارىستىڭ سوڭعى كۇنىندە رەسەي قۇراماسىن مەدال بويىنشا باسىپ وزعان تايۆان سپورتشىلارىنىڭ قورجىنىندا 90 مەدال بار (26, 34, 30).
وسىدان ەكى جىل بۇرىن وڭتۇستىك كورەيانىڭ كۆاندجۋ قالاسىندا وتكەن XXVIII جازعى ۋنيۆەرسيادا ويىندارىندا قازاق سپورتشىلارى 10 مەدال يەلەنىپ, جالپىكوماندالىق ەسەپتە 11-ءشى ورىننان كورىنگەن بولاتىن. سول جىلى ستۋدەنت سپورتشىلارىمىز 6 التىن مەن 4 قولانى قۇراما قورجىنىنا سالعان ەدى. ال ءبىرىنشى ورىندى وڭتۇستىك كورەيا سپورتشىلارى 108 مەدالمەن (47 التىن, 32 كۇمىس جانە 29 قولا) يەلەنگەن-ءدى.
ەكى جىل سايىن تۇراقتى تۇردە ۇيىمداستىرىلىپ تۇراتىن ستۋدەنتتەردىڭ كەلەسى ۋنيۆەرسياداسى 2019 جىلى يتاليانىڭ نەاپول قالاسىندا وتەدى.
ءالي بيتورە, «ەگەمەن قازاقستان»