استانادا تۇڭعىش رەت حالىقارالىق «جايدارمان» ويىنى ۇيىمداستىرىلدى. شارانى قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسىمەن ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى مەن قازاقستان كۆن وداعى ۇيىمداستىرعان بولاتىن.
قىرعىزستاننان, تاتارستان مەن باشقۇرتستان رەسپۋبليكالارىنان كەلگەن جانە قازاقستاندىق بىرنەشە توپ ونەر كورسەتكەن سايىس جوعارى دەڭگەيدە ءوتتى. بۇرىن «جايدارماننىڭ» ىشكى بىرىنشىلىگىنە قاتىسىپ, تاجىريبە جيناعان قىرعىزستاندىق جايدارمانشى جاستار ويىنعا تىڭعىلىقتى دايىندىقپەن كەلىپ, باس جۇلدەمەن قوسا 500 000 تەڭگە اقشالاي سىيلىقتى يەمدەندى. ءى ورىن مەن 350 000 تەڭگەنى قازىلار القاسى ءبىراۋىزدان تاتارستان قۇراماسىنا بەرسە, ءىى ورىن العان باشقۇرتستاننان كەلگەن كومانداعا 300 000 تەڭگە اقشالاي سىيلىق بۇيىردى. ال ءىىى ورىن مەن 150 000 تەڭگە ەكى كومانداعا – تورعاي ءوڭىرىنىڭ نامىسىن قورعاپ كەلگەن «ارۋ.كز» توبى مەن وڭتۇستىك قازاقستان وبلىسىنىڭ قۇراماسىنا بەرىلدى.
سونداي-اق, حالىقارالىق تۇركى اكادەمياسى جاركەنتتىك ۇيعىر جاستارىنان قۇرالعان «Lagman.com» توبى مەن تۇركىستاندىق وزبەك اعايىنداردىڭ قۇراماسى – «ياسسى» توبىنا 250 000 تەڭگە ارنايى اقشالاي سىيلىق ۇسىندى.
«جايدارمان» ارقىلى قازاق ءتىلىنىڭ سانگە اينالۋىنا زور ۇلەس قوسىپ جاتىرمىز. ماقساتىمىز – وسى ويىنداردى حالىقارالىق دەڭگەيگە جەتكىزۋ. بۇگىنگى ويىن وسى ماقساتتىڭ العىشارتى دەپ ويلايمىز», – دەدى «جايدارماننىڭ» جۇرگىزۋشىسى, قازاقستان كۆن وداعىنىڭ توراعاسى ەسەن ەلەۋكەن.
ءتول رۋحاني جوبانىڭ حالىقارالىق دەڭگەيگە شىققانىنا جينالعان جۇرتشىلىق شىنايى ىقىلاس تانىتتى. ونى كورەرمەن كوپشىلىكتىڭ دۋ قول شاپالاقتاپ, شارانىڭ سوڭىنا دەيىن قولپاشتاپ وتىرعانىنان دا بايقاۋعا بولادى. بۇعان قوسا, «جايدارمان» تۇركىتىلدەس ەلدەردىڭ جاستارىنىڭ ءوزارا ىنتىماقتاستىعى مەن رۋحاني-مادەني بايلانىستارىنا كەڭ ءورىس اشتى. الداعى ۋاقىتتا ويىندى «قازاقستان» ۇلتتىق ارناسىنان كورسەتۋ جوسپارلانىپ وتىر.
ءالي بيتورە, «ەگەمەن قازاقستان»