الماتى قالاسىنىڭ ەڭ كورىكتى دەمالىس ورىندارىنىڭ ءبىرى, قالا تۇرعىندارى مەن قوناقتارىنىڭ جۇرەگىنەن ورىن العان كوكتوبەدە اشىق اسپان استىنداعى مۋزىكا فەستيۆالى بيىل وسىمەن ەكىنشى رەت ۇيىمداستىرىلىپ وتىر.
«كوكتوبە وپەرا – 2017» مۋزىكا مەرەكەسى مۇنداعى ماڭىزدى فەستيۆالدەردىڭ ءبىرى, سەبەبى مىڭ-سان شامدارى جۇلدىزداي جامىراعان شاھاردىڭ توبەسىنەن قاراپ وتىرىپ تامىلجىعان تابيعات اياسىندا اباي اتىنداعى مەملەكەتتىك اكادەميالىق وپەرا جانە بالەت تەاترى سيمفونيالىق وركەسترىنىڭ سۇيەمەلدەۋىمەن ۇلتتىق وپەرا ونەرىنىڭ ارتيستەرى مەن الەمنىڭ ۇزدىك ساحنالارىنان شاقىرىلعان وپەرا جانە بالەت جۇلدىزدارىنىڭ ونەرىن تاماشالاۋ ادامعا ۇمىتىلماس اسەر سىيلايدى.
العاشقى فەستيۆال بىلتىر الماتىنىڭ 1000 جىلدىعىن مەرەكەلەۋ اياسىندا ۇيىمداستىرىلسا, بيىلعى «كوكتوبە وپەرا – 2017» «قالا كۇنى» مەن ەكسپو – 2017 حالىقارالىق كورمەسىنىڭ قۇرمەتىنە ورايلاستىرىلعان. كونتسەرت باستالماس بۇرىن, جۇلدىزدى اسپان استىن سۇلۋ سازبەن تەربەگەن بيىك تاۋ بوكتەرىندەگى مۋزىكا مەرەكەسىنە مارتەبەلى كورەرمەن رەتىندە كەلگەن قازاقستاننىڭ مەملەكەتتىك حاتشىسى گۇلشارا ابدىحالىقوۆاعا قالا اكىمى باۋىرجان بايبەك قايتا قالپىنا كەلتىرىلىپ, كوكتوبە تورىنە قويىلعان «سۇلۋشاش» پاننوسى تۋرالى اڭگىمەلەپ بەردى. تۋىندىلارى ترەتياكوۆ گاللەرەياسىنان ورىن العان اتاقتى سۋرەتشى مولداحمەت كەنباەۆ پەن ءمۇسىنشى نيكولاي تسيۆچينسكي 1970 جىلى «قازاقستان» دۇكەنى ورنالاسقان ءۇيدىڭ ءبىر قابىرعاسىنا قولىنا القا ۇستاعان ارۋدىڭ بەينەسىن موزايكامەن بەينەلەپ, وعان «سۇلۋشاش» دەپ اتاۋ بەرەدى. كەيىن 2000 جىلدارى «سۇلۋشاش» دۇكەن قابىرعاسىنان ءىزىم-عايىم جوق بولىپ كەتەدى.
قازاقتىڭ ءتول مادەنيەتىنەن حابار بەرەتىن ۇلتتىق بوياۋى قانىق سول حاس سۇلۋدىڭ بەينەسىن سۋرەتشىنىڭ ۇلى الپامىس كەنباەۆ قايتا جاڭعىرتىپ, قالا اكىمدىگىنىڭ كومەگىمەن جاڭارتىلعان تۋىندىنى بارشا الماتىلىقتار مەن شاھار مەيماندارىنىڭ سۇيىكتى مەكەنىنە اينالعان كوكتوبەگە اكەپ ورنالاستىرعانىن ايتتى. تامىزدىڭ تامىلجىعان تۇنىندەگى قۇستاي قالىقتاعان كلاسسيكالىق اۋەننىڭ سازى كورەرمەندى ەكى ساعاتتان ارتىق الديلەدى. بيىك تاۋدىڭ باۋرايىندا ساف داۋىسپەن شىرقالعان اسەم ءاننىڭ ارقايسىسى تاسقا بارىپ ءتۇيىسىپ, قۇلاققا قايتا شالقىپ جەتكەندەي ەرەكشە ەستىلدى.
جوعارى تالعاممەن توپتاستىرىلعان كونتسەرتتىك باعدارلامادا ۇلتتىق مۋزىكا ونەرىنىڭ جاۋھارلارى مەن الەمدىك كلاسسيكالىق ونەردىڭ التىن قورىنا ەنگەن تۋىندىلاردان ۇزىندىلەر شەبەر ۇيلەستىرىلگەندىكتەن, كورەرمەن ءبىر تىنىسپەن وتىرىپ تىڭدادى. اباي اتىنداعى اكادەميالىق وپەرا جانە بالەت تەاترىنىڭ سيمفونيالىق وركەسترى سۇيەمەلدەگەن دج.ۆەردي, دج.پۋچچيني, دج.روسسيني, ج.بيزە, پ.چايكوۆسكيدىڭ عاجايىپ شىعارمالارى قازاقستان رەسپۋبليكاسىنىڭ ەڭبەك سىڭىرگەن قايراتكەرى, «استانا وپەرا» تەاترىنىڭ باس ديريجەرى الان بورىباەۆتىڭ قولىنداعى تاياقشانىڭ قۇدىرەتىمەن سيقىرلى اۋەنگە اينالىپ, سۇلۋلىققا ىڭكار جاندارعا رۋحاني ءلاززات سىيلادى.
بيىلعى فەستيۆالدىڭ باستى قوناعى, يتاليادان ارنايى شاقىرىلعان بەلگىلى وپەرا ءانشىسى ستەفانو لا كوللا ءوز رەپەرتۋارىنداعى ەڭ ۇزدىك اريالارىنىڭ بىرنەشەۋىن ورىنداپ, كوپشىلىكتى تەنور داۋىسىنىڭ قۇدىرەتىمەن تەربەتتى. سونداي-اق, قازاقستان كلاسسيكالىق ونەرىنىڭ بەلدى وكىلدەرى, قازاقستاننىڭ ەڭبەك سىڭىرگەن قايراتكەرى ا.ترەگۋبەنكو, گ.داۋىرباەۆا, ج.باسپاقوۆا, ب.جومارتوۆ, قازاقستان مەملەكەتتىك سىيلىعىنىڭ لاۋرەاتى ت.كۇزەنباەۆ, حالىقارالىق كونكۋرستاردىڭ لاۋرەاتتارى و.داۆىدەنكو, ن.نادەنوۆا, ە.نيكونوۆا, ز.التىنباەۆا, ە.ساكاۆوۆ, د.تالاسبەكوۆا, د.سادۋاقاسوۆ, ح.نۇراليەۆ, ن.مەزينا, و.تاميروۆ جانە تەاتردىڭ بالەت ترۋپپاسى قوناقتاردى ونەرىمەن تامساندىردى.
ايگۇل احانبايقىزى,
«ەگەمەن قازاقستان»
الماتى