قازاقستان كوماندالارىمەن بىرگە, شەتەلدىك مەيمانداردىڭ قازاق تىلىندە ونەر كورسەتۋى كورەرمەندەردىڭ زور ىقىلاسىنا يە بولدى. «جايدارمان» ويىنىندا وسكەمەننەن «التاي», قوستانايدان «ارۋ.كز», ۇيعىر ۇلتىنىڭ «لاعمان.كوم», باشقۇرتستاننىڭ «ۋفا» قۇراماسى مەن وزبەكستان كۆن-شىلەرى, قىرعىزستاننىڭ «پوزيتيۆ», الماتى وبلىسىنىڭ «جەتىسۋ», قازاقستاننىڭ نامىسىن قورعاعان «قازاق جىگىتتەرى», تاتارستاننىڭ «قازان» قۇراماسى مەن وڭتۇستىك قازاقستان قۇراماسى ءوزارا سىنعا ءتۇستى.
العاش بولىپ وسكەمەننەن كەلگەن «التاي» قۇراماسى ويىندى باستاسا, بۇدان كەيىن شىققان ۇيعىر ۇلتىنىڭ «لاعمان.كوم» كومانداسى جينالعان جۇرتشىلىقتى كۇلكىگە قارىق قىلدى. قازاق تىلىنە جەتىك ويناپ بەرگەن ۇيعىر كۆن-شىلەرىنىڭ ونەرى ۇدەدەن شىعا ءبىلدى. بۇدان كەيىنگى تاتار, قىرعىز, باشقۇرت اعايىنداردىڭ ويىنى دا قازاقستاندىق كوماندالاردان كەم تۇسە قويعان جوق. بۇل تۇستا كوماندالاردىڭ ەرەكشە دايىندىقپەن كەلگەنىن اتاپ وتكەن ءجون.
10 كوماندانىڭ تارتىستى ويىنىنىڭ قورىتىندىسى بويىنشا ءۇشىنشى ورىندى (150 مىڭ تەڭگە) وڭتۇستىك قازاقستان وبلىسى مەن قوستاناي قۇراماسىنىڭ «ارۋ.كز» كومانداسى, ەكىنشى ورىندى (300 مىڭ تەڭگە) باشقۇرتستان قۇراماسى يەلەندى. جۇلدەلى ءبىرىنشى ورىندى (350 مىڭ تەڭگە) تاتارستان قۇراماسى جەڭىپ السا, باس جۇلدە ( 500 مىڭ تەڭگە) قىرعىزستاننىڭ «پوزيتيۆ» قۇراماسىنىڭ ەنشىسىندە كەتتى.
«قادىرلى قاۋىم! جاڭا عانا قازىلار القاسىمەن اقىلداستىق. كىشكەنە شەگىنىس جاساعىم كەلەدى. ەسەن ەلەۋكەننىڭ وسى باستاماسىن ەستىپ, بىردەن قولداۋ بىلدىردىك, قۋاندىق. وزدەرىڭىز بىلەتىندەي, ەلباسىنىڭ باستاماسىمەن اشىلعان تۇركى اكادەمياسى بار. جاستاردىڭ تىلىمەن حالىقتاردىڭ مادەنيەتىن, ءداستۇرىن بايلانىستىرۋعا مۇمكىندىك تۋىپ وتىر ەكەن. ەندەشە, قازىلار القاسىمەن اقىلداسا كەلە, ۇيعىر جانە وزبەك كوماندالارىنا تۇركى اكادەمياسىنىڭ اتىنان 250 مىڭ تەڭگەدەن ارنايى سىيلىق تاپسىرامىز», - دەدى قازىلار القاسىنىڭ مۇشەسى دارحان قىدىرالى.
ويىن سوڭىندا جەڭىمپاز كوماندالاردىڭ بارلىعىنا العىس حاتتار مەن جۇلدەلەرى تابىس ەتىلدى.
«كورشى اقىسى تۇگەندەلگەندەي سەكىلدى بۇگىن. مەنىڭ ويىمشا, «بارمىسىڭ, باۋىرىم» باعدارلاماسىنىڭ ءرولىن بۇگىن «جايدارمان» اتقارىپ بەرگەن سەكىلدى. «جايدارمان» تۋىستارىمىزدى تاۋىپ بەردى. ءبارىمىز دە ءبىر انادان تۋعانبىز. الەمدى ماحاببات قۇتقارادى دەپ جاتادى عوي. ال مەن الەمدى دوستىق قۇتقارادى دەر ەدىم. دوستىعىمىز ارتا بەرسىن», - دەدى قازىلار القاسىنىڭ مۇشەسى, «QAZAQ RADIOLARY» مەكەمەسىنىڭ باسشىسى ءمادي ماناتبەك.