ليۆيانىڭ ۇلتتىق وتپەلى كەڭەسىنىڭ وكىلى ەلدىڭ ەكس-پرەزيدەنتى مۋاممار كاددافيدىڭ كەنجە ۇلىنىڭ ۇستالعانى تۋرالى اقپاراتتى تەرىسكە شىعاردى. بۇعان دەيىن مۋتاسسيم كاددافيدىڭ اكەسىنىڭ تۋعان قالاسى – سيرتتا قولعا تۇسكەنى تۋرالى حابار تاراعان بولاتىن.
ۇلتتىق وتپەلى كەڭەس وكىلىنىڭ سوزىنە قاراعاندا, شىنىندا سيرت توڭىرەگىندە مۋتاسسيم كاددافيگە جاقىن ادامدار ۇستالعان. بىراق ونىڭ ءوزى قولعا تۇسپەگەن. جانە ونىڭ ءدال قازىر قاي جەردە جاسىرىنىپ جۇرگەنى دە بەلگىسىز. بۇگىندە ۇلتتىق وتپەلى كەڭەس ليۆيانىڭ باني-ۆاليد قالاسىنان باسقا اۋماقتىڭ بارىنە ءوز باقىلاۋىن جۇرگىزىپ وتىر.
قارجىلاندىرۋدى ساقتاۋعا كەڭەس بەردى
اقش مەملەكەتتىك حاتشىسى حيللاري كلينتون پرەزيدەنت باراك وباماعا ۆاشينگتوننىڭ بۇۇ-نى قارجىلاندىرۋعا قاتىسۋىن شەكتەيتىن زاڭ جوباسىنا ۆەتو قويۋدى ۇسىندى. ويتكەنى, دەيدى مەملەكەتتىك حاتشى, زاڭ وسى كۇيىندە قابىلدانىپ كەتسە, اقش-تىڭ ۇلتتىق قاۋىپسىزدىگىنە قاتەر تونەدى.
قازىرگى كەزدە قۇراما شتاتتار بۇۇ بيۋدجەتىنىڭ تورتتەن ءۇشىن ءبىر ءوزى قارجىلاندىرادى. سوندىقتان دا اتالعان ۇيىم كوپ جاعدايدا اقش-تىڭ ايتقانىنان شىعا المايدى. ح.كلينتوننىڭ ۇلتتىق قاۋىپسىزدىككە قاتەر تونەدى دەگەندە وسىنى مەڭزەگەنى كۇمانسىز. وسى سەبەپتى اق ءۇيدىڭ زاڭ جوباسىنىڭ ەسكى نۇسقاسىندا قابىلدانۋىنا جول بەرمەيتىنى تۇسىنىكتى.
ءپۋتيندى ۇسىناتىن ۋاقىت بەلگىلەندى
«ەدينايا روسسيا» پارتيا سەزىنىڭ ەكىنشى بولىگىن 27 قاراشادا وتكىزۋدى جوسپارلاپ وتىر. بۇل جونىندە «ەر» باس كەڭەسى تورالقاسىنىڭ حاتشىسى سەرگەي نەۆەروۆ مالىمدەدى. وسى سەزدە پارتيا سەركەسى ۆلاديمير پۋتين رەسەي پرەزيدەنتتىگىنە رەسمي تۇردە ىلگەرىلەتىلەتىن بولادى.
رەسەي پرەزيدەنتىن سايلاۋ شامامەن 2012 جىلدىڭ 4 ناۋرىزىنا بەلگىلەنبەك. ال رەسەي ۇكىمەتىنىڭ قازىرگى توراعاسىنىڭ پرەزيدەنتتىك سايلاۋعا تۇسەتىنى 24 قىركۇيەكتە-اق بەلگىلى بولعان ەدى. سەزدىڭ ءبىرىنشى بولىگىندە ءىس باسىنداعى پرەزيدەنت دميتري مەدۆەدەۆ ۇكىمەت توراعاسىنىڭ پايداسىنا پرەزيدەنتتىككە تۇسۋدەن باس تارتقان بولاتىن.
قارا ءناسىلدى سۋىرىلىپ العا شىقتى
قارا ءناسىلدى كاسىپكەر حەرمان كەين اقش-تىڭ رەسپۋبليكالىق پارتياسىنان پرەزيدەنتتىككە كانديداتتىق كۇرەسىندە كوشباسشى ورىنعا كوتەرىلدى. ەلدەگى بەلگىلى تەلەارنا سايتىندا جاريالانعان سوڭعى سۇراۋ سالۋلار ناتيجەسى وسىلاي دەپ وتىر.
ح.كەينگە الداعى پرايمەريزدە رەسپۋبليكاشىلاردىڭ 27 پايىزى ءوز داۋىستارىن بەرۋگە ءازىر ەكەندىكتەرىن مالىمدەسە, ماسساچۋسەتستىڭ بۇرىنعى گۋبەرناتورى ميتت رومنيگە – 23 پايىز, تەحاس گۋبەرناتورى ريك پەرريگە – 16 پايىز, كونگرەسسمەن رون پولعا 11 پايىز داۋىس بەرىلمەكشى ەكەن. ال مۇنىڭ الدىنداعى سۇراۋ سالۋلاردىڭ قورىتىندىسىندا رومني مەن پەرري كوش باسىندا تۇرعان بولاتىن.
بۋشتى تۇتقىنداۋعا ءوتىنىش جاسادى
«حالىقارالىق امنيستيا» قۇقىق قورعاۋ ۇيىمى كانادا باسشىلىعىنا اقش-تىڭ بۇرىنعى پرەزيدەنتى كىشى دجوردج بۋشتى تۇتقىنداۋعا ءوتىنىش جاسادى. قۇقىق قورعاۋشىلاردىڭ پىكىرىنشە, بۋش ادام قۇقىن بۇزىپ, وبب-عا تۇتقىنداعىلاردى ازاپتاۋ تاسىلدەرىن قولدانۋعا تاپسىرما بەرگەنى ءۇشىن جازا تارتۋى ءتيىس.
قۇقىق قورعاۋ ۇيىمى حالىقارالىق قوعامداستىق بۋشتى جاۋاپكەرشىلىككە تارتۋى ءتيىس دەپ سانايدى. ويتكەنى, اقش باسشىلىعى مۇنداي قادامنان باس تارتىپ وتىر. ال قۇراما شتاتتاردىڭ بۇرىنعى پرەزيدەنتى 20 قازاندا سۋررەي قالاسىندا وتەتىن ەكونوميكالىق سامميتكە قاتىسۋ ءۇشىن كاناداعا كەلۋى ءتيىس. ۇستىمىزدەگى جىلدىڭ اقپانىندا وسىنداي تالاپ سالدارىنان بۋش شۆەيتسارياعا ساپارىنان باس تارتۋعا ءماجبۇر بولعان ەدى.
ايەلى – قاراپايىم وتباسىنان شىققان قىز
افريكاداعى بۋتان دەگەن شاعىن عانا مەملەكەت بۇعان دەيىن توماعا-تۇيىق تىرشىلىك كەشىپ كەلگەن-ءتىن. سوڭعى كەزدەرى ول حالىقارالىق قوعامداستىققا ازداپ بولسا دا اشىلا باستادى. وسىنىڭ ايعاعىنداي, بۋتان كورولى دجيگمە كحەسار نامگيال ۆانگچۋكتىڭ قاراپايىم وتباسىنان شىققان قىزعا ۇيلەنگەنى بەلگىلى بولىپ وتىر.
ۆانگچۋك الەمدەگى تاۋەلسىز مەملەكەتتەر ىشىندەگى ەڭ جاس مونارح بولىپ تابىلادى. ال كەلىنشەگى قاراپايىم وتباسىنان شىققان دەگەندە, قايىن اتاسى كادىمگى ۇشقىش كورىنەدى. دجەتسۋن پەمانىڭ ءوزى بولسا ستۋدەنت ەكەن. كورولدىڭ جاسى 31-دە, كەلىنشەگىنىكى 21-دە. حرامداعى ۇيلەنۋ سالتاناتى ۇلتتىق تەلەۆيزيا ارقىلى بۇكىل ەلگە كورسەتىلىپتى. بارلىق راسىمدەر اياقتالعاننان كەيىن كورول مەن پاتشايىم بال ايى ساياحاتىنا اتتانباقشى.
قىسقا قايىرىپ ايتقاندا:
ۋكراينانىڭ بۇرىنعى پرەمەر-ءمينيسترى يۋليا تيموشەنكونىڭ رەسەيدىڭ «گازپروم» كومپانياسىمەن كەلىسىم-شارت جاساسۋ كەزىندە ءوز وكىلەتتىگىن اسىرا پايدالاندى دەگەن ايىپپەن جەتى جىلعا سوتتالعانى بەلگىلى. ونىڭ قىزى ەۆگەنيا كارر مۇنى «تەحنيكالىق قاتەلىك» جانە «كەك قايتارۋ اكتىسى» دەپ مالىمدەپ, اناسىنىڭ جاقىن ارادا بوستاندىققا شىعاتىنىنا سەنىم ءبىلدىردى.
«ەدينايا روسسيا» مەملەكەتتىك دۋماعا سايلاۋدا كەم دەگەندە 65 پايىز داۋىس جيناۋ تۋرالى تاپسىرما الدى دەگەن اڭگىمەنى تەرىسكە شىعاردى. مۇنىڭ الدىندا پرەزيدەنت اكىمشىلىگى تاراپىنان گۋبەرناتورلارعا سايلاۋدا «ەر»-نى كەم دەگەندە 65 پايىز داۋىسپەن قامتاماسىز ەتەسىڭدەر دەگەن تۇرعىدا تاپسىرما بەرىلدى دەگەن حابار تاراعان بولاتىن.
ارمەنيادا 12 قازاندا حالىق ساناعى باستالدى. ول 21 قازانعا دەيىن سوزىلادى. بۇل ەلدەگى كسرو ىدىراعاننان بەرگى ەكىنشى جالپىحالىقتىق ساناق بولىپ تابىلادى. ساناقتىڭ تۇتاستاي قورىتىندىسى كەلەر جىلدىڭ كۇزىندە جاريالانادى دەپ كۇتىلۋدە. ال 2001 جىلى جۇرگەن سوڭعى ساناقتا ارمەنيا حالقىنىڭ سانى 3 ميلليون ادامدى قۇراعان بولاتىن.
بەرليننىڭ باتىس جاعىنداعى تەمىر جولدارعا بەلگىسىز بىرەۋلەر قايتا-قايتا بەنزيننەن جاسالعان جارىلعىش بومبالار قويىپ جاتىر. سوڭعى كۇندەرى نەمىس استاناسىندا جانە براندەنبۋرگ تەمىر جولىندا وسىنداي بىرنەشە وقيعا تىركەلدى. جارىلىس سالدارىنان بەرلين مەن گاننوۆەر جانە ۆولفسبۋرگ قالالارى ارالىعىندا قاتىنايتىن پويىزدار جۇرمەي قالدى.
ينتەرنەت ماتەريالدارى نەگىزىندە ازىرلەندى.