حالىق ەڭبەكتىڭ قادىرىن ءتۇسىنىپ, ەشكىمگە قول جايمايتىنداي تىرلىك كەشۋدە. ءبىرى مال, ءبىرى كاسىبىن اشسا, ەندى ءبىرى قۇس ءوسىرۋدى قولعا العان. ءايتەۋىر, قول قۋسىرىپ قاراپ وتىرۋدان اۋلاق. ءماسەلەن, پانفيلوۆ اۋدانىنداعى «كارىم» شارۋا قوجالىعى ۇيرەك ءوسىرىپ, ونىڭ ەتىن ءوندىرۋدى قولعا الىپتى. قوجالىقتا قازىردىڭ وزىندە 70 مىڭعا جۋىق ۇيرەك باعىلۋدا. ينكۋباتورلاردان ايىنا 48 مىڭ بالاپان شىعارىلادى. قوندىرعى تولىق اۆتوماتتاندىرىلعان. جاڭا شىققان بالاپاندار ارنايى كامەرالاردا قاناتى قاتايعانشا 2-3 تاۋلىك بولادى. ءدارى-دارمەك ەگىلگەن سوڭ بالاپاندار ارنايى فەرمالارعا بولىنەدى.
– قازىر ەت قىمباتتاپ, تۇتىنۋشى سۇرانىسىن قاناعاتتاندىرۋ ءمىندەتى تۇر. وسىنى ەسكەرىپ, ۇيرەك فەرماسىن قۇردىم. قۇس ەتىنىڭ قۋاتى مول, ءارى جەڭىل تاعام. باعاسى قىمبات ەمەس, كيلوسى – 500 تەڭگە. بولاشاقتا ونىمدەرىمىزدى ەلىمىزدىڭ بارلىق قالالارىنا شىعارۋمەن قاتار وزگە ەلدەرگە ەكسپورتتاۋدى دا جوسپارلاپ وتىرمىز, – دەيدى «كارىم» شارۋا قوجالىعىنىڭ باسشىسى عازيز سۋفيانوۆ.
قوجالىقتاعى ءار ءبولىمشەدەگى 6-7 مىڭ ءۇيرەكتىڭ جەم-ءشوبى مەن سۋىن جۇمىسشىلار ۋاقىتىلى بەرەدى, كۇتەدى. جۇمىسشىلارعا ارنالىپ, ءۇي سالىنۋدا. ايلىقتارى شامامەن 100 مىڭ تەڭگەدەن اسادى ەكەن. سودان بولار جۇمىسشىلار وسىندا تۇراقتاپ قالۋعا مۇددەلى. بۇگىندە شارۋا قوجالىعى عىلىمي-زەرتتەۋ ورتالىقتارىمەن دە بىرلەسە جۇمىس جاساپ, بولاشاقتا ۇيرەكتىڭ قازاقستاندىق تۇقىمىن شىعارۋدى العا قويعان.
اۋداندا قۇس شارۋاشىلىعى ەندى-ەندى دامىپ كەلەدى. ۇكىمەت تاراپىنان سالاعا قولداۋ جاسالىپ, كوڭىل ءبولىنۋدە. «قازاگروقارجى» اق شارۋا قوجالىعىنا 90 ميلليون تەڭگە نەسيەلىك قارجى قاراستىرعان. ۇجىم ونىڭ 60 ملن. تەڭگەسىن الىپتى. ەندى قىتايدان قاجەتتى قۇرال-جابدىق اكەلىپ, جوسپارلى جۇمىستارىن جالعاستىرماقشى.
جىل سوڭىنا دەيىن شارۋا قوجالىعى 200 مىڭ توننا ۇيرەك ەتىن ساتۋدى جوسپارلاپ وتىر. جاڭا قوندىرعىلار ورناتىلعاندا بۇل كورسەتكىش ەسەلەپ ارتادى. قازىر شارۋاشىلىقتا 3 مىڭنان استام ۇيرەك بولسا, الداعى جىلى ونىڭ سانىن 2 ەسەگە ارتتىرۋ كوزدەلىپ, ۇجىم مۇشەلەرى قۇستى دارىگەرلىك تالاپتارعا ساي باپتاپ, كۇتۋدى جاقسارتا تۇسكەن.
كۇمىسجان بايجان.
الماتى وبلىسى.