«قالاۋىن تاپسا, قار جانادى», دەپ جاتادى حالقىمىز. اباي اۋدانىندا ەلباسىمىزدىڭ تىكەلەي تاپسىرماسىمەن جۇزەگە اسىرىلىپ جاتقان «جۇمىسپەن قامتۋ – 2020» باعدارلاماسى اياسىندا جۇمىسسىزداردى, ءوز بەتىنشە جۇمىسپەن اينالىسۋشىلاردى, تابىسى تومەن ادامداردى وقىتۋ جانە ولاردىڭ جۇمىسقا ورنالاسۋىنا جاردەمدەسۋ باعىتىندا جۇيەلى جۇمىستار اتقارىلۋدا.
ەستىپ, بىلۋىمىزشە, اۋدان اكىمى تۇرسىنعازى مۇساپىربەكوۆ وسى ماقساتپەن وبلىستىق ءبىلىم, الەۋمەتتىك قورعاۋ جانە جۇمىسپەن قامتاماسىز ەتۋ باسقارمالارىمەن ءوزارا كەلىسىم ارقىلى باسقا اۋدانداردا يگەرىلمەي جاتقان قارجى ەسەبىنەن وزدەرىندە قىسقا مەرزىمدى كۋرستار اشۋعا قول جەتكىزىپتى. سونىڭ ناتيجەسىندە بيىلعى جاڭا وقۋ جىلىنان باستاپ اۋدانداعى №24 كاسىپتىك ليتسەيدە ۆەتەرينار-وپەراتور ماماندىعى بويىنشا 3 جانە 10 ايلىق كۋرستار اشىلعان كورىنەدى. ولاردا 50 وقۋشى ءبىلىم الۋدا.
كۋرس وقۋشىلارى 12 مىڭ تەڭگە كولەمىندە شاكىرتاقى جانە ءبىر مەزگىل تەگىن تاماقپەن قامتاماسىز ەتىلگەن. كۋرستى بىتىرگەندەرگە ارنايى كۋالىك بەرىلمەك. ولاردى وقىتۋ ءۇشىن ەكى مۇعالىم ءبولىنىپ وتىر.
مۇنىڭ سىرتىندا جيىرما شاقتى جاس سەمەيگە ءتۇرلى كۋرستارعا وقۋعا جىبەرىلىپتى. ولار قازىردە اۋىلدى جەردە تاپتىرمايتىن دانەكەرلەۋشى, سانتەحنيك, سلەسار, اسپاز, ءىس قاعازدارىن جۇرگىزۋشى ماماندىقتارىن مەڭگەرىپ جاتىر. مۇنى دا وڭدى ءىس دەپ بىلەمىز.
اتالعان اۋداندا وسىنداي يگىلىكتى شارالارمەن بىرگە, كاسىپكەرلىكتى دامىتۋ ماقساتىندا اجەپتاۋىر مولشەردە شاعىن نەسيە الۋعا قول جەتكىزىلىپتى. ول كەمىندە الپىس شاقتى ادامعا تاراتىلماق. بۇل دا جۇمىسپەن قامتاماسىز ەتۋ باعدارلاماسى نەگىزىندە اتقارىلىپ جاتقان يگى شارۋانىڭ ءبىر پاراسى بولىپ تابىلادى. «ىزدەنگەن جەتەر مۇراتقا» دەگەندەي, وسىنداي-وسىنداي يگى تالپىنىستى قۇپتاماسقا بولمايدى.
داۋلەت سەيسەن ۇلى.
شىعىس قازاقستان وبلىسى.