– بىزدە ءاربىر ەكىنشى مەكتەپتىڭ شاتىرى ەسكىرىپ كەتكەن, – دەدى ءبىلىم ءبولىمىنىڭ باستىعى ناتاليا فەسەنكو. – سوندىقتان دا قاي مەكتەپتى قالاي جوندەۋ كەرەكتىگىن ديرەكتورلار جيىنىندا انىقتاپ وتىرامىز. ءبىر وكىنىشتىسى, جىل سايىن بيۋدجەت قورجىنى ۇلعايسا دا, ءبىلىم وردالارىن قالپىنا كەلتىرۋگە, جاڭا وقۋ جىلىنا دايىنداۋعا اقشا از بولىنەدى. وسى جاعى تۇسىنىكسىز. سەمەيدە كوپتەگەن مەكتەپتەر وزدەرىنىڭ كەزەگىن كۇتۋگە ءماجبۇر. باسىم كوپشىلىگىنىڭ جوندەۋ كورمەگەنىنە 50-60, 90 جىلداي بولعان. ولار شاتىرىن جوندەۋدى جىلداپ كۇتۋگە شامالارى جەتە مە, جوق پا, ول جاعى بەلگىسىز. ماسەلەن, بيىل №35 مەكتەپتە ىلعال سالدارىنان ءبىر سىنىپتىڭ توبەسى قۇلاپ ءتۇسىپتى. №28 مەكتەپتە توبە مەن قابىرعاسى كوگەرىپ, زەڭ باسىپ كەتكەن. سوندىقتان دا, شاعىن سپورتزالدى جاۋىپ تاستاۋعا ءماجبۇر بولعان. بۇل جەردە بۇرىندارى باستاۋىش سىنىپ وقۋشىلارى جاتتىققان ەكەن. – بالالاردىڭ دەنساۋلىعى ءۇشىن تۇتىنۋشىلار قۇقىعىن قورعاۋ باسقارماسىنىڭ ماماندارى زەڭنەن كوگەرىپ كەتكەن مەكتەپتەرگە بالالاردى كىرگىزۋگە تىيىم سالدى. بۇل دۇرىس. ءبىز ءبىلىم وردالارىنىڭ باسشىلارىنا دەمەۋشىلەرمەن جۇمىس ىستەۋدى تاپسىرىپ وتىرمىز. قوعامدىق جانە حالىقارالىق ۇيىمدارمەن بىرلەسە جۇمىس ىستەڭدەر دەپ جاتىرمىز. جاپونيالىق ء«شوپ تامىرى» اتتى جوبا بويىنشا قالاداعى كەيبىر مەكتەپتەر ەسكى تەرەزەلەرىن پلاستيككە ايىرباستاپ الدى. ال اۋىلداعى بىرنەشە مەكتەپتەر جاپونيا ەلشىلىگىنە جوبالارىن ۇسىندى. جانە اتا-انالار بىرلەستىگىمەن دە جۇمىس ىستەۋ كەرەك, – دەدى ناتاليا فەسەنكو. الداعى ۋاقىتتاردا مەكتەپتەردە دەمەۋشىلەر اتىنداعى كابينەت اشىلماق. بۇل ولاردى قارجىلىق جاعىنان تارتۋعا ارنالعان شارانىڭ ءبىرى بولسا كەرەك. كاسىپكەر اتىنداعى قايىرىمدىلىق بولمەسى قالا مەكتەپتەرىنىڭ بىرىندە اشىلعان دا ەكەن. دەسەك تە, مۇنىڭ دۇرىس-بۇرىستىعىن الداعى ۋاقىت كورسەتەر. ال ازىرشە سەمەي مەكتەپتەرىن جوندەۋگە قوسىمشا قارجى كوزى جەتپەي جاتىر. بۇل ماسەلەنى ارنايى شەشۋ ءۇشىن وبلىسقا ءوتىنىش جازدىق, جاۋابىن توسىپ وتىرمىز, دەيدى ناتاليا فەسەنكو.
راۋشان نۇعمانبەك
سەمەي
سۋرەتتى تۇسىرگەن اۆتور