رەسپۋبليكانىڭ كۇش جانە قۇقىق قورعاۋ قۇرىلىمدارىنىڭ, مينيسترلىكتەر مەن ۆەدومستۆولاردىڭ باسشىلارىمەن بىرگە, قۇرمەتتى قوناقتار قاتارىندا شەتەلدىك ەلشىلىكتەر دەلەگاتسيالارىنىڭ جەتەكشىلەرى, شەتەلدىك ارناۋلى قىزمەت وكىلدەرى مەن ارداگەرلەرى بولدى.
قازاقستان پرەزيدەنتى ەلىمىزدە بەيبىتشىلىك پەن تۇراقتىلىقتى ساقتاۋ ءۇشىن ءوز ءومىرىن قۇربان ەتكەن ۇقك قىزمەتكەرلەرىنىڭ ەڭبەكتەرىن ەرەكشە اتاپ ءوتىپ, ولاردى ءبىر مينۋت ۇنسىزدىكپەن ەسكە الۋعا شاقىردى.
مەملەكەت باسشىسى دوستاستىق ەلدەرىنىڭ قاۋىپسىزدىك ورگاندارىنىڭ باسشىلارىنا قازاقستانداعى ارىپتەستەرىمەن تىعىز بايلانىس ورناتىپ, ءوزارا جەمىستى ءىس-قيمىل جاساپ كەلە جاتقانى ءۇشىن العىس ايتتى.
نۇرسۇلتان نازارباەۆ قازاقستاننىڭ تاۋەلسىزدىك جىلدارىنداعى جەتىستىكتەرىنە توقتالىپ, ۇلتتىق قاۋىپسىزدىك ورگاندارى قىزمەتكەرلەرىنىڭ مەملەكەتىمىزدىڭ ەگەمەندىگى مەن كونستيتۋتسيالىق قۇرىلىمىن ساقتاۋداعى ءرولىن اتاپ ءوتتى.
– ءبىز «قازاقستان-2050» ستراتەگيالىق باعدارلاماسىن ىسكە اسىرۋدامىز. ونىڭ ماقساتى – الەمنىڭ وزىق دامىعان وتىز ەلىنىڭ قاتارىنا ەنۋ. وعان تابىستى قول جەتكىزۋدىڭ باستى شارتتارى – توڭىرەگىمىزدە بەيبىت ءومىر مەن تىنىشتىقتى قامتاماسىز ەتۋ, سونداي-اق قازاقستان قوعامىندا ىشكى ساياسي تۇراقتىلىق پەن كەلىسىم ورناتۋ, – دەدى ەلباسى.
قازاقستان پرەزيدەنتى ەلىمىزدىڭ ەگەمەندىگى مەن اۋماقتىق تۇتاستىعىن قامتاماسى ەتۋ ءۇشىن كۇرەسكەن قاھارمان بابالارىمىزدىڭ ەرلىگىن ەستە ساقتاۋدىڭ ماڭىزدىلىعىن ايتتى.
مەملەكەت باسشىسى قوعامىمىزعا قارسى باعىتتالعان تەرىس يدەولوگيا مەن دەسترۋكتيۆتى اعىمداردىڭ جولىن كەسۋ جونىندەگى ءىس-قيمىلدىڭ قاجەت ەكەنىن اتاپ ءوتتى.
– حالىقارالىق تەرروريستىك جانە ءدىني-ەكسترەميستىك ۇيىمدارعا ارقا سۇيەگەن راديكالدى توپتاردىڭ زالىم ارەكەتتەرى ۇلتتىق قاۋىپسىزدىگىمىزگە ەلەۋلى قاۋىپ-قاتەر ءتوندىرىپ وتىر. بۇل زۇلماتپەن ىمىراسىز كۇرەس جۇرگىزۋگە بۇكىل قازاقستان قوعامى تولىق قولداۋ كورسەتۋدە. وسى جوعارى سەنىمدى تەرىس يدەولوگيا مەن دەسترۋكتيۆتى اعىمداردىڭ جولىن قاتاڭ تۇردە كەسۋ جونىندەگى جۇيەلى ءارى ءتيىمدى قىزمەت ەتۋ ارقىلى اقتاۋ قاجەت, – دەدى نۇرسۇلتان نازارباەۆ.
سونىمەن بىرگە, ەلباسى اقپاراتتىق جەلىلەر مەن رەسۋرستارعا حاكەرلىك شابۋىلدار جاساۋ سياقتى جاھاننىڭ جاڭا قاۋىپ-قاتەرلەرىن اتاپ, «قازاقستاننىڭ كيبەرقالقانىن» قۇرۋدىڭ وزەكتىلىگىنە توقتالدى.
قازاقستان پرەزيدەنتى جاھاندىق قاۋىپسىزدىكتىڭ جاڭا قاتەرلەرىنىڭ پايدا بولۋىنا اكەپ سوعاتىن الەمدىك دامۋداعى تەڭسىزدىكتەردىڭ سالدارلارىنا دا نازار اۋداردى.
– ازىق-ت ۇلىككە, اۋىز سۋعا, مەديتسينالىق كومەككە قول جەتكىزۋ پروبلەمالارىنىڭ ءورشۋى اياسىندا الەمدىك دامۋداعى تەڭسىزدىك اسا قاۋىپتى جاعداي تۋعىزۋدا. بۇل تۇتاس قۇرلىقتار مەن وڭىرلەردى قامتىعان جاھاندىق ميگراتسياعا اكەپ سوقتىردى. وزىنە جانە وتباسىنا جاقسى ءومىر ىزدەگەن ادامداردىڭ اراسىندا تەرروريستەر مەن قىلمىسكەرلەر, ۇگىتشىلەر مەن ەسىرتكى ساتۋشىلار دا جاسىرىنۋى مۇمكىن, – دەدى مەملەكەت باسشىسى.
نۇرسۇلتان نازارباەۆ الەمنىڭ قازىرگى بارلىق سىن-تەگەۋرىندەرى مەن قاۋىپ-قاتەرلەرىنە قارسى تۇرۋ ءۇشىن ۇقك قىزمەتكەرلەرىنىڭ كاسىبي قابىلەتى مەن بىلىكتىلىگىن جەتىلدىرۋ قاجەتتىگىن اتاپ ءوتتى.
– جىل باسىندا ۇلتتىق قاۋىپسىزدىك كوميتەتى مەن ونىڭ ۆەدومستۆولارىنىڭ جاڭا قۇرىلىمى بەكىتىلدى. ءوزارا ءىس-قيمىل جاساۋ مەن كۇش-قۋاتتى قايتا ورنالاستىرۋدىڭ جاڭارتىلعان جۇيەسى مەيلىنشە ءتيىمدى جۇمىس جۇرگىزۋگە مۇمكىندىك بەرەدى. ۇلتتىق قاۋىپسىزدىك كوميتەتىنىڭ قىزمەتكەرلەرى الداعى ۋاقىتتا دا وتانىمىزعا ءمىنسىز قىزمەت ەتىپ, ەلىمىزدى كوركەيتۋ جانە ۇلتتىق مۇددەمىزدى قورعاۋ جولىندا وزدەرىنىڭ بارلىق كۇشىن, ءبىلىمى مەن تاجىريبەسىن جۇمسايتىنىنا سەنىمدىمىن, – دەدى ەلباسى.
سوڭىندا قازاقستان پرەزيدەنتى قىزمەتتىك پارىزىن ورىنداۋدا ەرلىك مەن جانكەشتىلىك كورسەتكەن ۇلتتىق قاۋىپسىزدىك ورگاندارىنىڭ ۇزدىك قىزمەتكەرلەرىنە وردەندەر مەن مەدالدار تابىس ەتتى. ءىى دارەجەلى «ايبىن» وردەنىمەن ە.كوشەرباەۆ (مارقۇم), ءا.سارىقۇلوۆ, «جاۋىنگەرلىك ەرلىگى ءۇشىن» مەدالىمەن ۇقك قىزمەتكەرلەرى – د.بازارباەۆ, ا.قوجابەكوۆ, ا.لۇقپانوۆ, ج.وماريەۆ, ءا.تاستامبەكوۆ, ە.ۇسەنوۆ ماراپاتتالدى.
ماراپاتتاۋ راسىمىنەن كەيىن ۇلتتىق قاۋىپسىزدىك كوميتەتىنىڭ 25 جىلدىعىنا ارنالعان سالتاناتتى كونتسەرت ءوتتى.