جاڭا كاسىپورىندى ايماق باسشىسى ەرلان قوشانوۆ پەن «قازگازبلوك» جشس اكتسيونەرى بولات ءابىلوۆ ارنايى كەلىپ ىسكە قوستى. – بۇگىن ءوڭىردىڭ ءال-اۋقاتىن ارتتىراتىن قۇرىلىس ماتەريالدارىن شىعاراتىن زاۋىتتىڭ جۇمىسىن ىسكە قوسامىز. وبلىسىمىزدا اپتا سايىن ءبىر زاۋىت ىسكە قوسىلۋدا. ەلباسىمىزدىڭ: «قۇرىلىس سالاسى ەل ەكونوميكاسىنىڭ قوزعاۋشى كۇشىنە اينالۋى كەرەك دەگەن» ءسوزى بار. بۇگىن ەلباسى تاپسىرماسىنىڭ ورىندالعانىنىڭ ناقتى كورىنىسىن كورىپ وتىرمىز. زاۋىتقا 1,5 ملرد تەڭگە ينۆەستيتسيا سالىنىپ, 70 ادام جۇمىسپەن قامتىلدى. ەندىگى ۋاقىتتا ايماعىمىزدا قۇرىلىس سالاسى جانداناتىن بولادى. وسىنداي يگى ءىستى باستاپ, تۋعان جەرگە تۋىن تىگىپ جاتقان بولات مۇقىش ۇلىنا ريزاشىلىعىمىز شەكسىز, – دەدى وبلىس اكىمى. سونىمەن قاتار, ينۆەستيتسيالار جانە دامۋ مينيسترلىگى يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ توراعاسى رۋستام اقبەردين, ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى ەلدوس رامازانوۆ, بەلگىلى قوعام جانە مەملەكەت قايراتكەرى ورالباي ابدىكارىموۆ ءوز تىلەگىن جەتكىزدى. «قازگازبلوك» جشس اكتسيونەرى بولات مۇقىش ۇلى دا زاۋىتتىڭ ەل يگىلىگى ءۇشىن جۇمىس جاسايتىنىن ايتىپ ءوتتى. – گازبلوك – قازىرگى زامانعى امبەباپ قۇرىلىس ماتەريالى. بۇتىندەي ءبىر ءىرى كەشەندى قۇرىلىستىڭ مىندەتىن ءتيىمدى شەشەدى. گازبەتوندى بلوكتار ءتۇرلى ولشەمدەگى عيماراتتاردى سالۋعا قولايلى. ءبىزدىڭ ءونىم قازاقستانداعى ەڭ ساپالى ءونىم بولادى. ونىڭ ىشىندە, تەمىرتاۋدىڭ قۇمىنداعى كۆارتستىڭ ۇلەسى شامامەن 70 پايىز. زاۋىت جىلىنا 150 مىڭ تەكشە مەتردەن اسا گازبلوك شىعارۋعا قاۋقارلى, – دەدى ب.ءابىلوۆ. كومپانيانىڭ قۇرىلتايشىسى ەركەبۇلان احمەتوۆتىڭ ايتۋىنشا, اۆتوكلاۆتى قاتايۋدان وتكەن گازبلوك وتە ءتوزىمدى, قۇرىلىستىڭ ءتۇرلى نىساندارىنا قولدانۋعا ىڭعايلى, ءارى دىبىس جۇتىلىمى مەن جىلۋ ساقتاۋ قاسيەتى دە جوعارى. ۇزاققا توزىمدىلىگى كادىمگى كىرپىشتىڭ پايدالانۋ مەرزىمىمەن بىردەي. ءونىمنىڭ ساپاسىنا 80 جىلعا دەيىن كەپىلدىك بەرىلەدى. بۇگىننىڭ وزىندە قاراعاندى وبلىسىنداعى جانە استاناداعى قۇرىلىس كومپانيالارى تاۋارعا تاپسىرىس بەرۋگە كەلىسسوز جۇرگىزۋدە. ميراس اسان, «ەگەمەن قازاقستان»
قاراعاندى وبلىسى