ساعات 18:06-دا تىركەلگەن ميلليونىنشى كەلۋشى قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان ارنايى مونۋمەنت جاقتاعى كىرەبەرىستە تىركەلگەنى انىقتالدى. ول ەلورداداعى №76 مەكتەپ-ليتسەيدىڭ ماتەماتيكا ءپانىنىڭ مۇعالىمى گۇلجيھان جاڭابەرگەنوۆا ەكەن... «مەن باس قالامىزدا ۇيىمداستىرىلعان, كۇللى الەم كوز تىككەن شارانىڭ ميلليونىنشى كەلۋشىسى بولعانىما وتە قۋانىشتىمىن. جەر بەتىندەگى 35 مەملەكەتتە وتكەن ەكسپو-نىڭ بيىل قازاقستاندا ءوتىپ جاتقانىن ماقتان تۇتامىن», دەدى ول جۋرناليستەرمەن كەزدەسۋىندە.
ميلليونىنشى كورەرمەندى «استانا ەكسپو-2017» ۇلتتىق كومپانياسىنىڭ باسشىسى احمەتجان ەسىموۆتىڭ ءوزى قارسى الىپ, «ديۋ سولەي» تسيركىنە بيلەتتەر مەن پلانشەت سىيعا تارتتى. ء«بىزدىڭ ۇلتتىق كومپانيا ءۇشىن بۇگىن ماڭىزدى كۇن. ءبىز جوسپارلاعانداي, كورمەگە كەلەتىن 2 ميلليون ادامنىڭ بارلىعى تىركەلدى. ءبىز ءار كۇن سايىن كەلۋشىلەردىڭ سانىن باقىلاپ, بولجاپ وتىرامىز.
مىنە, كورمەنىڭ 31-ءشى كۇنى ميلليونىنشى كورەرمەنىمىز تابالدىرىعىمىزدى اتتادى. مۇنداي اۋقىمدى ۇلتتىق جوبانى تاماشاۋعا دەگەن قىزىعۋشىلىق كۇن ساناپ ءوسۋ ۇستىندە. بۇگىنگى كورسەتكىش تە ءبىزدى قۋانتادى», – دەگەن ا.ەسىموۆ ميلليونىنشى كورەرمەنگە اق تىلەگىن جەتكىزدى. «مەن استانادا تۇرامىن, وسىندا جۇمىس ىستەيمىن. كورمەگە ەكىنشى رەت وتباسىممەن كەلىپ وتىرمىن. ءبىرىنشى رەت ارىپتەستەرىممەن دايىندىق كەزىندە كەلگەن ەدىم. ول كەزدە ءوزىمىزدىڭ «نۇر الەم» پاۆيلونى اشىلماعان ەدى. وسى جولى قازاقستاننىڭ پاۆيلونىن تاماشالاساق پا دەگەن نيەتىمىز بار», دەيدى گۇلجيھان جاڭابەرگەنوۆا. «مەن وسى شارا جاڭا تەحنولوگيالار, سەرپىندى يدەيالار اكەلەدى دەپ كۇتەمىن. ەكسپو-نىڭ ناتيجەسى وراسان زور جەتىستىكتەرمەن ەلىمىزگە پايدا اكەلەدى دەپ سەنەمىن. ويتكەنى, بارلىق قاتىسۋشىلار ەڭ ۇزدىك ونەرتابىستارىن, جاسىل تەحنولوگياداعى جەتىستىكتەرىن اكەلدى مۇندا», – دەيدى ميلليونىنشى كليەنت.
اسحات رايقۇل, «ەگەمەن قازاقستان» سۋرەتتى تۇسىرگەن ەرلان وماروۆ, «ەگەمەن قازاقستان»